12
Samuel I Nungdawlbel Thuhilhmi
1 Samuel in Israel tei lakah, “Deh tuk na cial uhmi cu dek zo ing, nangmuh uktu tukin kumpi koih zo ing.
2 Nangmuh puitu tukin nangmuta hi zo hi. Kei cu tek zo ing, ka puak vang pak khawng zo hi. Ka capate vang nangmu lakah tel zo haw hi. Ka neu laih pepan tutianin, na hotu hi leleng ing.
3 Atu-in, na mai uhah um ing a, thil sual ka bawl uhmi pa kha khat a um tale Topa Pathian le a tenmi kumpi mai ah na lungkim ngawlnak uhte phuang khawng un hi. Mi khui la awng ing maw? Mi laak ngu awng ing maw? Mi pa kha khat zolin zawnsak awng ing maw? A koi lak pen nawhthuh la awng ing kaw? A dik ngawlin ka lakmi a um tale ka lakmi zahin lulleh tung,” ti hi.
4 Israel miten, “Kuamah zol ma ci; zawnsak ma ci, kuamah i lak pen imah la awng ma ci,” tin ti haw hi.
5 Samuel in, “Tuni in, sualnak nei ngawlin, na muhnak uh hi, a theihpihtu cu Topa hi,” tin ti hi.
6 Samuel in, “Moses le Aaron a tengtu le na pu le pa uhte Izipt ngam pen a tultiktu cu Topa hi.Ref 12:6 Suah 6:26;
7 Atu-in, na, umnak ten uhah ding unna, nangmuh le na pu le pa uhte pan tukin Topa i nalamdang a bawlmi hilhin, Topa i mai ah na sualnak uh phuang tung hi.
8 Jakob le a innkua Izipt ngamah a hen haw ten Izipt miten a bawlsiat haw hangin Topa i lakah bopnak ngenin au haw hi. Topa in, a aunak haw cu a zak ten Moses le Aaron hahin, amuh ten na pu le pa Izipt ngam pen tulpihin, hi ngamah henpih haw hi.Ref 12:8 Suah 2:23;
9 Topa a Pathian haw cu a phawhngilh haw tak Pathian in, Hazor khua ngalkap hotu ngalbawi Sisera le Filistin mite le Moab kumpi cu Israel dotikin nehtik hi.Ref 12:9 Thuk 3:12; 4:2; 13:1;
10 Topa i lakah bopnak ngenin au leleu haw, ‘ Topa aw, na lampi pen pialin Baal le Astartes milimte bia in, sual zo ung hi. Sual ung hi. Mahnaven ka ngal tei khut sung pen luattik zal inna, nangmah bia tuk ung hi,’ tin ti haw hi.Ref 12:10 Thuk 10:10-15;
11 Mah hangin Topa in, Gideon, Barak, Jefthah le Samuel hahin, na ngal tei khut sung pen luanin, lungmuang zetin um uh ci.Ref 12:11 1Sam 3:20; Thuk 4:6; 7:1; 11:29;
12 Mahnaven Ammon kumpi Nahash in do tuk hi, tih na zak bek uhten Topa cu na kumpi tukin deih ngawltohin, ‘Keimuh uktu tukin kumpi pia in hi,’ tin ngen uh ci.Ref 12:12 1Sam 8:19;
13 “Atu-in, na ten uhmi kumpi um zo hi. Na nget uhmi a hih hangin Topa in pia hi.
14 Mah bangin nangmuh le na kumpi in Topa na Pathian uh cu zui in, a thu vang ngai in le a thupiakmi bangin bawlin amah kihcak upatnak tuah a na nadek uh tale pha tuk hi.
15 Topa i thungai nuam ngawlin a thupiakmi na el uh ahi tale na pu le pa tei thuak bangin nangmuh le na kumpi ten thuak tuk uh ci.
16 Mah hangin na umnak mun ten uhah ding unna, Topa i thasiahhuai na a bawl tukmi hi zo ten un.
17 Tu hi khal hun hi. Thungen nang inna, Topa in vanthumtikin nguahzutik tuk hi. Mahmi na muh uhten Topa i lakah kumpi na nget uh hangin Pathian nelah sualnak ngengzet bawl uh ci, tih cu ciangno in thei tuk uh ci,” ti hi.
18 Mah hangin Samuel in thungen a, mah ni loli in Pathian in vanthumtikin nguahzutik hi. Mi hempohin Topa le Samuel cu lauzet haw hi.
19 Samuel lakah, “Ka thih ngawlnak tuk uhin hehpihnakin, Topa na Pathian nelah thunget sak zalin hi. Ka sualnak uh sialcelh ngawl humah, kumpi ka nget uh hangin sual ung hi,” ti haw hi.
20 Samuel in, “Na lau pahsuh un. Thilpha ngawl bawl zo toh nave uhcin, Topa i lak pen pial toh pahsuh un. Na lungmu uh venghawngin ama nadek saw un.
21 Mi bawm thei ngawltu le nunpan thei ngawl tei lakah hawh pahsuh un. Amuhte cu phukthong haw poh hi.
22 Pathian in, a minsalin thutiamin, ituk mahten zamthong tukma hi. Itahim titale ama mihing hi tukin tumtah sa zo hi.
23 Na ca uhin, ka thunget cu cawl hihim tuk mang; ka cawl tale Topa i mai ah misual hi tung hi. A pha mi le a manmi bawl tukin zilh saw tung.
24 Topa cu kihca unna, muantak zetin, na lungmu venghawng uh tuah ama nadek un. Nohtei ca in thasiahhuai na a bawl mite ituk mah ten phawkngil pahsuh un.
25 Mahnaven sualnak na bawl leleng uh tale na venghawng uhin, na kumpi uh tuah siatsuah khawng hi tuk uh ci,” ti hi.