31
Saul le A Capa Tei Thihnak
(1Khang 10:1-12)
1 Filistin mi le Israel mite cu Gilboa mualah nase zetin dodun haw hi. Mahlai ah Israel mi tampi thi haw in, a tangmite cu Saul le a capate tuah tai khawng haw hi.
2 Filistin miten Saul le a capate cu pha in, a capa Jonathan, Abinadab le Malkhishua cu that haw hi.
3 Ngal cu nase dedeuhin, Saul cu thalcang tuah kha haw a, nase zetin liam hi.
4 Saul in, a hiamnam cawitu tangval pa i lakah, “Hi milimte a biatu Filistin tei zotsaknakin, a thah haw tuk sangin na ngalnam dawk inna, nangmah in that saw in,” ti hi. Mahnaven tangval pa in ngam ma hi. Mah hangin Saul in, a ngalnam muk hiam humah lumcihin thi hi.
5 Saul a thih cu tangval pa in, amuh ten a ngalnamin dawthumdun bokin, Saul lakah thi bok hi.
6 Saul le a capa pa thum le tangvalpa cu munkhatah thi haw hi. Mah ni-in Saul i mihingte cu thi khawng haw hi.
7 Jezreel kuam ngalkhat a ummi le Jordan ngun nisuahnak lam a um Israel miten, Israel ngalkapte tai khawngin, Saul le a capate vang thi khawng haw tih a zak haw ten a khua haw zamsanin tai khawng haw hi. Mahnung ten Filistin mite hungin, a khua luahtum haw hi.
8 A dodun ni a zingten a thi mitei hiamnam la tukin Filistin mite hawh haw in, Gilboa mual a hen haw ten Saul le a capa pa thum tei luang lum teptupin mu haw hi.
9 Saul i lu cu a talh ceng haw ten, a hiamnamte la haw hi. Mah thuthang cu a milim haw le mipi tei lak hilh tukin Filistin ngam, khua hempoh ah mi hah haw hi.
10 Saul i hiamnam cu Astarte pathiante a biaknak haw innah koihin, a luang cu Bethshan khuapi kulhtian humah tak haw hi.
11 Filistin ten Saul i luang a bawl daan haw Gilead ngam Jabesh khua miten a theih haw ten,
12 a lak haw pen ngalphabelte tulin zankhua Bethsha khua lamah hawh haw hi. Khua kulhtian hum pen Saul le a capa tei luang cu la in, Jabesh khua ah zawngin, mahlai ah mei tuah haal haw hi.
13 a nguh la in, a khuasung tum kung nuai ah vui in, ni salih sung ancang haw hi.