17
Goliath In Israel Mite Zuam
1 Filistin mite cu ngaldo tukin samdun khawm haw in, Judah ngam Sokoh khua ah khawm haw hi. Sokoh le Azekah laklawh a um Efes Dammin a tih haw mi munah ngiak haw hi.
2 Saul le Israel mite cu samdun khawm haw in, Filistin mite do tukin tuangtimin, Elah munlawnah ngiahbuk sam haw hi.
3 Filistin mite cu mual pa khat humah panmun la in, Israel mite vang adang mual pa khat humah panmun la bok haw hi. A laklawhah luam ngengpi um hi.
4 Gath khua um Goliath a tihmi pa cu Filistin mitei umnak pen Israel mite zuam tukin tul hi. Goliath cu a tunglam pi kuah sang hi.
5 Daal lukhuh a khukmi le ngalthuam a silhte cu cuai sawm li le cuai luk ngit hi.
6 A kete cu daal phaw tuah tuam khawngin, daal a bawlmi ceipi cu a ko humah pua hi.
7 A ceipi cu a peklam thiampheng tia hi a, a ceilu cu cuai nga ngit hi. A ngal lumphaw puaksaktu ngalkap cu a mai ah hawh hi.
8 Goliath cu dingin Israel mite otsanin; “Saul i sal honte, ngaldo tukin hung uh cim? Kei cu Filistin mi ing; keimah do tukin nangmu lak pen tengdun un.
9 Keimah nehin, a that ahi tale nangmu salah cang tuk ung, mahnaven keimah in nehin ka that ahi tale ka salah cang tuk uh ci.
10 Tu loli in Israel ngalkap zuam ing ngei. Keimah do tukin nangmu lak pen mi pa khat teng unna, hung hen,” tin thuumin zuam li hi.
11 Mah a aumi cu Saul le a ngalkap ten a zak haw ten lungsia in thinsuzet haw hi.
Saul Ngiahbuk Ah David Heng
12 David cu Judah ngam Bethlehem khua Efrath mi Jesse i capa hi. Jesse in capa liat nei in, Saul in kumpi a deh ten Jesse cu tek zo hi.
13 A capa upa pa thum cu ngaldonak Saul lakah hawh bok haw hi. A upabel cu Eliab hi. A sangtu cu Abinadab, a pa thumnak cu Shammah hi.
14 David cu nautabel hi. A u tei pa thum Saul lakah a tel bok haw laihin,
15 David cu Bethlehem ah pin lehcetin, a pa i tuute khal mek hi.
16 Israel mite cu Goliath in do un tukin zing le taksialin, ni sawm li sung thuumin zuam hi.
17 Ni khat cu Jesse in, a capa David lakah, “Cangphan bawm khat le cangho zawl sawm hi pua inna, ngalkap tei ngiahbukah na ute selin hi.
18 Khuinawi vang lom sawm keng inna, ngalkap uktu ngalbawipa pia in hi. Na u tei dam le dam ngawl vang zo inna, dam haw hi tih theihnakin, a na haw pa kha khat pinpih lehin hi.
19 Saul kumpi, na ute le Israel ngalkapte cu Filistin do tukin Sasua kungpi lawnah um haw tuk,” ti hi.
20 Mah hangin David cu a zingten zingtungno tho in, tuu cing tukin mi pa khat ama ai-awh a cial ceng ten a pa Jesse i hilhnak bangin an puak tuk cu la in hawh hi. Israel mite ngaldonak munah a hawh laihtak haw in David cu ngalkap ngiahbukah heng hi.
21 Filistin ngalkapte le Israel ngalkapte cu dodun tukin panmun phano la veve in maitonin um haw hi.
22 David cu an lam dehvo latu ngalbawipa i lakah a an kenmi cu zamin, ngaldonak munah tai in, a ute dam le dam ngawl zo hi.
23 A ute tuah a otpihdun laihtak haw in, Goliath cu a mai hawah tulin masa laihin, a tihmek bang lengin Israel ngalkap cu thuumin zuam leleu hi. Mahmi cu David in za hi.
24 Goliath cu Israel ngalkap ten amuh haw ten a lau leita in, taikeh khawng haw hi.
25 Pa khat le pa khat, “Zo kek un! Hi pa khi! A mi zuam dan cu ngai hem un! Hi pa a that theitu cu a kumpipa uhin, mihau in bawl loli tuk hi, a canu huaitikin, a pa i unaupihte cu kawl siah awlh khawng tuk hi,” tin tidun li haw hi.
26 David in, a elkim a ummi tei lakah, “Hi Filistin pa a thattu le hi bang zahcak mualphonak pen Israel mite a luattiktu in i kaw a ngah tuk? A nungmi Pathian i ngalkap zuam ngam tukin hih Filistin pa cu iti bang mihing kaw?” tin ti hi.
27 Goliath a thattu cu laksawng tampi ngah tuk hi tin hilh haw hi.
28 David le ngalkapte a otpihdun lih haw cu David i u Eliab in, a zak ten thinukin, “Hilai ah i bawl heng kha li nge cim? Ngamkhing lakah na tuu akua kaw a khal? Na thinliannak le na lungmu phatngawl dan cu thei ing. Ngal dodun zo tukin hung cu,” tin liat hi.
