8
Israel Ten Kumpi Ngen Haw
1 Samuel cu tekzet toh hangin a capate cu Israel tei lakah thukhentu dektik hi.
2 A capa upa saw cu Joel hi in, a nauta saw cu Abijah hi. Beersheba khua ah thukhentu hi haw hi.
3 Mahnaven a pa haw i nungcang bangin nung thei haw ma. Sumpai ngahnak bebek ngaisung haw in, nawhthuh la in dik zetin thukhen haw ma.
4 Israel puitute cu tawkdun khawm haw in, Samuel umnak Ramah ah hawh haw in,
5 “Zo tehin, nang cu tekzet zo ci, mahnaven na ca ten na nungcang zui haw ma hi. Miphun dang tei a neih haw bangin uktu tukin kumpi pia in,” tin ti haw hi.Ref 8:5 Daan 17:14;
6 Samuel in mahti bangin kumpi a nget haw cu a lungkim ngawl hangin Topa i lakah thungen hi.
7 Topa in, “Na lakah a hilh haw mi thu hempoh hi ngai in hi. Nangmah a vawk haw thu kha ma hi. Keimah a kumpi haw vawk hi saw haw hi.
8 Izipt ngam pen ka tulpih ceng pepanin ka lak pen tai in, pathian dang bia haw hi. Ka humah a bawl leleng haw mi atu-in, na humah bawlbok hawta hi.
9 Mah hangin a thu haw ngai pohin hi. A kumpi haw in iti bangin uk tuk him tih cu cangkimno in, a lak hawah hilhhamin, ngallinnak ciangno in pia hamin,” ti hi.
10 Kumpi ngentu Israel tei lakah Topa i awnkam cu Samuel in hilh khawng hi.
11 “Hitih bangin na kumpi uhin uk tuk hi. Na capate uh cu ngalkap dektik tuk hi; a khenkhatte cu ngaldonak cipuhleng mawngtu in um haw tuk hi; a khenkhat cu cipuh hum khung ngalkapin um haw tuk a, khenkhatte cu ke hawh ngalkapin um haw tuk hi.
12 A khenkhat cu a ngalkap thawng khat uktu ngalbawi hi haw tuk a, khenkhatte cu ngalkap sawm nga uktu hi haw tuk hi. Na capate uh khenkhat cu kumpipa i lobungtu hi in, a lo sung a an cawmtu, a hiamnam bawltu le a ngaldonak cipuhleng na bawltu hi haw tuk hi.
13 Na canu uhte cu a ca in namtui bawltu hi haw kul tuk a, an huantu le a cangho bawltu hi haw tuk hi.
14 Na lo sung uh pen a phabel, na sabit huan pen a phabel le na olif huan pen a phabelte cu na kumpipa uhin laksakin, a khutnuai bawite pia khawng tuk hi.
15 Na cop uhmi an le sabit sung pen khen sawmah khenkhat la in, a zung nadek bawite le a bawi dangte pia khawng tuk hi.
16 Na umlawh uh numei hihen, pano hihen a laksak i hum pen na khui uh le na cipuh uh lak pen a phabel la in, ama nadektu in bawl khawng tuk hi.
17 Na tuuhon sung uh hei pen khen sawm khenkhat la tuk hi. Nangmuh vang ama salin suak khawng tuk uh ci.
18 Mahti bang hun a hen ngangai ten na lung uh tho in, na ten uhmi kumpi hangin phuleh tuk uh ci; mahnaven na phuknak uh cu Topa in theihpih tukma hi,” tin Samuel in hilh hi.
19 Samuel i thu cu ngai nuam ngawlin, “Mah ma hi! Kumpi cu deih hihim ung hi,
20 Keimuh kumpi in, ukin ka ngaldonak uhah ho tuk hi. Miphun dangte bang tuk ung hi,” tin ti leng haw hi.
21 Mipi tei hilhmi thu cu Samuel in kimno in ngai in, Topa hilh hi.
22 Topa in, “A deih haw mi cu bawl inna, kumpi cu pia in,” ti hi. Mahnung ten Israel mite cu Samuel in amu inntekah pintik khawng hi.