SAMUEL
Laibu
(The Second Book of Samuel)
Thulamsial
Samuel pa nihnak hi Samuel pa khatnak tuah a pehzommi hi. Masa in, David kumpipa i ukmi ngam hanglam Judah ngam thu (a ngeng 1-4) le mah nungten Saklam Israel telin, a ngam pumpi i tangthu hi (a ngeng 5-24). David in, a uknak ngam a zal theihnak tukin le a khoh theihnak tukin ngamsung le ngam pualeu ah ngal a do kul hi. David cu Pathian nelah muantak ngangai mi le pum a pia un mi ngangai hi. A miphun hei in muansanzet haw hi. Mahnaven ama nuamnak le tumtahnak lawhtin theihnak tukin ama nuamin umin sualnak pha ngawlzet a bawl lehcet thu vang lang bok hi. Mahnaven profet Nathan in, a sualnak a phuan ten Pathian i piakmi haksatnak cu lungkim zetin thuak hi.
David i nunnak le a nadehnakin Israel tei lungmu a neh ngangai hangin kumpi tuk mun dang a zei haw ten ahi vangin amah bang tu tuk cu ama cikhaih sung mi leleng “David i capa hi tukin deih haw hi.
1
David In Saul Thih Thu Za
1 Saul i thih nungten David cu Amalek ngal a nehnak pen kikin, Ziglag khua ah ni nih um hi.
2 A zingten Saul ngiahbuk lam pen tangval pa khat heng hi. A thasiat langtiknakin, a puan botbalin, a lu ah leivul theh hi. David lakah upatnak pia in, a lu kun hi.
3 David in, “Ilai pen hung kam?” tin dong hi.
“Israel ngalkap tei ngiahbuk pen tai ing,” ti hi.
4 “Iti bang um kaw, hilh hemin,” tin David in ti hi.
Tangval pa in, “Israel ngalkap cu tai khawng haw in tamzet thi bok haw hi. Saul le a capa Jonathan vang that zo haw,” ti hi.
5 “Saul le Jonathan thi hi tin itin thei kam?” tin David in dong kik hi.
6 Tangval pa in, “Gilboa mualhumah um bok ing a, a ngal tei cipuhleng le cipuh ngalkap ten nek dedeuh haw in, Saul cu a ceipi lenin ding mu ing.Ref 1:6 1Sam 31:1-6; 1Khang 10:1-6;
7 Khua hek kawkawi in, keimah amuh ten sam hi. ‘Bawipa i kaw?’ tin ti ing.
8 ‘Akua nge cim?’ tin dongin, ‘Amalek mi ing,’ tin ti ing.
9 Mahten Saul in, ‘Nase zetin keimuh bawlsia zo haw a hih ten thi pal tung hi. Hung inna, keimah thatin,’ ti hi.
10 Mah hangin a umnakah hawhin that ing, itahim titale lum tukin, a lup bek ten thi leleng tuk hi, tih ka theih hang hi. A lu hum a kumpi lukhu le a baan a, butmi cu la in, atu na lakah keng ing hi, bawipa,” ti hi.
11 David cu a thasia in, a puan a botkek hangin a mihing hempoh vangin botkek bok haw hi.
12 A ang haw cumdun haw a, kapin, Topa i mihing Israel mi tampi ngal ten a thah haw hangin le Saul le Jonathan vang a paih thong haw hangin taklam tian an cangin um haw hi.
13 David in hi thu a hilhtu tangval pa cu, “Ilai lam mi nge cim?” tin dong hi.
“Amalek mi hi naveng na ngam sungah um ing hi,” tin don hi.
14 David in, “Ita Topa in kumpi in, a tenmi cu that ngam cim?” tin a tih ten,
15 a ngalkap pa khat samin, “Hi pa hi thatin hi,” tin thupia hi. Mah hangin ngalkap pa in Amalek tangvalpa cu sat humin that hi.
16 David in, “Na bawlmi cu thuakleh ci. Topa Pathian in kumpi in, a tenmi that ing hi tin na phuan hangin nangmah le nangmah na nunnak botik ci maw,” tin Amalek pa cu ti hi.
Saul le Jonathan Hangin David Kap
17 David in Saul le a capa Jonathan cu la tuah kahin,
18 mah la cu Judah mitei cun tukin thupia hi. Hi thih la hi Jashar tihmi laibu sungah ngan haw hi.Ref 1:18 Josh 10:13;
19 “Israel puitute aw,
na minthannak,
mualhum pen na thih uh cu!
Ngalpha cuang tei
caksuk ni-in cangta hi.
20 Gath khua ah hilh pahsun.
Ashkelon lampi ah
phuang pahsun;
Filistin numei a lung haw
dam sual tuk;
dawibia canute
a lungkim leita kha haw tuk;
21 Maw Gilboa mual, na humah
nguah le daita pahsuh hen,
Na lei ngam cu ko le
kolh khawngin an kung
imah po ma toh hen!
Itahim titale ngalpha tei
ngal lumphaw cu muatin,
Saul i ngal lumphaw cu
salkai khawng hi.
22 Jonathan i thalcang cu
mual nazet hi,
Saul i ngalnam cu mi hehpihnak
nei ma hi.
Mi ngilzet hei thitikin, ngalte vang
23 “Saul le Jonathan,
na ihdunnak uh cu
lamdangzet hi;
Nunnak lang khat uh ci,
thihnak hei ah
lang khat uh ci;
Muvanlai sangin manlang
saw deuh uh ci.
Kiosa sangin cak deuh uh ci.
24 “Israel numeite aw,
Saul cu kah un;
Puan san liailuai a silhtiktu hi.
Na manpha le sui tuah
25 Ngalpha ngalphate caksuk zo haw,
ngaldonakah that hawta,
Jonathan cu mualhumah
26 Maw ka unau Jonathan na ca in
ka lungsia, ka ca in
iti zahta in deihawh cim!
Na ihnak cu izahin
thasiah huai him,
numei tei itnak sangin
27 “Mi Ngalpha pa caksuk thong sisi!
a hiamnamte vang
pai lalthong khawng zo,”
tin kah hi.