26
David In Saul Nunnak Khawih Leh
1 Gibeah khua Saul lakah Zif khua mi khenkhatte hung haw in, Judea ngamkhing el mual pa khat Hakhilah mualah David cu ngelh hi, tin hilh haw hi.Ref 26:1 Saam 54 (Thulu).
2 Thakhatin Saul cu Israel ngalkap lak pen a phabel ngalkap thawng thum tuah Zif ah David zei tukin hawh haw hi.
3 Hakhilah mualkainak lampi ah Saul cu ngiak hi. Mah ngamkhingah David a umlaihin, amah zei in Saul hung hi, tih a zak ten,
4 David cu vilvengtu hahin, Saul cu um ngangai hi tih thei hi.
5 David cu hawhin, Saul le a ngalkapte uktu Nerih capa Abner i zaunak mun loli cu ciang zetin zo hi. Saul cu a ngiahnak haw laizangah zau in, a ngalkapte cu a elkimah ngiak haw hi.
6 David in, “Keimah tuah Saul ngiahbukah akua kaw a hawh tuk? tin Hit mi, Ahimelek le Joab i unau Zeruiah i capa Abishai cu dong hi.
“Keimah hawh tung hi,” tin Abishai in ti hi.
7 Mah zan cu David le Abishai cu Saul i ngiahbuk laizang hawah Saul a zau cu mu haw hi. A lu elah a ceipi lei ah phutin, mu haw hi. Saul i elkimah Abner le a ngalkapte hihbu khawng haw hi.
8 Abishai in, “Atu-in Pathian in, na ngal cu na khut sungah pia hi. A ma ceipi lala in lei ah paihlet veu in sunlet nangin vei khat sutin, tawk tuk poh hi, vei nih kul hihim tukma poh,” tin David cu ti hi.
9 Mahnaven David in, “A humah siatnak hengtik hihim pahsuh; Topa i sathau a thihmi kumpi humah siatnak a hengtiktu cu bawlsiatnak thuak ngawlin um haw tukma hi.
10 Ama thih hunkimin thi tukin, ahimata ngaldonakah thi tukin Topa in Saul cu a nunnak botik tuk poh hi, tih cu a nungmi Topa i min salin hilh ngam ing.
11 Pathian in kumpi in, a dehtikmi hum a siatnak a hengtiktu cu Topa Pathian in kei phal zal pahsuh hen. A ceipi le a tuithawl la nung inna, hawh nung,” ti hi.Ref 26:11 1Sam 24:6;
12 David in Saul lu bul a, ummi ceipi le tuithawl cu la in Abishai tuah hawh haw hi. Kuamah in mu haw ngawlin thei hei thei haw ma hi. A khanglo hei um haw ma hi. Itahim titale Topa in, a venghawng haw in hihbu ci zetin hihbuhtik hangin hi.
13 David cu khawla thim hawhin, ngalkhat lam mualhum a hen ten,
14 “Maw Abner! Ka aw za thei cim?” tin Abner le Saul i ngalkapte cu sam hi.
“Hi bangin kumpipa auhsan litu akua him?” tin Abner in dong hi.
15 David in, “Pasal cangpi hi ma cim maw? Israel mi lak pen mi nasebel hi ma cim? Mahnaven ita kumpipa na bawipa phano in cing ngawl cim? Na bawipa that tukin tuno in, a ngiahnak uhah mi tum hi.
16 Abner, na dehvo neh ma ci! A nungmi Topa i minsalin hilh ing hi; thi tak hi ci; na venghawng uhin thi tak uh ci. Itahim titale Topa Pathian in kumpi in, a cantikmi na bawipa uh cu komno in cing ma uh ci,” ti hi.
17 David i aw le ngetnak cu Saul in zain, “Ka capa David, nangmah nei pah ci?” ti hi.
David in, “Maw kumpi pa, keimah pah ing cuh.
18 Bawipa, ita kei na salpa hi hil li laih cim? Iti bang sualnak ka bawl hangin kaw hi bangin kei na hil lih?
19 Kumpipa aw, ka thu hilhmi hi ngai hihin hi. Hiti bangin kei ngalin, na bawl hi Topa Pathian in, a tikmi ahi tale biakpiaknak pia a hin, a lungmu kiam men tuk hi. Mahnaven mihing tei sohnak thong ahi tale Topa i tamsiatnak cu a hum hawah heng zal tahen. Itahim titale ngamdang pathian tian bia tukin kei hawlvawk ci a, Topa in, a miphun lakah a piakmi ngam sungah kei ma covo hempoh cu sung khawng zo ing.
20 Topa Pathian i um ngawlnak, miphun dang tei ngam sungah ka thisan cu luangtik zal pahsun hi. Ita uili bang thong kei hi Israel kumpi in that tukin a zei lih? Hampalak vano bangin kei a vai lih?” tin ti hi.
21 Saul in, “Sual zo ing. David ka capa kiklehin hi. Tu ni ka nunnak na khawih hangin nangmah siatsuah tuk cu tum hihim tukma toh ing. Sual ngangai ing. Thil ti sual zo ing hi,” tin David lakah ti hi.
22 David in, “Maw, kumpi pa, na ceipi cu hilai ah um hi. Na mihing pa kha khat hah inna, latikin hi.
23 Topa in midik le muansan tak mihing cu a thaman pia hi. Nangmah cu tuni in, Topa in ka khut sungah koih hi. Mahnaven Topa i sathau thihmi na hih hangin na humah imah bawl mang.
24 Na nunnak sunglawitikin tuni in, ka khawih bangin Topa in ka nunnak cu sunglawitikin khawih bok zal henna, haksat le cimkhamnak pen luattik zal hen,” tin ti hi.
25 Saul in, “Pathian in muicu pia zal hen, ka capa. Thil nasezette bawlin, na bawlmi hempoh ah lawhtingtik tahen,” ti hi. Mahnung ten David cu hawhin Saul cu innah pin hi.