25
Samuel Thihnak
1 Samuel cu thi in, Israel mi hempoh hungin, kah haw hi. Ramah khua a innah vui haw hi.
David le Abigail
Mahnung ten David cu Paran ngamkhing munah hawh hi.
2-3 Maon khua ah Kaleb miphun Nabal a tihmi pa umin amah cu a pum cawmnak zei in, Carmel khua ah lo ngam nei hi, hau zetin tuu thawng thum le keel thawng khat nei hi. A zi min cu Abigail hi in, diang sih, cimsih hi. Mahnaven a pasal Nabal cu lungmu siasuak le micokal thei hi. Nabal cu Carmel khua ah a tuumul met hi.
4 Ngamkhing a umnak mun pen mah thu cu David in za hi.
5 Mah hangin a mihing sawm khatte cu Carmel khua hawh tukin le Nabal tawk tukin hah hi.
6 Hi bangin son tukin cah hi, “Nangmah le na innkua pih le na neihmi hempoh humah muicu um tahen, tin David in thunget sak hi.
7 Carmel khua ah na tuu tei mulmet ci tih cu David in za hi. Na tuucingte cu keimu lakah um leleng haw in pa khat hei ka liamsuah uh ngawlnak thu hi na theih tukin deih ing. Carmel khua ah a um sung hempoh haw in, a na haw imah pai awng ma hi.
8 A muhte hi dong inna, hilhcian haw tuk hi. Carmel khua a, puai ni ah hung tuk ung a, David in, a mihingte komno in, zohsak tukin ngen hi. Na ngualcam pha David ca in le na salte keimuh tei ca in, na piak thei zazahin pia zalin hi, ti un,” ti hi.
David le Abigail
9 David i thucahmi cu Nabal lakah David mihing ten hilhin, ngak haw hi.
10 Nabal in, “David ti uh cim? David cu akua kaw? Jesse capa cu akua him? Ka theih awngmi hi ma si. Atu khan cu ka ngam uhahin, a taivai sal tampi um haw hi.
11 Ka cangho le ka tui le ka tuumul mettu tei ca in ka ngawhmi ngannung cikte cu ilai pen hung haw him tih mah theih ngawlmi lakah pia hihim tuk mang,” ti hi.
12 David i mihingte cu manlang zetin kikleh haw in, David lakah Nabal i otmi cu hilh haw hi.
13 David in, “Na venghawngin, na ngalnam uh pua khawng un,” ti in pua khawng haw hi. Amah David vangin a ngalnam pua in, a mihing za li tuah hawh haw hi. A mihing za nih ten a vante cing haw hi.
14 Nabal i umlawhpa khat pa in Nabal i zi Abigail lakah, “Za toh cim? David in hampa lak a umnak pen a bawipa uh lakah mi hahin, thil dawm pia tukin ngen haw hi. Mahnaven a bawipa uhin liatzan hi.
15 A ngangai titale amuh cu eimu humah phazet haw hi. Ituk hei in ohte zawnsak awng haw ma hi. Hampalak a, amu lakah a um sung hempohin, a thil uh pai awng ma hi.
16 Amuh tuah a um sung uh, a tuute phano cingin, a sun a zanin, keimuh hup haw hi.
17 Mah a hih hangin hithu hi iti bawl tuk tih phano in ngaisungin hi. A bawipa uh le a innkua ca in, a poi theizet tukmi thu hi. Amah a bawipa uh cu lungmu pha ngawlzet le kuamah i thu hei ngai nuam ma,” ti hi.
18 Mahbek ten Abigail in cangho zawl za nih le sabittui savun thawl nih, a pumin kio mi tuu pa nga, cangphan bawm nih, sabit ngah pho ko bawk za khat le thei ngah pho lom za nihte cu manlang zetin la khawmin, laakte puatik hi.
19 a umlawh tei lakah, “Mai ah hawh unna, zui tung,” ti hi. Mahnaven a pasal lakah imah hilh ma hi.
20 Abigail cu a laak humah khungin, mualhum zin kawinak a hen kek ten, upmawh ngawlpi in David le a ngalkapte ama lamah a hung tuah tawkdun lok haw hi.
21 Mahlai takin, David in, a lungmuno in, “Ita hi hampa lakah Nabal i neihmi cinkhawi sak ngelcel ing kaw? A na pa khat hei pai awng ma, mahnaven hi zah ka bopnak humah a lulhleh dan hi mawi ma leita hi.
22 Zingten a innkua hawngin pa khat hei tang ngawl ka that khawng ma tale Pathian in keimah hi that saw hen,” tin ngaisung hi.
