20
Jonathan In David Bawm
1 David cu Ramah khua el Naioth khua pen tai in, Jonathan lakah a henkikleh ten a lakah, “I sualnak kaw ka bawl? I mawhnak kaw ka neih? Na pa i humah i thilsia ka bawl hangin kei that tum him?” tin ti hi.
2 Jonathan in, “Pathian in, na thih tuk cu phal zal pahsuh hen. Ka pa in, a bawlmi hempoh cu thupi hihen, thu neu hihen, keimah hilh khawng leleng hi. Nangmah thah tum ahi ahin im tukma hi. Hilh tuk,” ti hi.
3 Mahnaven David in, “Nangmah in keimah hi iti zahta in deih cim tih cu na pa in, a theih hangin a tumtahmi cu na lungmu natik tuk hi tih a lau hangin, na lakah hilh tum ngawl hi tuk hi. Ka thihnak tukin kal khat bek sam hi tih cu Topa i minin tiam ngam ing.”
4 Jonathan in, “Na bawltik nuammi hempoh bawl tung,” ti hi.
5 David in, “Zingten Ha Thak Puai,” a hih hangin kumpipa i lakah an ei tung hi. Mahnaven na lung a kim bok tale hampa lakah hawh nang inna, zinglawi taklam tianin ngelh tung hi.Ref 20:5 Mipum 28:11;
6 An eih hunin, ka um ngawl ten na pa in, a dong tale Bethlehem a innah manlang zetin pinta hi; itahim titale a innkua haw in, kum sial a bawl haw mi biakpiaknak bawl hun hi, mah hangin keimah hilhta hi, tin ti in hi.
7 Na pa in, “Pha hi, a titale lau tuk imah umma hi. Mahnaven a thin a uk tale keimah siatsuah tum loli hi tih cu thei tuk ci.
8 Keimah hehpih zal inna, ka lakah Pathian min salin, thutiam na bawlmi cu zui zazalin hi. Mahnaven keimah lehlam ka sual tale nangmah saw in keimah thatin hi. Ita na pa i khutin thi tuk kam ing?” tin ti hi.
9 Jonathan in, “Mahti bangin ngaisung pahsun. Ka pa in that tum ngangai hi tih ka thei ciang ahi tale itin kaw nangmah hilh ngawlin ka um thei tuk?” tin ti hi.
10 David in, “Na pa thinukzet hi tih cu akua in keimah hilhleh tuk kaw?” tin Jonathan cu dong hi.
11 “Hampa lakah hawh nung,” tin Jonathan in zawm hi. Mah hangin hampa lakah hawh haw hi.
12 David lakah Jonathan in, “Israel i Topa Pathian cu a theihpihtu hi zal tahen. Zing le a lawi tubang hunin, ka pa cu thu dong tung hi. A lungmu na humah a pha ahi tale thu theilehtik tung hi.
13 Siatsuah a tum tale theilehtik tung a, na tai in hi. Theitik ngawlin siatsuahnak na tawk ahi tale Pathian in keimah that hen. Ka pa i lakah Topa a um bangin na humah um zal bok hen.
14 Ka nung hih laih ahi tale na thutepmi khotikin hi. Mahnaven ka thi ahi tale,
15 ka ca in muantak hi zalin hi. A kumkhua in ka innkuapih tei lakah na hehpihnak hu langtik zalin hi. Topa in, na ngal hempoh a cimihtik khawng hei ten,Ref 20:15 1Sam 9:1;
16 a thutepnak uh cu itik mah ten cat pahsuh hen. A cat ahi tale Topa in nangmah mawhsiat tuk,” ti hi.
17 Jonathan in David cu a itnak thutiam leleu hi. Itahim titale amah le mah a it bang loli in Jonathan in David cu it hi.
18 Jonathan in zingten Ha Thak Puai hi, na tel ma tale na khunnak tong tuk a, na um ngawl lang dedeuh tuk hi.
19 Na tel ngawl cu zinglawi ten lang dedeuh tuk hi. Mah hangin nung a, na ngelhnak munah hawhleh inna, mahlai suangtian limah ngelhin hi.
