11
Saul In Ammon Mite Neh
1 Ha khat a ngei nungten, Ammon kumpi Nahash cu Gilead ngamsung a um Jabesh khua do tukin hawh hi. Nahash ngalkap ten Jabesh khua cu kim khawng haw hi. Jabesh khuasung miten Nahash lakah, “Lungkimnak lai bawl inna, keimuh uktu in mang tuk ung hi,” tin ti haw hi.
2 Nahash in, “Na venghawng uhin, na taklam mit pholhin, Israel miphun humah zahcaknak ka hentik ceng nung bek ten nangmuh tuah lungkimnak lai bawl thei tung,” ti hi.
3 Jabesh khua hotu ten, “Israel ngamsung hempoh ah mi a hah theihnak tukin ni salih sung hun pia zalin hi. Kuamah in, a bawm haw ma tale na lakah tum tuk poh ung,” ti hi.
4 A hah haw mite cu Saul umnak khua Gibeah hengin, a thu a hilh haw ten khuasung mite cu lungsia in kap haw hi.
5 Saul cu lo pen a khuite tuah pinin, “I thu poi um kaw? Itakaw mi hempoh a kah leilui haw?” tin dong hi. Jabesh khua pen a hah tei thusia cu hilh haw hi.
6 Mah thu cu Saul in, a zak ten Pathian i hawvangin manin, a thinukzet hi.
7 Khuicang pa nih ngo in, a cik sahcip ceng ten Israel ngamsung hempoh ah hawhpih tukin mi hah hi, “Ngaldonakah Saul le Samuel a zui ngawltu pa i khuicang cu hi bangin sahcip khawng hi bok tuk hi,” tin thucah khawng hi.
Topa in iti bawl tuk nemtim tin, Israel mite cu a venghawng haw lau in, thin khatno in suak khawm ten haw hi.
8 Saul in Bezeh ah pui khawmin, Israel mi thawng za thum kimin, Judah mi thawng sawm thum kim haw hi.
9 Jabesh khua pen a hah haw mi palai tei lakah, “Na khua uhmite hilh un hi; zingten sunlaih ngawlin nangmah pan suak haw tuk,” ti hi. Mah thu a zak haw ten Jabesh khua mite cu lungdam ngangai haw hi.
10 Nahash lakah, “Zing ten, na lakah tum tuk ung, na deih bangin bawl ngawl pohpah ni ci,” ti haw hi.
11 A zingten Saul in, a ngalkapte cu hon thumin, khenin zingtungno in ngalte cu a ngiahbuk hawah nam tawtok haw hi. Sun ten Ammon mite cu that khawng haw hi. A luatmi cu khenkhek khawng haw in, a dangte taivawk khawng haw hi.
12 Israel miten Samuel lakah, “Saul hi a kumpi uh hi ma hen, titu akua kaw? Ka lak uhah pui unna, that khawng tuk ung,” tin ti haw hi.
13 Mahnaven Saul in, “Tuni in kuamah that pahsuh un, itahim titale tuni cu Topa in Israel a patsuah ni,” ti hi.
14 Samuel in, “A venghawng uhin Gilgal ah hawh nung inna, Saul cu a kumpi uh hi tin than notleh tuk hung,” ti hi.
15 Mah hangin a venghawng haw in Gilgal ah hawh haw a, mahlai mun thiangtho ah Saul cu kumpi in koih haw hi. Pathian nelah pawlkom biakpiaknak pia haw in, Saul le Israel mite cu lungdam zetin puai bawl haw hi.