9
Saul In Samuel Tawk
1 Benjamin ngamah Kish a tih haw mi pa khat um hi. Amah cu Abiel capa hi. Abiel cu Zeror i capa hi. Zeror cu Bekorath i capa hi. Bekorath cu Afiah capa hi, Afiah cu Benjamin hinnam hi. Kish cu mihau le mitei upatmi hi.
2 Kish in Saul tihmi capa nei hi. Saul cu a khanphat laihtakin midiangzet hi. Israel mi hempoh sung pen mi piangbel hi in, midangte cu ama ko tian ngeh haw poh hi.
3 A pa Kish i laak khenkhatte cu a paih haw hangin a pa in “A umlawh uh pa khat pui inna, a laak uhte zei un,” tin Saul cu hilh hi.
4 Efraim mualhum ngam le Shalishah ngamah hawhin, zei haw naven mu haw ma hi. Shaalim peng le ngamsung hempoh zei haw naven laak cu tawk cuang haw ma hi. Mah nungten Benjamin ngam sungah zei haw naven mu cuang haw ma hi.
5 Zuf ngamsung a hen haw ten Saul in, “Pin toh nung, itahim titale laak saw ngaisung ngawlin ka pa in eimuh saw hi a ngaihsut hak kha tuk,” tin, a umlawhpa i lakah ti hi.
6 A umlawhpa in, “Um hih hemin! hih khua ah Pathian miman pa khat umin, mitei upat zetmi hi; itahim titale a hilhmi hempoh man khawng hi. A lakah hawh nung inna, a laak tei umnak hilh theikha tuk,” ti hi.
7 “A hawh uh tale ikaw a piak tuk uh? A tawngphu sung uhah an umleh ma toh, imah piak tuk nei ma si ung,” tin Saul in ti hi.
8 A umlawhpa in, “Tangka cang khat pua ing mah pia nung. A laak tei umnak hilh tuk,” ti hi.
9-11 Saul in, “Na ngaihsutnak pha hei! Hawh nung,” ti in, mi thiangtho pa i umnak khua ah hawh haw hi. A khuataw lamto ah a hawh toh haw laihtakin tuicawi tukin a hungmi khanglaite tawk haw hi. “Na khua sung uhah thumutu um maw?” tin khanglaite cu dong haw hi.
Mah hun laihin mi pa khatin Pathian nelah dot nuammi a neih ten, “Thu mu pa i lakah hawh nung” tin timek haw hi. Itahim titale mahlai in profet cu thumutu tin sam haw hi.
12 “Um zuh hi!” tin khanglai ten don haw hi. “Na hen laih ngawlno uhin heng hi. Manlang unna, pha tuk uh ci. Khuasung miten tuni in mualhum biaklandawhah biakpiaknak bawl haw tuk hi.
13 An ei tukin mualhumah a hawh laihngawlin khuasung na tum bek uhten amah cu tawk tuk poh uh ci. Mualhumah amah a heng ma tale mipite an ei haw tukma hi; itahim titale biakpiaknak cu amah in thungen masa tuk a, mahceng ten mipi cu an ei haw tuk laih hi. Atu mamah hawh unna, tawk paih tuk poh uh ci, tin ti haw hi.”
14 Mah bangin hawh haw a, khuasung a tum haw bek ten Samuel cu biakpiaknak munah hawh tukin a hun lih mu haw hi.
15 Saul i hen ni a zan sunin, Topa in Samuel lakah
16 “Zingten tu bang hunin Benjamin hinnam pen mi pa khat na lakah hah tung hi. Ka mihing Israel uktu in amah cu sathau thih inna, Filistin mitei khut pen humhim tuk hi. Ka mihing tei thuaknak le cimkhamnak mu zo ing, bopnak ngenin, a aunak haw za zo ing,” ti hi.
17 Samuel in Saul amuh ten, Topa in Samuel lakah, “Ka tihmi cu hi pa hihi. Ka mihingte a man uk tuk hi” tin ti hi.
18 Saul cu Samuel lakah kongkhah elah hawhin, “Thu mu pa ilai ah um kaw, hilh zalin,” ti hi.
19 Samuel in “Thu mu pa cu keimah ing. Biakpiaknak mun ka mai ah hawhin hi. Tuni in, na pa nihin, ka lakah an ei tuk uh ci. Zingten na thudot nuam uhmi hempoh hilh tung, mah nungten na hawhnak tuk uhah henleh tung hi.
20 A paihnak ni thum kim zo mi na laakte cu helhkam nuam pahsuh un, itahim titale mu zo haw hi. Mahnaven Israel miten a kulzet haw mi cu akua him? Nangmah hi ci! Nangmah le na pa i hinnamte uh ci,” tin ti hi.
21 Saul in, “Kei cu Benjamin hinnam ing hi; Israel miphun lak pen hinnam neubel ing. Ka hinnam khat sung hei pen kohtei innkua cu nemcuam ngawlbel si ung, ita hi bangin ka lakah awn cim?” tin ti hi.
22 Samuel in, Sal le a umlawhpa cu an eihnak khan ngengpi sungah pui in, a cial haw mihing sawm thumte cu a khunnak haw cabuai bul lamah khungtik hi.
23 Samuel in an huan pa i lakah, “Adangno in ka koihtikmi cik cawi hemin,” ti hi.
24 Mah hangin an huan pa cu sa kawng le a el taksa kaisuahin, Saul i mai ah koih hi. Samuel in, “Nangmata tukin koihmi hi. Ei in, ka cial mite tuah ei ten tukin nangma ca in koihmi,” ti hi.
Mah ni-in, Saul cu Samuel tuah an ei hi.
25 Biakpiaknak mun pen khua sungah a kihleh ten inn humah Saul i zaunak bawl haw in,
26 mahlaiah Saul cu zau hi. Zingtungno in Samuel in Saul cu samin, “Tho inna, na hawhnak tuk lampi ah hen tung,” ti hi. Saul cu tho in, Samuel tuah mun khat hawh haw hi.
27 Khua ngi a hen haw ten Samuel in, “Na umlawhpa hi mai ah hawhtikin,” tin Saul cu ti hi. Umlawhpa cu mai ah hawhin Samuel in, “Dawmno um hih hemin, Pathian i otmi hilh nang,” ti hi.