13
Ammon le Tamar
1 David i capa Absalom in celnu pa khat Tamar nei in, amah cu mi diangzet hi. David zi dang i capa pa khat Ammon in Tamar cu ngaizet hi.
2 Ammon cu Tamar a ngaih leita hangin na hi; itahim titale a co theihnak tuk lampi hihim umma tin, a ngaihsut hang hi. Tamar cu khanglai him hi a, tangval kuamah tawktik awng haw ma hi.
3 Ammon in ngualcam pa khat Jonadab tihmi nei in, amah cu David i u Shammah i capa hi. Jonadab cu mi teizet hi.
4 Ammon lakah, “Kumpipa i capa hi navecin ni khat nung ni khat thasia in mu ing. Itakaw, hilh hemin,” ti hi.
Ammon in, “Ka unau Absalom i celnu Tamar ka ngaih hang hi,” tin hilh hi.
5 Jonadab in, “Ka tina hi ti inna, na zaunakah zau in hi. Na pa in, a veh ten, ‘Ka celnu Tamar hungin, an pia hen, ka mitmuhah an bawlin amah loli in an pia hen,’ tin na ti in,” tin Ammon cu ti hi.
6 Ammon cu na hemin, zau hi.
David Kumpipa in, a veh ten, Ammon in, “Tamar hungtik inna, hilai ka mitmuhah cangho bawl hen, mahten amah loli in an pia ahin deh ing ih,” tin ngen hi.
7 David in Tamar lakah thucahin, “Ammon umnakah hawh inna, an bawlsakin hi,” tin hah hi.
8 Tamar cu hawhin, Ammon cu a zaunak humah mu hi. Sangvut la in, cop a, Ammon i mai ah cangho bawl hi. Cangho cu emin,
9 a emnak kho sung pen suahin, Ammon cu pia hi. Mahnaven ei nuam ma hi. Ammon in, “Midang hempoh cu pualeu ah tul khawng haw hen,” ti in, tul khawng haw hi.
10 Tamar lakah, “Ka zaunakah cangho cawi in, nangma khut loli tuah baakin,” ti hi. A em semmi cangho cu la in Ammon lakah hawhpih hi.
11 Cangho a piak ten Ammon in Tamar cu manin “Ka lakah zau in,” ti hi.
12 Tamar in, “Cang thei tukma hi, zau tuk mang. Ita ka minsiatik tuk cim? Hiti bang cu Israel tei bawl awngmi hi ma hi. Ningdelhhuai misil bangin um pahsun.
13 Itin kaw mitei mai ah ka mit ka hah ngam tuk? Israel ngam sungah nangmah cu ngamsa bangin zo haw tuk hi. Kumpipa tawk saw inna, keimah huai tuk cu el tukma poh hi,” ti hi.
14 Tamar i ot cu ngai nuam ma hi. Tha ngil deuh a hih bangin Ammon in Tamar cu manin sualpih hi.
15 Ammon in Tamar cu mitkemin huazet hi. Amasa a ngaih sangin a huatnak cu nase saw hi. Mah hangin Tamar cu, “Tho inna, tai in hi,” tin hawlvawk hi.
16 Tamar in, “Hi ma hi, hi bangthong hangin kei na hawlvawk tale ka min a siattikmi sangin sia saw tuk hi,” ti hi.
Mahnaven a thu cu Ammon in ngai nuam cuang ma hi.
17 A umlawhpa khat samin, “Hi nu hi ka mitmuhah um pahsuh hen. A baan pen pualeu ah doktul inna kongkalhin hi,” tin hilh hi.
18 A umlawhpa in dok tulin kongkhah cu tawh kalh zam hi. Tamar cu mah khan laih a, kumpi canu pasal nei laihngawl khanglai tei silhmi angki baansau silh hi.
