18
1 Saul le David cu thu a son kawm nung haw ten, Saul i capa Jonathan i lungmu cu David lamah kopin, amah le mah a it bang bokin David cu it hi.
2 Saul in David cu a innah pin phal ngawlin a lakah umtik hi.
3 Jonathan in David mahti zahta in, a ih hangin kumkhua ngualcam pha hi tukin thutiam hi.
4 A silh laihmi angki cualpi cu dukin, David pia hi. A ngalthuam, a ngalnam, thal le thalcang le a taikhapte vang pia hi.
5 David cu ngaldo tukin hawhtik mekin, a hawh sial ten ngalte cu neh leleng hi. Mah hangin Saul in David cu ngalbawi pa khatah koihin, ngalbawi dangte le ngalkapte cu lungdamzet haw hi.
Saul In David Iksik
6 David in Goliath a thah ceng Israel ngalkapte a pin haw ten Israel ngamsung khuate pen numei hempoh tulin, Saul kumpipa muak tukin hawh haw hi. Lungdamnak lasa in khuang le daak le lemlawi tumthahin laam li haw hi.
7 Lungdamin, lam thahin, numei ten, “Saul in, a za, a zain that, David in, a thawng athawngin that,” tin lasa haw hi.Ref 18:7 1Sam 21:11; 29:5;
8 Saul in mah a zak ten a lungkim ngawlin thinukzet hi. “David in, a thawng, a thawng thatin, ngaisung haw hi, kei cu a za a za bek that bangin ngaisung haw hi. David ca in kumpi can tuk bek sam si,” ti hi.
9 Mah hangin Saul in mah ni pepan David cu iksik hi.
10 A zingten Pathian i hahmi khawhuai in Saul cu zialin, a inn sungah misil bangin phuciak li hi. Ni dang a bawl mek bangin, David in tingtang tumin, Saul in ceipi cawi hi.
11 A lungmuno in “pang sihsanin khawh nang,” tin ngaisung hi. Vei nih khawhin, a vei nihin David cu dawk manin, khawh ngah ma hi.
12 Topa in Saul cu taisanin, David lakah um tih amuh ten Saul in David cu maizahzet hi.
13 Mah hangin ngalkap thawng khat uktu ngalbawi ah bawlin, ngaldo tukin hah hi. Ngaldonakah David in ho in,
14 Topa cu a lakah a um hangin ngalte cu nehin, a thil bawlmi hempoh lawhting hi.
15 David cu a bawl hempoh ah lawhting tih Saul in amuh ten lau dedeuh hi.
16 Mahnaven Israel le Judah ngamsung mi hempohin David cu deih ngangai haw hi, itahim titale hotu pha ngangai a hih hang hi.
David In Saul I Canu Huai
17 Saul in David lakah, “Ngalpha le muantak zetin ka nadekin, Topa Pathian i ngalte na do ahi tale ka canu upa deuh Merab cu na zi tukin pia tung,” ti hi. Saul i ngaihsutnakah amah thah kul ngawlin Filistin a donak munah Filistin ten David cu thatleh haw tuk tihmi hi.
18 David in, “Kei hi akua ing a, a koi unaupih ka hih hangin kaw kumpipa makpa ka hih tuk?” tin ti hi.
19 Mahnaven David tuah a huaidun haw tuk hun a hen ten Merab cu Meholah mi Adriel huaitik den hi.
20 Saul i canu Mikhal cu David tuah ngaidun haw tih cu Saul in, a zak ten lungdamzet hi.
21 Saul in, “Mikhal cu David huaitik tung; itahim titale Mikhal cu David ca in thangsiahmi hi tuk a, Filistin ten David cu that haw tuk hi,” tin ngaisung hi. Mah hangin Saul in David cu, “Ka makpa hi tuk ci,” ti hi. Hi bangin a tih cu vei nihnak hi.
22 David cu tawk kuh unna, “Kumpipa cu na humah a lungdamzet hi, a khutnuai bawite vangin nangmah cu deihzet haw hi. Kumpipa i canu cu atu-in, na huai ahin phabel tuk tin hilh tukin Saul in, a khutnuai bawite cu thupia hi.”
23 Mah thu cu David hilh haw in, mahten David in, “Kumpipa i makpa hi tuk cu sunloih tak ngangai hi. Keimah bang mi ca-ngah le mi naute ca in ngaihsut bat hei hi ma,” ti hi.
24 Bawi upa ten David i ot cu Saul hilh haw a,
25 Saul in, David hilh un; “Kumpipa in, a canu man tukin deihmi dang nei ma hi. A ngal tei phu laknak tukin Filistin ngalkap tei vuncep za khat bek ngen hi,” tin, a khutnuai bawi tei lakah thupia hi. David cu Filistin ten that haw tuk hi tih cu Saul i tupmi hi.
26 Saul i otmi cu a khutnuai bawi ten David a hilh haw ten David cu kumpipa i makpa hi tukin a ngaihsut ten nui suasuam hi. Huaidun tuk ni a hen laih ngawlin,
27 David le a ngalkap ten Filistin mite do in mihing za nih that haw hi. David in Filistin ngalkap tei vuncep cu Saul kumpipa i lakah hawhpihin, a makpa hi nuamin, a mai loli ah sialsak hi. Saul in, a canu Mikhal cu David huaitik hi.
28 Topa Pathian cu David lakah um tih le a canu Mikhal vangin David cu deihzet hi tih cu Saul in ciangno in thei hi.
29 Mah hangin David cu lau sesemin, a nun sung hempoh a ngalin cang hawta hi.
30 Filistin ngalkap ten Israel mite cu atu le tu do mek haw hi. Mahnaven David in ngal bawi dang hempoh sangin, a neh leleng hangin David cu a minthangzet hi.