29
Filistin Ten David Lawl Haw
1 Filistin miten a ngalkapte cu Afek ah khawm haw in, Israel mite cu Jezreel Munlawn ciktui elah ngiahbuk sam haw hi.
2 Filistin bawipa nga cu a ngalkap za khat hon le thawng khat honte tuah mailamah hawh zuzut haw in, David le a ngalkap ten nunglam pen Akhish tuah zui haw hi.
3 Filistin ngalbawi ten, “Hih Hebru mite hilai ah ikaw a bawlbok haw?” tin dong haw hi.
Akhish in, “Hi pa hi Israel kumpi Saul i ngalbawi David hi. Ka lakah a umnak ngeithim toh hi. Ka lak a hen pat pepan tuni tian thil sual a bawl imah mu mang,” ti hi.
4 Mahnaven Filistin ngalbawi cu thinukin, Akhish lakah “Hi pa hi, na piakmi khua ah kiklehtikin hi. A lak uhah hawhtik hihim pahsun. Itahim titale ngal a do uhten eimuh siatsuahtu eimu ngalin cang sual kha tuk hi. A bawipa tuah a lemdun lehnak tukin a ngalkap tei lu bonak cu ama ca in lampi phabel hi!
5 Thungai in titale, numei tei lam thahin, ‘Saul in, a za, a zain that; David in, a thawng athawngin that; tin la a phuah haw mi pa cu amah David hihi si!’ ” tin ti haw hi.Ref 29:5 1Sam 18:7; 21:11;
6 Akhish in David cu samin, a lakah, “A nungmi Topa min salin, hilh ing hi; ka ca in muantak ngangai hi ci. Ka lakah hawhin, ngal na do bok ahin deihzet ing. Ka lakah na hen pat pepan na sualnak mu ma laih ing. Mahnaven Filistin bawi dang ten deih haw ma hi.
7 Mah hangin mengdenin kik inna, a thinuknak haw tukin imah bawl pahsun,” ti hi.
8 David in, “I bawl sual ing kaw? Na lakah hungin, na ka deh pepanin, bawipa ka mawhnak imah mu ma ci. Ita ka bawipa le ka kumpi nangmah tuah hawh tukma kam ing? Ita na ngalte do ngawlin kik thong tung kaw?” tin el hi.
9 Akhish in, “David nang cu Pathian vancungmi bangin, son bang ngawlmi ci, tih cu thei ing. Filistin ngalbawi ten ngaldonakah ka lak uh hawh pahsuh hen tin ti zo haw hi.
10 Mah hangin Saul kumpipa zamin, ka lakah na hunpih hempoh na venghawng uhin zing khuavak bek ten kikleh tuk uh ci,” ti hi.
11 Mah hangin David le a mihingte Filistin ngamah kik tukin a zingten zingtungno in tul haw hi. Filistin ngalkapte cu Jezreel lamah hawh haw hi.