28
1 Hun a ngei deuh ten Filistin mite cu Israel do tukin a ngalkapte khawm haw hi. David cu Akhish in “Nangmah le na ngalkapte ka lamah tangin Israel do tuk uh ci maw?” tin dong hi.
2 David in, “Na salpa ka hih tak ka thil tihtheih zia zo pah ni ci,” ti hi. Akhish in, “Pha ei! Kumkhua keimah cingtu in bawl tung,” ti hi.
Saul In Kungkhaitu Leng
3 Samuel a thih ten Israel mi hempohin kahin, ama khua Ramah ah vui haw hi. Israel ngamsung pen khutlam zothiam le pol hempoh cu Saul kumpipa in hawlvawk khawng hi.Ref 28:3 Thiam 20:27; Daan 18:10-11; 1Sam 25:1;
4 Filistin ngalkapte cu khawmdunin Shunem khua el ngiahbukah cam haw hi. Israel ngalkapte cu Saul in samkhawmin, Gilboa mualhum ngiahbukah cam haw hi.
5 Saul in, Filistin ngalkapte amuh ten a thinsu ngangai hi.
6 Mah hangin Saul in, Topa dong hi. Topa in manglam pen hihen, Urim le Thummim zohnak pen hihen, profet hei in hihen donlehnak nei hihim ma hi.Ref 28:6 Mipum 27:21;
7 Saul in, a khutnuai bawite cu, “Kungkhainak tukin numei pa khat mipol zei sak un hi,” tin thupia hi.
“Endor khua ah pa khat um hi,” tin ti haw hi.
8 Mah hangin Saul cu midang bangin bawldunin, puan phun dang silhin, a mihing pa nih tuah mah numei nu i lakah khuathim nungten hawh haw hi. Saul in, “A thisa tei hawvang samsakin,” ti hi.
9 Mahnaven numei nu in, “Israel ngamsung pen Saul kumpi i khutlam zothiamte le pol hempoh hawlvawk khawng hi tih cu thei ci. Ita mipol ka hihnak hi thei in that haw hen tin, zol tum cim?” tin ti hi.
10 Saul in thutepnak bawlin, “A nungmi Topa i min salin tiam ing hi; hi mithi tei hawvang hangin that hihim tuk mang hi,” ti hi.
11 Numei nu in, “Akua kaw ka sam sak tuk?” tin dong hi.
“Samuel samin,” tin Saul in ti hi.
12 Numei nu in, Samuel amuh ten au kio in um hi. “Ita kei zol kam Saul kumpipa hi ci,” ti hi.
13 Saul in, “Lau pahsun, i kaw na muh?” tin dong hi. Numei nun, “Leisung pen mithi hawvang a tul mu ing,” ti hi.
14 “Iti bang kaw? tin Saul in dong hi.”
“A tulmi cu putekpa hi. Angki cualpi silh hi,” tin numei nu in ti hi.
Samuel hi tih cu Saul in, a theih ten upatnakin lei ah kun hi.
15 Samuel in Saul cu, “Ita kei noksak li kam? Ita kiklehtik cim?” tin dong hi.
Saul in, “Vansangzet ing. Filistin miten do haw in, Pathian in kei nunghek zo hi. Ka thudot mite hilh kikleh ma hi. Profet in hihen, manglamin, theilehtik hihim ma hi. Mah hangin i kaw ka bawl tuk? tih hilhtu tukin nangmah sam ing,” ti hi.
16 Samuel in, “Ita Pathian i nunghek nungten le na ngalin, a can nungten kei sam li cim?
17 Topa in ka lak pen a hilhmi cu na humah kimtik zo hi, na ngam uknak cu na lak pen la in, David pia zo hi.Ref 28:17 1Sam 15:28;
18 Topa i thupiakmi zui ngawlin Amalek mite le a neih haw venghawngin siatsuah khawng ma ci. Mah hangin Topa in hi bangin bawl hi.Ref 28:18 1Sam 15:3-9;
19 Nangmah le Israel mite cu Topa in Filistin mitei khut sungah pia tuk hi. Zingten nangmah le na capate cu ka lakah hung tuk toh uh ci. Israel ngalkapte cu Topa in Filistin mitei khut sungah pia khawng tuk,” ti hi.
20 Samuel i hilhmi thu cu a lau leita hangin Saul cu lei ah lum hi. Sun le zanin imah a eih ngawl hangin Saul cu tamsawlin tha nei ma hi.
21 Pol nu cu Saul i lupnakah zuanin, a thinsuzet hi tih amuh hangin a lakah, “Sazapa, ka nunnak hei ngaisung ngawlin na hilhmi cu bawl ing.
22 Mah hangin tu ka hilhmi hi bawl zalin hi. Na ca in, an bawlsak nang. Ei inna, na lampi hawhnakah tha nei deuh tuk ci,” ti hi.
23 Saul in ei nuam ma hi; imah ei tuk mang, ti hi. Mahnaven a khutnuai bawite vangin ei tukin a tiklo haw ten a thu haw cu zui hi. Lei pen tho in zaunak humah khung hi.
24 Numei nu in thau hen tin, a cawm lihmi khuino pa khat manlangin ngo hi. Sangvut la in, a cop ceng ten naman tel ngawl cangho bawl hi.
25 Saul le a khutnuai bawi tei mai ah an lui in, ei haw hi. Mah ni takin kikleh haw hi.