29 David in, “I sualnak kaw ka bawl?” Mite thu dong thei bok tuk mang maw?” tin ti hi.
30 Mah ten, mundang hekin, midang lakah a thu cu dongleh hi. A thudotmi hempoh a hilhlehnak haw bangten khawng hi.
31 Mi khenkhat ten David i awn cu zain, Saul hilh haw hi. Saul in David cu a lakah hung tukin sam hi.
32 David in Saul lakah, “Maw kumpi pa, hi Filistin pa cu kuamah i lau tuk kha ma hi; keimah in do tuk poh ing, ti hi.”
33 Saul in, “Mah ma hi, itin kaw na do theih tuk? Nang cu naupang hi ci, amah cu a khan sung hempoh ngalkap hi zo hi,” ti hi.
34 David in, “Maw kumpi pa, kei cu ka pa i tuucing mek ing. Kiosa le vom ten ka tuunote a tai pih ten,
35 sahang cu hilin, ka dawk nungten tuunote cu pan suak mek ing. Kiosa le vom ten a dawk haw ten a ngawng pen manin, vat hum mek ing.
36 Kiosa le vom tampi that zo ing, mahte ka thah bangin, a nungmi Pathian i ngalkapte thuumin, a zawnsaktu pa cu that bok tung hi.
37 Kiosa le vom tei lak pen a huptu Topa in hi Filistin pa i khut sung hei pen hup tuk,” ti hi.
Saul in, “Pha hi, hawh inna, Topa Pathian in umpih zal tahen,” ti hi.
38 Saul in, a ngalthuam cu David i silh tukin pia hi. David i lu ah daal lukhuh khutikin a ngalthuam silhtik hi.
39 David in, a silhmi ngalthuam humah Saul i ngalnam pua in hawh tum hi. Mahnaven a silh awng ngawlmi a hih hangin hawhpih thei ma hi. David in, “Hi bang tuah do thei tuk mang. Ka silh awngmi hi haw ma hi,” tin Saul lakah ti hi. Mah hangin dukleh khawng hi.
40 A tuu khalhnak ngolhkang cawi in le tui mawk a, suang pum neuno pa nga khul thahin, a tawngphu sungah thuang hi. A saili tuah Goliath do tukin hawh hi.
David In Goliath Neh
41 Filistin pa Goliath in, a ngaldonak lumphaw a puatu pa cu a mai ah hawhtik hi. David lamah nek dedeuhin,
42 phano in David amuh theih ten a zoh ten, David cu mipiangzet tangval dawnno poh ma maw tin zawnsakzet hi.
43 David lakah, “Hi na ngolhkang cu i bawlnak tukin keng kam? Kei hi uico sa cim?” tin au in, a pathian min salin David cu tamnek hi.
44 David cu zuamin, “Hung hemin, na cik cu vano le ngamsate eitik tung,” ti hi.
45 David in, “Nangin namsau, cei le thal keng naven cin, kei cu na zuammi Israel tei Pathian Ihempoh tithei Topa i minin nangmah do tukin hung ing.
46 Tuni loli in Topa hangin nangmah cu ka khut sungah heng tuk ci, neh tung hi. Na lu talh tung hi. Filistin ngalkap tei sa cu vano le ngamsa tei eih tukin pia tung hi. Israel in Pathian nei hi tih cu hi ngam mi hempoh ten thei haw tuk hi.
47 Pathian in, a mite a pan tukin nam le ceite kulma hi, tih cu mi hempoh ten mu haw tuk hi. Topa cu ngalnehtu hi, nangmuhte vang na venghawng uhin ka khut sungah hengtik tuk,” ti hi.
48 Goliath in David lamah nek dedeuhin, David vang amah do tukin Filistin tei lamah manlang zetin tai hi.
49 David in, a tawngphu sung sawkin, suangpimno a lak ceng ten a saili tuah Goliath cu kap hi. Goliath i calah kha in, a lu-nguh keh hi. Mah hangin Goliath cu bokkhupin lum hi.
50 ngalnam mang ngawlno in, David in Goliath cu saili le suangin neh hi.Ref 17:50 2Sam 21:19;
51 David cu tai in, Goliath humah dingin, Goliath i ngalnam cu a kawng sung pen dawkin, a ngawng talhin Goliath cu thi hi.
Filistin ngalkapte cu a mi ngilbel haw pa i thih amuh haw ten tai khawng haw hi.Ref 17:51 1Sam 21:9;
52 Israel le Judah ngam pen a hung ngalkap ten thakhatin hil a, au thahin Gath le Ekron kongkhah tian hil ngut haw hi. Filistin ngalkap tei luang cu Gath le Ekron tian Shaaraim lampi ah lum teptup haw hi.
53 Mah nungten Israel ngalkapte cu kik haw in Filistin ngalkap tei ngiahbuk a um vante la khawng haw hi.
54 David in Goliath i lu cu la in, Jerusalem ah pua hi. Mahnaven Goliath i hiamnam cu ama puanbuk sungah koih hi.
David In Saul Tawk
55 Goliath do tukin David a hawh cu Saul in, amuh ten a ngalkap uktu ngalbawipa Abner cu samin, “Hi naupang pa khi akua kaw?” tin dong hi. Abner in, “Maw kumpipa akua tih thei mang hi,” tin don hi.
56 “Hawh inna, a koi capa him, tih cianin hi” tin Saul in ti hi.
57 Mah hangin Goliath a thah nungten a ngiahbuk hawah David a hen ten David cu Abner in Saul lakah hawhpih hi. David in
58 Goliath i lu cu pua leleng hi. Saul in, “Tangvalpa, akua kam?” tin dong hi.
David in, “Bethlehem khua mi na salpa Jesse i capa ing,” ti hi.