30
Amalek Mite Do Haw
1 Ni thumnakin David le a ngalkapte cu Ziglag khua heng haw hi. Amalek miten Judah ngam hanglam mawk cu la vanglakin, Ziglag khua vang la in, haal khawng haw hi.
2 Numei hempoh manin, kuamah that haw ma naven a venghawngin pui khawng haw hi.
3 David le a ngalkapte a hen haw ten a khua cu kang khawng zo in, a zi, a canute le a capate pui khawng zo haw hi.
4 David le a mihingte cu kapin, a tha haw bo in, a kah aw tul thei ngawl toh tianin kap haw hi.
5 David i zi Ahinoam le Abigail vang a pui mi haw lakah tel bok haw hi.Ref 30:5 1Sam 25:42-43;
6 David cu vansanglamin um hi. Itahim titale a mihing tei cate cu salin, a pui khawng haw hangin a thin na leita haw a, David cu suang tuah seh tum haw hi. Topa Pathian lak pen thazaang ngah hi.
7 David in Ahimelek i capa thiampi Abiathar lakah “Thiampi angki cualpi, a thiangthomi cu pia in hi,” tin a tih ten Abiathar in pia hi.Ref 30:7 1Sam 22:20-43;
8 David in Topa i lakah “Ka na neihmi longtute hi hil nang maw? Ka hil tale man nang maw?” tin dong hi.
Topa in, “Hil in hi; man inna, a pui haw mite vang pan tuk ci,” ti hi.
9 Mah hangin David cu a ngalkap za lukte tuah tulin, Besor Ngunah heng haw hi, mahlai ah mi khenkhat cu tang haw hi.
10 A mihing tei lak pen mi za nih cu cawl leita in; ngun a kaltan theih haw ngawl hangin tangta haw hi. David le a mihing za li ten hil ngut haw hi.
11 A mihing ten hampa lakah Izipt naupang pa khat khul haw in, David lakah hawhpihin, tui le an pia haw hi.
12 Thei ngah ko demno le sabitko bawk nih pia haw hi. A eih ceng ten a tamsawl pha hi. Ni thum sung imah ei ngawl le in ngawlin um hi.
13 David in, “Na bawipa akua kaw? Ilai pen hung nge cim?” tin dong hi.
“Izipt mi ing hi, Amalek mi pa i sal hi ing,” ti hi. “Ka dam ngawl hangin hilai ah ka bawipa in zam hi. A zamnak ni thum zo hi.
14 Kereth ngam hanglam mawk, Judah ngam hanglam mawk le Kaleb miphun tei ngamte longin, Ziglag khua vang haal khawng ung hi,” tin hilh hi.
15 David in, “Mahmi a longtu tei lakah hawhpih thei ni cim?” tin dong hi.
Naupang pa in, “That hihim tuk mang, na bawipa lakah vang pia tuk mang tin Pathian min salin thu na tiam tale hawhpih tung,” ti hi.
16 David cu hawhpih hi.
Amalek miten Filistia ngam le Judah ngam pen ngal van a lak haw mite cu tam ngangai a hih ten ai-in, zu le sa, in le ei in, puai bawlin mun dadangah um kek khawng haw hi.
17 David in zingtungno pepan taklam khuathim tian do hi. Tangval za li cu kalauk hum kungin tai ngah haw hi. Mahte sial ngawl cu pa khat hei suakca ngawlin that khawng haw hi.
18 Amalek mitei matmi le a lakmi haw hempoh ama zi pa nihte tuah pan ngah khawng hi.
19 Imah a paimi umma. A canu haw le capate hihen, a van haw hihen David in la kikleh khawng hi.
20 Tuu le khui vang ahon ahonin ngahleh khawng hi. A mihing ten a ngan cu mai ah khol pepel haw in “David ta hi,” tin au pepel haw hi.
21 David cu zui thei ngawltohin, Besor Ngunah tangta in, mihing za nih tei lakah David cu hengleh hi. Mah a mihing ten David le a ngalkapte cu muakin, David vangin amu lakah a hen ten lungdam zetin nuksat hi.
22 David amu lakah, “A hawh bok ngawl hangin thil a lak uh mite hi sem tukma hung. A zi le cate haw la in hawh haw tahen,” tin ti haw hi.
23 Mahnaven David in, “U le nau aw, Topa i piakmi na tei humah mah bangin bawl thei tukma uh ci. Amah in cingin, mi na sut thei tei humah nehnak ohte pia hi.
24 Na hilh uhmi cu kuamah in lungkim thei haw tukma hi. Kua hei hihen bang tenno in co ten tuk hi. Thil a zam uhmi lakah a tang vangin ngaldonakah a hawh mitei cozah lelengin co tuk,” ti hi.
25 David in daan bawlin Israel ngam sungah tu tianin, zui vawk haw hi.
26 David cu Ziglag ah a hen ten a ngal tei lak pen a lak haw mi na khenkhat cu Judah hotu, a ngualcam tei lakah kuatin, “ Topa i ngal tei lak pen ka lak uh van dawm laksawngin pia ung hi,” tin cah pepel hi.
27 Bethel a um, Judah ngam hanglam Ramah a um, Jattir peng khua a ummite,
28 Aroer khua, Sifmoth khua, Eshtemoa khua,
29 Rakal khua, Jerahmeel miphun tei khuate, Ken miphun tei khuate,
30 Hormah peng, Borashan peng le Athak peng le
31 Hebron ngamsung a um khuasungmi hempoh tei lakah kuat hi. Amah David le a mihing tei hennak khua hempoh kuat khawng hi.