21
Saul Lak Pen David Tai
1 David cu Nob khua thiampi Ahimelek lakah hawhin, Ahimelek in thinsu zetin muakin, “Ita nangmah bek hung nge cim?” ti hi.Ref 21:1-6 Mt 12:3-4; Mk 2:25-26; Lk 6:3;
2 David in, “Kumpipa in nadeh a cial hangin hung ing. A hilhmi thu cu kuama lakah son tuk ngawlin tiam hi. Ka ngalkapte cu mun kha khatah tawk tukin tiam ing.
3 Atu-in eih tuk i nei nge cim? Cangho zawl nga ahimata na neihmi pawpoh pia in hi,” tin ngen hi.
4 Thiampi pa in, “Cangho thawthong, nei mang. Ka neihmi cu cangho thiangtho hi. Na ngalkap ten tu nai in, numei a phial haw ma tale cu ei thei haw tuk poh,” ti hi.
5 David in, “Numei phial hihim haw ma. Numei hihim ka lak uhah umma hi. Thupi um sap ngawlin khual ka zin uh hei ten ka ngalkapte cu thiangtho zetin um leleng haw hi. Tuni cu nadeh thupi ka neih uh hangin ciang cuangin um haw,” ti hi.
6 Mah hangin thiampi Ahimelek in David cu cangho thiangtho pia hi, itahim titale a neihmi cangho cu Pathian ca tukin luihmi cangho bek hi a, cabuai thiangtho pen a lak zo haw mi, a ai-in cangho a thakte a koihleh zo haw mi, cangho hi.Ref 21:6 Thiam 24:5-9;
7 Edom mi Doeg cu Pathian bia in mahlai munah um ngelcel bok hi. Doeg cu Saul kumpi i tuucingtu tei hotu hi.
8 David in Ahimelek lakah, “Keimah piak tukin ceipi ahimata nam bek nei cim? Kumpipa in manlang zetin thu a piak hangin hiamnam imah la man mang,” ti hi.
9 Ahimelek in, “Elah munlawn a na thahmi Filistin mi Goliath i ngalnam nei ing. Thiampi angki cualpi limah puan tuah tuamin, um leng hi. Hilai ah mahmi bek hiamnam um hi, na deih tale la in,” ti hi.
“David in, hi bang hiamnam pha cu imah lai hei ah umma hi; keimah pia in hi!” ti hi.Ref 21:9 1Sam 17:51;
10 David cu hawhleh hi. Saul i muh theihngawlnakah hawhin, Gath ngam kumpi Akhish lakah heng hi.
11 Gath ngam a bawi ten a kumpi Akhish lakah “Hi pa hi ama ngam a kumpi David hi ma maw? ‘Saul in, a za, a zain that, David in, a thawng athawngin that hi, tin numeite lam thahin la in, a phuahmi pa cu amah hihi,’ ” tin ti haw hi.Ref 21:11 1Sam 18:7; 29:5;
12 A awn haw cu David in, a zak khawng hangin Gath kumpi Akhish cu David in lauzet hi.Ref 21:12 Saam 56 (Thulu).
13 Mah hangin a venghawng haw muhin, sil hem hi. A mai hawah a umdan dangin, umhemin, a khua a kongka humah thupi ngawlte nganin, a cilte cu a khamulah luang kiaikuaitik hi.Ref 21:13 Saam 34 (Thulu).
14 Mah hangin Akhish in, a khutnuai bawi tei lakah, “Hi pa hi a sil si, ita ka lakah hunpih kam uh ci?
15 Misil tingsamzet ing tin maw na ngaihsut uh? Ka innsung nawngkaitik tukin ita hi misil pa hunpih kam uh ci?” tin ti hi.