10
1 Samuel in olif situi palang khat la in, Saul i lu humah leihin, Saul cu a thut nungten, “ Topa in, a miphun Israel mite uktu tukin nangmah cu sathau thih hi. A mihingte ukin, a ngal tei khut sung pen luattik tuk ci. Ama mihingte uk tukin Topa in teng zo hi, tih sialsiahnak cu hi bangin hituk hi.
2 Tuni a khehdun nung uhten Benjamin ngamsung a, um Zelzah khua Rachel i khan elah mi pa nih tawk tuk ci. Na zei lih uhmi laakte cu mu zo haw in, na pa cu laak saw ngaihsut hak ngawlin nangmah saw a ngaihsut hak hi, ‘Ka capa ca tukin i bawl kam nang?’ tin atu le atu-in, dong li hi tin, hilh haw tuk hi.
3 Mahlai mun pen hawhin, Tabor a tih haw mi mun a, sasua kungpi na hen ten Bethel khua ah Pathian lakah biakpiaknak pia tukin a hawh papi pa thum tawk tuk ci. Pa khat pa in keelno pa thum pui tukin, pa nihnak pa in cangho zawl thum keng tuk hi. A pa thumnak pa in savun thawl dimin sabittui keng tuk hi.
4 Nuksat haw tuk a, cangho zawl nih a piak haw ten sangin hi.
5 Filistin ngalkap tei ngiahbuk umnak Gibeah khua a, um Pathian Mualah hawhin hi. Khuapi sung tumnakah mualhum biaklandawh pen profet honpi tingtang le khuang, pheveu le lemlawi tumthahin tawk tuk ci. Amuhte cu profet awn tuah awn lei lui thah haw tuk hi.
6 Pathian i hawvangin nangmah vang man bokin, amuhte bangin phu in, awn li awn li in, midangpi bangbok tuk ci.
7 Mah bangin na humah a kim khawng ten Pathian i lamhoihnak bangin bawlin hi.
8 Ka mai a Gilgal ah hawhin hi. Mahlai munah nangmah tawk tung hi, halkang biakpiaknak le pawlkom biakpiaknak Pathian nelah pia tung hi. Ka hen laklawh ni salih sung ngak inna, mah nungten na bawl tukmi hilh tung hi,” tin Samuel in ti hi.
9 Saul cu hawh tukin a hek laihtakin, Pathian in Saul cu lungmu thak pia hi. Samuel i hilhmi hempoh cu mah ni-in kim khawng hi.
10 Saul le a umlawhpa cu Gibeah a hen haw ten profet ten tawk haw hi. Pathian hawvangin Saul cu manin profet dangte lamin, lung cecu in, a um haw bangin um bok hi.
11 A laihngawl a theitu ten Saul vang mah ti bangin a um bok cu amuh haw ten, “Kish capa i cang hi nen tim? Saul vang profet cang zo hi nen ti maw?” tin pa khat le pa khat tidun li haw hi.
12 Mahlai khua um papi pa khatin, “Midang profet aw, a pa haw profet hi ten haw maw?” tin ti hi. Mah hangin, “Saul vang profet cang zo maw i nge?” tih hi thupaucapnakin mang haw hi.Ref 10:12 1Sam 19:23-24;
13 Saul cu profet bangin laamin, a au celh ten mualhum biaklandawhah hawh hi.
14 A pa i unau pa in Saul le a umlawhpa cu, “Ilai ah um kam uh ci,” tin dong hi.
Saul in, “Ka laak uhte zei ung. Ka muh uh ngawl ten Samuel tawk ung,” ti hi.
15 “Samuel in i kaw a hilh?” tin, a pa i unau pa in dongleh hi.
16 “Laak cu mu zo haw hi, tin hilh,” ti hi. Kumpi suak tuk ci tin Samuel i hilhmi cu a pa i unau pa lakah hilh ma hi.
Saul Cu Kumpi In Bawl Haw
17 Israel mite cu Mizpah ah Samuel in biaknak lam thu son tukin sam khawm hi.
18 Samuel in, a lak hawah, “ Topa Israel i Pathian in, Izipt ngam pen tultikin, ‘Izipt mite le nangmuh a bawlsiatu tei lak pen luattik zo ing.
19 Keimah cu na haksatnak uh le na cimkhamnak lak pen a pantu na Pathian uh ing. Mahnaven tuni in kei cu vawkin, kumpi tuk ngen uh ci. Mah hangin na miphun tek uh le na hinnam tek uhin ka mai ah ding hem un,’ ” tin hilh hi.
20 Samuel in miphun pa khat nung pa khatin, mailamah tultik a, Topa in Benjamin hinnam cu teng hi.
21 Benjamin hinnam pen hinkhat le a dang hinkhat Samuel in, a dintik ten Matri i innkua Topa in teng hi. Matri innkua cu a miphun haw in mailamah a tul haw ten Kish i capa Saul teng hi. Kish capa Saul cu zei in mu haw ma hi.
22 “Midang ten tuk um haw maw?” tin Topa cu dong haw hi.
Topa in, “Hilai khah Saul um leng si; van lakah ngelh,” ti hi.
23 Mah hangin tai haw a, Saul cu mipi mai ah tulpih haw hi. Midang tei lakah a din ten midang sangin pi khat sang hi.
24 Samuel in, “Pathian i tenmi cu hi pa hihi. Eimu lakah amah bang kuamah umma hung,” ti hi.
Mi hempohin, “Kumpipa a khansau hen!” tin au leilui haw hi.
25 Kumpi i co tuk le a nadehte cu Israel tei lakah Samuel in cel zetin hilh ciangin, laibu sungah a ngat nungten mah laibu cu mun thiangtho ah koih hi. Mah nungten mipi cu a inn ten hawah pintik hi.
26 Saul vang Gibeah i innah pin bok hi. Pathian in lungmu haw a tawh ngahmi huham nei khenkhat ten Saul cu a innah zui bok haw hi.
27 Mahnaven suaksual khenkhat ten, “Hi pa in itin kaw ohte a pat theih tuk?” tin ti haw hi. Saul cu naunehin laksawng hei pia nuam haw ma hi.