5
Filistin Tei Lakah Thutiam Kuang
1 Pathian Thutiam Kuang cu Filistin miten a lon ngah nung haw ten, Ebenezer pen Ashdod khua ah pua haw hi.
2 Dagon pathian biaknak innah hawhpih haw in, Dagon pathian elah koih haw hi.
3 A zingten Pathian Thutiam Kuang mai a, Dagon zuk cu bokkhup lum leng cu Ashdod khua miten mu haw hi. Phong lehin, a umdan banglengno in koihleh haw hi.
4 A zing, zingtungno in Topa i Thutiam Kuang mai ah Dagon milimpi cu a bokkhupin lum leleu cu mu haw hi. A lu le baante tawng khawngin, kongka elah lum teptupin, a pumpi bek tang hi.
5 Mah hangin tusun tianin Ashdod khua thiampi le Dagon a bia ten Dagon a lupnak mun cu sik ngam ngawlin pial haw hi.
6 Topa in Ashdod khua mite nasezet bawlsia in, uilut vei khawng haw hi.
7 Mahti bang a um haw cu mipi in, amuh haw ten, “Israel tei Pathian in eimuh le a biak uh pathian Dagon tianin bawlsia hi. Thutiam Kuang hi munah umtik tuk cu cangthei ma toh hi,” tin ti haw hi.
8 Mah hangin mi hahin, Filistin kumpi pa nga samkhawmin, “Israel tei Pathian iti bang bawl kam nung,” tin dong haw hi.
Amuh ten, “Gath ah koih un,” tin ti haw hi. A tih haw bangin Gath ah koih haw hi.
9 Mahnaven Gath ah a koih bek haw ten Topa in Gath khuasung mite bawlsia in haksa zetin um haw hi. Gath khuasung mi hempoh a neu a ngengin uilut vei khawng haw hi.
10 Mah hangin Thutiam Kuang cu Ekron khua ah kuat haw hi. Ekron khua a hen bek haw ten khuasung mite cu, “Israel tei Pathian i Thutiam Kuang henpih haw in, a venghawng uhin that khawng haw tuk hi,” tin au leilui haw hi.
11 Mah hangin Filistin kumpi cu sam khawmleh haw a, “Israel tei Thutiam Kuang cu a umnak munah kuatleh un, mahten keimuh le ka innkua thi tukma ung hi,” tin ti haw hi. Nase zetin Pathian in, a bawlsiat hangin khuasung mite cu ngaihsut hak zetin um haw hi.
12 A thi ngawlmi vang cu uilut vei in mi hempoh a biakmi pathian tei lakah bopnak ngenin au leilui haw hi.