6
Thutiam Kuang Kikleh haw
1 Topa i Thutiam Kuang cu Filistin ngamah ha salih a um ceng ten,
2 Filistin hotu ten thiampi le mipolte samin, “ Topa i Thutiam Kuang hi itin kaw a bawl tuk uh? A umnak munah a kuatleh uh tale i tuahin kuat tuk hung kaw?” tin dong haw hi.
3 “Israel tei Pathian Thutiam Kuang cu na kikleh uh tale na sualnak uhte ngaidam a hihnak tukin Pathian lakah laksawng pia unna, mah tuah kik un hi. Laksawng tel ngawlin Thutiam Kuang cu kik pahsuh un. Laksawng tuah na kuat kikleh uh ahi tale dam tuk uh ci. Pathian in ita kohte bawlsia him tih thei tuk uh ci,” tin ti haw hi.
4 “Laksawng ikaw ka piak tuk uh?” tin dong haw hi. Amuh ten, “Sui tuah bawlmi uilut meima zuk pa nga le nam zuk pa nga Filistin kumpi ca tukin zuk pa khat tenin pia un hi. Itahim titale bawlsiatnak cu na venghawng uhin le Filistin kumpi pa nga ten thuak uh ci.
5 Na khua uh le na ngam uh a siatsuahtu uilut meima zuk le nam zukte cu bawl unna, Israel tei Pathian nelah na sualnak uh phuang un, mahtin na bawl uh tale nangmu Pathian le na ngampi uh bawlsiatnak pen luattik tuk hi.
6 Ita Faro le Izipt mite bangin mi thinlianin um nuam li uh cim? Izipt ngam pen Israel mite a suahtik haw laklawh Izipt mite cu Pathian in, a nuanuamin khalsia li hi tih cu phawk ngil pahsuh un.
7 Mah hangin khuileng thak pa khat le lengdok awng ngawl khuipi pa nih ngaisung un. Mah khui cu lengah khih unna, a note cu khui innah khum un hi.
8 Topa i Thutiam Kuang cu la unna, khuileng humah koih un. A elah na sual uh ngaihdamnak tukin na bawl uhmi Pathian lak a, na piak uhmi sui milimte cu kuang dangno in mah Thutiam Kuang elah koih un. Khuileng cu a mawngtu um ngawlin amahno hawhtik un hi.
9 a hawh cu zo un. Beth Shemesh khua lamah a hawh tale, a hum uhah siatnak a hengtiktu cu Israel tei Pathian hi, tih cu lang tuk hi. Mahnaven Shemesh khua lamah a hawh ma tale cu natnak piatu cu Israel tei Pathian hi ngawlin a bawngsiat uh hang hi tuk hi, tih thei tuk hung hi,” tin ti haw hi.
10 Thiampi le mipol tei hilh bangin bawl khawng haw hi. Khuipi pa nih cu pui haw a, khuileng bulhin, khuinote cu khui innah khum haw hi.
11 Pathian Thutiam Kuang cu la in, sui tuah bawlmi uilut meima zuk le nam zukte cu a koihnak kuang tuah khuileng sungah koih haw hi.
12 Khui cu hawh haw in, imah lai hei ah pial ngawlin Beth Shemesh khua lamah hawh ngut haw hi. A hawh thah haw in, ngung pepel haw hi. Filistin tei kumpi pa nga ten Beth Shemesh khua ngamngi tian zui haw hi.
13 Beth Shemesh khua mite cu munlawnah sangvut at li laihtak haw hi. Khua a hen haw ten Thutiam Kuang amuh haw bek ten lungdamzet haw hi.
14 Beth Shemesh khua mi Joshua i lo sungah khuileng cu hengin suang ngengpi elah cawl hi. Mahte cu thing tuah bawlmi leng cu satkehin, khui pa nih vang ngo in, Topa i lakah halkang biakpiaknak bawl haw hi.
15 Levi miten Topa i Thutiam Kuang le sui a bawlmi zukte koihnak kuang cu la haw in, suangpi humah koih haw hi. Mah ni-in Beth Shemesh khua miten halkang biakpiaknak le biakpiaknak dadang Topa i lakah pia haw hi.
16 Filistin kumpi pa nga ten Beth Shemesh khua mitei bawlmite cu a zoh ceng haw ten mah ni lelengin, Ekron khua ah kikleh haw hi.
17 Filistin miten a khuapi pa nga haw, Ashdod, Gaza, Ashkelon, Gath le Akron ca tukin khua khatah pa khat ten sui a bawlmi uilut mei ma zuk pa nga cu Topa i lakah a sual haw ngaihdamnak tukin pia haw hi.
18 Filistin kumpi pa nga tei ukmi le a khuapi kulhtian hei hihen, a up ngawlmi khuano hei hihen, kumpi pa khat i ukmi khuate cu sui a bawlmi nam zuk pa khat ten pia bok haw hi. Topa i Thutiam Kuang a koihnak haw, Beth Shemesh khua mi Joshua lo sung a, ummi suang ngengpi cu mahlai munah a piangmi thu theihpihtu tianin umlaih hi.
19 Beth Shemesh khua miten Thutiam Kuang sung a zohtum haw hangin, Topa in mi khenkhatte cu thatin, mihing sawm salih thi haw hi. Mi tampi Topa in, a thihtik hangin khua mite cu thasiazet haw hi.
Thutiam Kuang Kiriath Jearim Khua Ah
20 Mah hangin Beth Shemesh khua miten, “Hi Topa, a thiangtho Pathian mai ah kua kaw a ding thei tuk? A lak uhah um tuk ngawlin ilai ah kuat tuk kam hung?” tin ti haw hi.
21 Kiriath Jearim khuapi ah mi hah haw in, “Filistin miten Topa i Thutiam Kuang cu kikleh haw hi. Hungsukin puato zazal un hi,” tin cah haw hi.