22
Thiampite That Haw
1 Gath khua pen David cu tai lehin, Adullam khua el um suangkua ah heng hi. Mahlai a um cu a unaute le a innkua ten a zak haw ten a lakah hawh haw hi.Ref 22:1 Saam 57 (Thulu); 142 (Thulu).
2 Bawlsiat thuakmi, leiba neimi le lungkim ngawlnak nei hempoh cu a lakah hawh haw in, a venghawngin mi za li haw in, amuhte hotu ah cang hi.
3 David cu Moab ngam, Mizpah khua ah hawhin, Moab kumpi lakah, “Pathian in ka ca in, a tumtahmi ciangno in ka theih laklawh na lakah ka nu le pa um thei zal haw ahin tih hehpih ngen ing,” ti hi.
4 Mah hangin David in, a nu le pa cu Moab kumpipa i lakah zamin suangkua sungah a ngelh sung hempoh Moab kumpipa i lakah um haw hi.
5 Mahten profet Gad cu David lakah hungin, “Hilai munah um toh pahsun. Manlangin Judah ngamah hawhin,” ti hi. Mah hangin David cu Hereth tupi sungah hawh hi.
6 Saul cu Gibeah khua ah umin, ni khat cu a ceipi cawi in mualhum a tuumkung nuai ah khungin, a khutnuai bawi ten cing tiptep haw hi. David le a mihing tei umnak thei ung tin, Saul cu hilh haw hi.
7 Saul cu a thinukin, a khutnuai bawi tei lakah, “Benjamin hinnamte, ngai hih teh un! David in lo le sabit dum pia in, a ngalkap sungah thawng khat hotu, za khat hotu ngalbawi in bawl khawng tuk hi tin ngaisung uh cim?
8 Mah bangin maw keimah siatsuah tukin na vaisiam lih uh? Ka capa loli David lamtangin thutepnak a bawlte kuamah in hilh ma uh ci. Kuamah in thasiat pih hihim ma uh ci. Ka sungsuak ka capa loli in, a sosuah hangin ka mihing loli David in keimah thah theihnak tuk hun lemcang bek zei li in, um hi tihte kuamah in kei hilh awng ma uh ci,” tin pulhang het hi.
9 Saul khutnuai bawi tei lakah Edom mi Doeg cu ding bokin, “Nob khua um Ahitub i capa Ahimelek lakah David a hawh mu ing.Ref 22:9-10 1Sam 21:7-9; Saam 52 (Thulu).
10 David ca in Ahimelek in Topa i lakah thungenin, an pia a, Filistin mi Goliath i ngalnam hei pia,” ti hi.
11 Mah hangin Saul kumpipa in thiampi Ahimelek le Nob khua thiampi a dek bok a unaupihte hempoh cu samin, a lakah hung haw hi.
12 Saul in, “Ahitub capa Ahimelek ka thuhilhmi hi ngai in!” tin ti hi.
Ahimelek in, “Ngai ing hi, bawipa,” ti hi.
13 Saul in, “Ita David le nangin kei hi siatsuah tukin vaisiam li kam uh ci? Ita David cu an le ngalnam pia in, Pathian nelah thunget sak cim? David in keimah cu ngal bawlin, hun lemcang ngakin um hi,” tin ti hi.
14 Ahimelek in, “Na khutnuai a bawi hempoh lak pen David bang muantak akua him a um? Na makpa loli hi, nangmah cingkhawitu ngalkap tei bawi hi; mahten na khutnuai mi hempoh ten upat khawng haw hi.
15 A ca in thu ka nget cu tu hi amasabel hi sapma hi. Mahnaven nangmah siatsuah tukin khua khannak thu ah keimah hihen, ka unaupihte hihen, nawn hihim pahsun. Hithu cu samzang tiano hei ka theih ngawl uhmi umma hi,” tin don hi.
16 Kumpipa in, “Ahimelek nangmah le na unaupihte hempoh that khawng tung hi,” ti in,
17 a el a ding ngalkap tei lakah, “ Topa i thiampi that khawng un. David tuah keimah siatsuah tukin vaisiam haw a, David tai zo hi tihvang thei leleng haw naven hilh nuam haw ma,” tin thupia hi. Mahnaven Pathian i thiampi thah tuk cu nuam ngawlin ngalkapte cu a khut haw hei li nuam haw ma hi.
18 Mah hangin Saul in Doeg cu “Nangmah in thiampi hi that khawngin hi,” tin a hilhnak bangin Doeg in that khawng hi. Mah ni-in Topa i thiampi sawm liat le pa nga that hi.
19 Mah humah thiampi khua a tih lih haw mi Nob khuasung a ummi hempoh thah khawng tukin Saul in thu a piak hangin pano hihen, numei hihen, naupang hihen, nauno hei hihen, khui, laak le tuu tianin that khawng haw hi.
20 Mahnaven Ahimelek capa tei sung pen Abiathar a tih haw mi cu luatin David lakah taivawk hi.
21 Pathian thiampi cu Saul in that khawng hi, tin David cu hilh hi.
22 David in, “Ni khat Doeg ka muh ten Saul hilh loli tuk tin um ing. Mah hangin Abiathar, na innkua pih tei thih khawng cu keimah hangin hi.
23 Ka lakah um inna, na thinsu pahsun. Nangmah le keimah thah tuk cu Saul i nuammi hi. Mahnaven ka lakah himdam tuk poh ci,” tin Abiathar cu ti hi.