20 Muisong bangin mahlai mun cu thalcang pa thumin kap tung hi.
21 thalcang zei tukin ka umlawhpa hah tung hi. A lakah, “Thalcangte cu na umnak pen hilai lamah um hi, la in hi” ka tih tale na ca in lau tuk umma hi. Tul thei ci tihnak hi tuk hi. Lau tuk umma tih cu Topa i minin hilh ing.
22 Mahnaven a lakah, ‘Thalcangte cu na umnak pen langkhat lamah um hi,’ ka titale tai in hi. Topa in mundangah hawh tukin deih tihnak hi.
23 A laklawh uhah thutepnak a bawlmi thu ah kumkhua in ka khotiknak tukin Topa in kimtik tuk,” ti hi.
24 Mah hangin David cu hampa lakah ngelh hi. Ha Thak Puai an eihnakah Saul kumpipa cu tumin,
25 a khunmeknak pang elah khung hi. A sangtu ah Abner khungin Jonathan cu cabuai langkhat lam mawk, Saul i mai ah khung hi. David khunnak cuh hi.
26 Mahnaven mah ni cu Saul in imah hilh ma hi, itahim titale, “A thianthoh ngawlnak thu pa kha khat um hi tuk hi,” tin ngaisung hi.
27 A zingten, Ha Thak Puai nung ni khatnakah David i khunnak cuh leleng hi. Mah hangin Saul in, “Ita zansun hihen tuni hihen an eihnakah David a tul ngawl?” tin Jonathan dong hi.
28 Jonathan in, “Bethlehem ah hawh tukin ngenin,
29 ‘Ka innkua pih ten ka khua uhah biakpiaknak puai bawl haw a, ka upa in tel loli tukin cah hi.’ ‘Mah hangin ka ngualcam pha na hi tale hawhtik zal inna, ka unaupihte tawk tung,’ ti hi. Mah hangin a neihnakah a tel theih ngawlnak hi,” tin hilh hi.
30 Mah thu cu Saul in, a zak ten a thinuk zetin, “Nang mi hawkdak pa David pan ci tih ciangno in thei zo ing. Na nu thangnautikin nangmah le mah vang thangnau duntik ci.
31 David i nunsung hempoh cu hi ngamah kumpi hi awng tukma ci, tih thei ma cim? Atu-in manlangin hawh inna, David cu hilai ah pui in hi a thih kul hi!” tin Jonathan cu liatnek zam hi.
32 Jonathan in, “Itakaw a thih tuk? I kaw a sual?” ti hi.
33 Mah bek le, Saul in Jonathan sun hum tukin a ceipi cu dangto hi. Mah nungten a pa in David cu that tum loli hi tih cu Jonathan in cel zetin thei hi.
34 Cabuai pen Jonathan mah ni Ha Thak Puai a ni nihnak ni cu imah ei ngawlin um hi. A pa Saul in David cu mualpho zetin, a bawl hangin, Jonathan in khawngaih pihzet hi.
35 A tepdun sa haw bangin a zingten Jonathan cu David tawk tukin hampa lakah hawh hi. Jonathan in tangvalno pa khat hawhpih hi.
36 Mah tangval pa i lakah, “Ka kap tukmi thalcang hi tai inna, zei in,” ti hi. Tangval pa cu tai in, Jonathan in thalcang cu mahpa i kalah kap hi.
37 Thalcang a caknak zawn a hen ten Jonathan cu nase zetin au in, “Thalcang cu khawlapi ah um hi.
38 Mahlai ah ding thong pahsun hi. Manlangin hawhin,” ti hi. Tangval pa in thalcang cu khulin, a bawipa lakah henpih hi.
39 Mahnaven a sullam imah thei ma hi. Jonathan le David ca in, a sullam nei khawng hi.
40 Thal le thalcangte cu khuasungah hawhpih tukin Jonathan in, a tangval pa cu pia hi.
41 Tangval pa a hawh nungten a ngelhnak suangpi lim pen David cu tho in, a lu lei tawngkha loli in vei thum tian kun hi. David le Jonathan cu namdunin kap ngel haw hi. David i lungsiatnak sangin luai saw hi.
42 Jonathan in, “Na lakah Pathian um zal tahen. Topa in nangmah le keima laklawh le na casuan le ka casuan laklawhah Topa i min salin thutepnak a bawl uhmi cu khotik lelengnak tukin bawm zal tahen,” tin David lakah ti hi. David cu hawhin Jonathan cu khua sungah kik hi.