23 David a muh bek ten Abigail cu a laak hum pen tolhin, David i kebul lei ah bokin,
24 “Bawipa, ka ot hi ngai hih zalin hi. Mawhsiatnak cu keimah in thuak tung.
25 Imah nemcuamnak nei ngawl pa Nabal i thu cu imah simsial sak pahsun. Amah cu a min Nabal a hih bangkekin mi tuah a lem thei ngawlmi hi. Bawipa, mi na hahmite cu kei in tawk mang hi.
26 Na ngal tei humah phu laknak imah bawl ngawlin le na ngalte that ngawlin, na um mek theihnak cu Topa Pathian in, a cin hangin hi. Na ngalte le nangmah siatsuah a nuam mite cu Nabal bangin bawlsia hi haw tuk hi, tin, a nungmi Topa i minin thutiam ngam ing.
27 Na hehpihnak, bawipa, ka puakmi laksawng hi sang zazal inna, na mihingte vang pia zalin hi.
28 Ka tih sualmi a um sual vangin ngaithiam zalin hi. Na nun sung hempohin thilpha ngawl cu bawl tukma ci. Topa i ngalte na do pepel hangin Pathian amah in kumpi in bawlin, na casuan tianin, kumpi in bawl tuk hi.
29 Mi pa kha khatin do in, thah a tum hei in mihing ten a sum le pai a cin haw bangin, Topa na Pathian in himno in cingkhawi tuk hi. Mahnaven mi pa khatin sailum cu pai na hen tin, a saivawk bang bok inna, ngalte cu Topa Pathian in vawk tuk hi.
30 A tepsa bangin Topa Pathian in, na humah a pha mi na hempoh kimno in, a hentik hun ten le Israel kumpi in, a bawl ten,
31 a thu um ngawlin mi thah le phulaknak hangin khawngaih tuk le sihleh tuk cu maw, bawipa imah nei tukma ci. Mah bangin Topa Pathian in muicu a piak ten, bawipa kei hi phawkngil zal pahsun hi,” tin Abigail in lem hi.
32 David in, “Keimah tawk tukin tuni in, nangmah a hahtu Israel Pathian Topa cu thangphat hi tahen.
33 Laithahnak le phulaknak pen luattiktu tukin tuni a na bawlmi le lungmu na neihmi hangin Pathian cu pahcawi in thangphatin hi.
34 Topa cu nangmah liamsuah ngawlin a cingtu hi. Manlang zetin, na tawk ngawlta a hin zingten Nabal le a innkua pihte cu cimittik khawng tukin a nungmi Topa Israel Pathian minin thutiam zo ing hi,” tin Abigail cu ti hi.
35 Abigail i kenmi thil cu David in sangin, “Na innah pin inna, na ngaihsut hakin um pahsun. Na ngetmi cu bawl khawng tung hi,” tin Abigail cu ti hi.
36 Abigail cu innah pin hi. A pasal Nabal cu a innah kumpipa i eih tukin a uk zetmi anmeh pha huanin an vaknak puai a bawl laihtak hi. A pasal cu zu kham cu nop zetin, a um laihtak a hih hangin Abigail in, a zingtianin, imah thu hilh ma hi.
37 A cihleh nungten thu cu komno in sonpih hi. Mah thu a zak bek ten Nabal cu a thinsu lok a, a lungsilin, zengnat thuakin umta hi.
38 Ni sawm nungten Topa in bet thuahin, Nabal cu thi hi.
39 Nabal i thih cu David in, a zak ten, “Pathian cu thangphatin um tahen. Nabal in kei a zawnsak hangin a humah Topa in phula in, kei a salpa hi thilpha ngawl bawl tuk luattik hi. Nabal cu mipha ngawl a hih hangin Topa in cawh zo,” ti hi.
David in Abigail dong tukin mi hah hi.
40 A umlawhte cu Carmel a, Abigail lakah hawh haw in, “David i zi pui tukin na lakah hah hi,” tin ti haw hi.
41 Abigail cu lu kunin, “Keimah cu a salnu ka hih tak a sal tei ke somtu tuk poh ing,” ti hi.
42 tho vutin, a laak humah khung hi. A umlawh numei pa nga ten zui in, David i umlawhte tuah hawh haw hi. Abigail cu David zi in cang hi.
43 Jezreel khua a, Ahinoam cu David in huai zo in, Abigail cu zi pa nihnak hi.
44 David i huai mi Saul i canu Mikhal cu a pa Saul in pasal dang neitik hi. A pasal min cu Gallim khua mi Laish i capa Palti hi.Ref 25:44 2Sam 3:14-16;