27
Filistin Mitei Lakah David Heng
1 David cu a lungmuno in, “Ni kha khat ten Saul in, keimah thatleh tuk hi. Ka ca in, Filistin ngamah tai tuk sial ngawl lampi pha dang umma hi. Mah bangin ka tai tale Israel ngam sungah Saul in zei ngawltohin him tung hi,” tin ngaisung hi.
2 Mah hangin David le a ngalkap za luk cu manlang zetin Gath kumpi Akhish, Maok i capa lakah hawh hi.
3 David le a ngalkapte cu a innkuate tuah Gath ngamah um haw hi. David cu zi pa nih nei hi. Jezreel khua mi Ahinoam le Carmel khua mi Nabal i thihsanmi Abigail hi.
4 David cu Gath ngamah tai zo tih Saul in, a zak ten David zei tuk tum ma toh hi.
5 David in Akhish lakah “Keimah hi na ngualcam ngangai in, na ngaisung tale ka umnak tukin khua pa khat pia bokin hi. Kumpipa nangmah tuah na khuapi sungah umlangkhat tuk cu mawi sapma,” ti hi.
6 Akhish in David cu Ziklag a tih haw khua pia hi. Mah khan pepanin Ziglag khua cu Judah kumpi ta hi leleng hi.
7 Filistin ngamah David cu kum khat le ha li um hi.
8 David le a mihing ten mah ngamsung a, kum tampi um zo mi Geshur mi, Girzi mi le Amalek mite cu do mek haw hi. Izipt ngam heng tianin sut mek haw in,
9 numei hihen, pano hihen, that khawng mek haw hi. A tuu haw, a khui haw, a laak haw le a kalauk haw la in, a puan haw tianin sut khawng haw hi. Akhish lakah a henkik ten
10 Akhish in, “Tu tum ilai ngam sim kam?” tin, a dot ten David in Judah ngam hanglam mawkah hawh ing tin, a son hun um, mah ma tale Jerahmeel in miphun ngamah hawh ing tin, a son hun um, mah ma tale Ken mitei umnak ngamah hawh ing tin, a son hun um mek hi.
11 David in numei hihen, pano hihen that khawng mek a, Gath ngamah hawhin, David a ngalkap tei thil bawlmi hilhtu tukin mi um lehcet haw ma hi. Filistin ngamah a um sung hempoh David in mah ti bangin bawl mek hi.
12 Mahnaven Akhish in, David cu a muanzet hangin a lungmu sungno in, “A mihing Israel miten a huat leita haw hangin a nun sung hempoh ah ka nadekin um tuk poh hi,” tin ngaisung hi.