19
Saul In David Haksatnak Pia
1 Saul in David thah loli a tupmi thu cu a capa Jonathan le a khutnuai bawite hilh hi. Jonathan in David cu a deihzet hangin,
2 “Ka pa in nangmah thah tum hi. Zingten ngalling inna, mun kha khatah mi muh theih tuk ngawlnak ngelhin hi.
3 Hampalak na umnakah ka pa a hun ten zui bok tung a, na thu la cu hilh tung hi. Thu lamdang ka nei tale hilhleh tung hi,” tin David cu ti hi.
4 Jonathan in David phatnak thu hilhin, “Bawipa, David na salpa hi a siatnak bawl pahsun. Amah in, na humah siatnak bawl ma hi, a bawlmi hempoh cu na ca in, a nemcuam mi saw hi.
5 Goliath a thah laihin, a nunnak hei ngaisung ngawlin a bawlmi hi, a Topa in Israel ca in ngal ngengpi neh hi. Mahmi na muh ten na lungdamzet hi. Mah a hih hangin ita mawhnak nei ngawl David i thu cu um ngawlin that tum cim?” tin ti hi.
6 Jonathan i thuhilhmi cu Saul in ngai in, David that tuk ngawlin Pathian min salin thutiam hi.
7 Mah hangin Jonathan in David cu samin, a pa i otmi hempoh cu hilh khawng hi. Mahceng ten a pa i lakah hawhpihin, David cu a masa bang lengin kumpipa i nadektu in cangleh hi.
8 Israel le Filistin mite dodun lehleu haw a, David in nasezet do in, a neh hangin Filistin mite cu a suk le to ah tai khawng haw hi.
9 Ni khat ni-in Topa i hahmi khawhuai in Saul cu zial leleu in, a inn sungah Saul in ceipi cawi in khung hi. David cu Saul tingtang tum sak li hi.
10 Mahlai takin, Saul in ceipi tuah khawhin, David cu a dawk man hangin pang humah phut celcul hi. David cu tai in luat hi.
11 Saul in mah zanin, David i inn vilveng tukin le a zingten David that tukin mi khenkhat hah hi. Mahnaven a zi Mikhal in, “Tu zanin, na tai ma tale zingten thi ngangai tuk ci,” tin ngallinnak pia hi.Ref 19:11 Saam 59 (Thulu)
12 A zi in tukvelh pen pualamah khiasukin David cu tai vawk hi.
13 a inn sung a, milim la in, a zaunak haw humah Mikhal in koih hi. Keel mul tuah bawlmi lukham a lulamah koihin, puanin khuh hi.
14 Saul i mihingte David man tukin a hun haw ten Mikhal in, “David cu dam ma,” ti hi.
15 Mahnaven Saul in, “Na mit uh tuah zo unna, a zaunak tuah hilai ah zawng unna, that tung hi,” ti in, a mihingte cu hah leleu hi.
16 David inn sungah a tum haw ten zaunak humah innkua milim le a lukham keel mul tuah bawlmi cu mu haw hi.
17 Saul in, “Ita hi bangin zolin ka ngalpa suaktik cim?” tin Mikhal cu dong hi.
Mikhal in, “Ka luatnak tuk bawmin hi. Mah ahimata that tung hi, a tih hangin,” ti hi.
18 David cu tai ngutin, Ramah khua Samuel lakah heng hi. Saul in, a humah a bawlmi hempoh Samuel hilh khawng hi. Mahceng ten David le Samuel cu Naioth ah hawhin, mahlai ah um haw hi.
19 David cu Ramah khua el Naioth khua ah um hi tih Saul cu hilh haw hi.
20 Mah hangin David man tukin Saul in mi hah hi. Naioth khua a hen haw ten Samuel in ho in, a profet awn tuah a ot cecu li haw cu mu hi. Saul mihingte vang Pathian hawvangin man a, phu nawnok li bok haw hi.
21 Mah thu Saul in, a zak ten mitam deuh hah hi. Mahnaven amuhte vang mahti bangin um bok haw hi. Vei thum tian mi hahin mah tih lelengin um haw hi.
22 Mahnung ten amah Saul kumpipa loli tulin Ramah ah hawh hi. Seku a tih haw mi tuikhuk ngengpi umnak hengin, mahlai pen Samuel le David umnak a dot ten Ramah el Naioth khua ah um haw hi, tin miten hilh haw hi.
23 Lampi ah a hawh laihtakin, Topa i hawvangin Saul cu man bok a, phun nawnok thahin Naioth cu heng hi.
24 Samuel mitmuh loli in, a puansilh dukin, phun nawnok li hi. Thacangin thalengin le zan khua zau hi. Mah hangin, “Saul vang profet hi bok maw?” tin thupaucapnak umta hi.Ref 19:24 1Sam 10:11-12;