19 Mah angki cualpi cu bal khawngin, a lu ah vut thehdunin, a mai hupin nase zetin kapthahin hawh hi.
20 A ningpa Absalom in, “Ammon in zawnsak maw? ka celnu, ngim tohin, itahim titale Ammon cu na ningpa hi, midang lak hei ah son pahsun. Hiti lawlawmin thasiat tuk hi ma,” ti hi. Tamar cu Absalom i innah thasia zetin um hi.
21 David Kumpipa in mah thu a zak ten thinukzet hi.
22 A celnu Tamar manin, a sualpih hangin Absalom in Ammon cu hua zetin ot hei otpih nuam ma hi.
Absalom In Phu La
23 Mahnung kum nih ten Efraim khua el Baal Hazor ah Absalom in, a tuute mul mettik hi. Mah puai ah Absalom in kumpipa i capa hempoh tel tukin sam khawng hi.
24 A pa David lakah hawhin, “Kumpipa, ka tuute a mul mettik ing, mahlai ah na khutnuai bawite tuah hung bok tukma cim?” tin zawm hi.
25 David Kumpi in, “Hung tukma ung ka capa, ka venghawng uhin ka hung uh tale nangmah buai pia leita tuk ung,” ti hi. Absalom in sawm lo naven kumpipa in hawh tuk cu a lungkim cuang ngawl hangin, “Damno in hawhin hi,” tin Absalom cu muicu pia hi.
26 Mahnaven Absalom in, “Mah ahi tale ka u Ammon bek hah pah ni ci?” ti hi.
David in, “Ita hawh tuk kaw?” tin ti hi.
27 Mahnaven Absalom in, a lem lih hangin a tawpnakin David in Ammon le a capa dangte cu Absalom lakah hawhtik hi.
Absalom in kumpipa i eih tak tukin an ukzet do hi.
28 Absalom in, a umlawh tei lakah, “Ammon hi zo kuh unna, zukham thahin, a um tale that tukin thupialeh tung hi. Lau nuam pahsuh un. Keimah in dehvo la ing. Ngaihsut hak pahsuh un. Ngalpha zetin bawl poh un hi,” tin tiam hi.
29 Absalom i thupiak bangin a umlawh ten Ammon cu that haw hi. David i capa dangte cu manlang zetin laak hum khungin, tai khawng haw hi.
30 Inn a hen haw laih ngawlin David lakah, “Absalom in, na capate that khawng hi; pa khat hei suak haw ma hi,” tin thu heng hi.
31 Kumpipa cu dingvutin, a lungsia in, a puante botkek khawng a, lei humah vawkdun kok hi. A el um a umlawhte vangin a puan botkek bok haw hi.
32 Mahlai takin David i u Shammah i capa Jonadab cu hungin, “Maw kumpi pa, na capate a venghawngin that haw ma hi. A thah haw mi cu Ammon bek hi. Ammon in, a celnu Tamar a sualpih bek ten hi bang hin bawlleh tuk hi tih cu Absalom i mitmai ah mu leng sisi.
33 Mah hangin na capate a venghawngin thi, tih thu na zakmi cu sang nuam pahsun. Ammon bek thi hi,” tin hilh hi.
34 Mah sungin Absalom cu taivawk zo hi.
Kongka cingtu ngalkap pa in Horonaim lampi mualhum pen mi honpi hungin mu hi. Manlangin kumpipa i lakah hawhin, “Horonaim lampi mualhum pen mi tam thim hung mu ing hi,” tin hilh hi.
35 Jonadab in, “Hi a hungmite cu hung haw tuk hi, tin ka tihsa mi na capate,” ti hi.
36 Mahti bangin a hilh cengbek ten David i capate cu heng haw hi. Kap leilui haw in, David le a khutnuai bawi dangte vang nase zetin kap bok haw hi.
37 Absalom cu tai in, Ammihud i capa Geshur ngam kumpi Talmai lakah ngelh hi. David cu a capa Ammon ngai in ngeipi um hi.Ref 13:37 2Sam 3:3;
38 Geshur ngamah Absalom cu kum thum um hi.
39 David cu a mithi ngaih phadeuhin capa Absalom lehlam ngaizet hi.