4
Thutiam Kuang Lonsak Haw
1 Mah hunin Filistin mite do tukin Israel mite cu thok haw hi. Israel ngalkap cu Ebenezer ah ngiak haw a, Filistin ngalkap cu Afek ah ngiak haw hi.
2 Filistin ten Israel mite tuah nase zetin, a dodun ceng haw ten Israel mite cu nehin, mi thawng li that haw hi.
3 A suakca mi ngalkapte cu a ngiahbuk a hen haw ten Israel mi puitu ten, “Ita Filistin tei neh tukin Pathian in bawl him? Pathian a lak uhah a hawh boknak tukin le ngal tei lak pen a suahcak theihnak tuk uhin hawh nung inna, Shiloh pen Topa i Thutiam Kuang cu la nung hi,” tin ti haw hi.
4 Mah hangin Shiloh ah mi hah haw in ha nei vancungmi pa nih laklawh khunnak hum a khung Humtabel Topa i Thutiam Kuang cu la haw hi. Mahlai in Eli capa pa nih Hofni le Finehas vang tel bok haw hi.Ref 4:4 Suah 25:22;
5 Thutiam Kuang a henpih haw ten Israel mite cu au leilui in, lei tian hing hi.
6 Mahtin a au haw cu Filistin miten a zak haw ten, “Hebru mite a ngiahbuk haw pen a au leilui haw cu ngai teh un! I a tih hawnak nen tim?” tin tidun haw hi. Topa i Thutiam Kuang cu Hebru mitei ngiahbukah heng zo hi tih a zak haw ten,
7 a thinsu haw in, “A ngiahbuk hawah pathian heng zo hi. Mah hangin oh cu lalthongta hung hi. Hi bang thu thei awng ma hung hi.
8 Hi bangin huham nei pathian tei khut sung pen akua in pan thei tuk him? Phillawn a Izipt a that khawngtu cu hi ngilote haw hi.
9 Filistin mite ngallingzet un! Pasal lungmu nei in do un. Mah ahimata a sal uh a hih haw bangin amu Hebru tei salin, cang tuk hung hi. Mah hangin ngalpha zetin do un!” tin Filistin mite cu au leilui haw hi.
10 Filistin miten ngalpha zetin, a do haw ten Israel mite cu sung haw in, a innlamah tai haw hi. Israel ngalkap thawng sawm thum thi haw hi.
11 Topa i Thutiam Kuang vang Filistin miten sut haw in, Eli i capa Hophni le Pinehas vang that haw hi.
Eli Thihnak
12 Ngal a dodunnak haw pen Benjamin hinnam mi pa khat cu Shiloh lamah tai in, mah ni-in heng hi. A khawngaih langtiknakin, a puan botkekin, a lu ah leivul zak hi.
13 Eli cu lam el khunnak humah lungmu tam zetin khung hi. Pathian Thutiam Kuang cu a ngaihsut ten helhkamzet hi. Mahlai in ngaltaipa in, khua sungah thuthanin khuasung mite cu thinsu in au leilui haw hi.
14 Mah thawmnging cu Eli in, a zak ten “I thawmnging kaw” tin dong hi. Ngaltaipa in manlang zetin Eli lakah thuthang hilh tukin tai hi.
15 Eli cu kum sawm kuah le kum liat hi zo in, khua mu lehma toh hi.
16 Ngaltaipa in, “Ngaldonak mun pen suakin, hi mun tian tai ing hi,” ti hi.
Eli in “I cang kaw, ka capa?” tin dong hi.
17 Mahpa in, “Filistin miten neh haw in, Israel mite cu tai khawng haw hi. Sung tatak ung hi. Mah hum pen na capa pa nih Hofni le Finehas vang thi haw hi. Pathian Thutiam Kuang vang sut haw,” tin hilh hi.
18 Mahti bangin Thutiam Kuang thu a hilh bek ten Eli cu kongka el a khunnak pen nunglamah lum hi. A tek leita i hum pen a thauzet taktoh cu a lupnak pen a ngawng ekin, thi hi. Eli cu Israel tei hotu in kum sawm li sung dek hi.
Finehas Zi Thi
19 Eli capa Finehas zi cu naupai in, a hin hun kim awn toh hi. Pathian Thutiam Kuang cu Filistin miten sut haw in, a tekpa Eli le a pasal Finehas thi haw tih a zak ten ngaihsut ngawlin a von na in nauhing hi.
20 Amah cu a nauhin natnak pen thi awnin, a um laihtakin, a bawmtu numei nu in, “Na thinsu pahsun; capano nei ci,” ti hi. Mahnaven Finehas zi in imah theileh ma toh hi. A don hei don ma toh.
21 A capa cu Ikhabod tin, a minsa hi, a sullam cu “Pathian i sunloihnakin Israel taisan hi,” tihnak hi. A hilh nuammi cu Pathian Thutiam Kuang a lonnak haw thu le a tekpa Eli le a pasal Finehas a thihnak haw thu hi.
22 “Pathian i Thutiam Kuang a lon haw hangin Pathian i sunloihnakin Israel cu zamsan zo hi” tin ti hi.