SAMUEL
Laibu
Thulamsial
Samuel pa khatnak sungah Thukhentu tei khan pen kumpi i uk khanah Israel tei thekdunnak thu um hi. Israel phun nam sung pen hi ti bang thekdunnak thu ah tangthu neitu deuhmi pa thum um haw hi, mahmi pa thum cu thukhentu thupizet tei lak pen a nung dawl beel Samuel le Israel tei kumpi masabel Saul le Israel kumpi lak pen a ngengbel David hi. David kumpi a cannak thu a son haw ten Samuel le Saul tangthu hilh cih leleng haw hi.
Hi laibu sungah tumtah kuhbelmi cu Pathian humah muantakin, a um uh tale lawhtinnak umin Pathian thu a ngaih uh ngawl tan siatlalnak hi tih thu hi. Mah thu cu Eli i hilh mi I Samuel 2:30 sungah ciangno in mu thei hung hi. “Keimah a sunloih tu cu sunloih bok tung. Kei zawn saktu cu zawnsakleh bok tung,” tin um hi.
Hi laibu sung a, kumpi uknak thu ah lungmu khenkhuai theih ngawlmi thu um hi. Itahim titale Topa amah hi him cu Israel tei kumpi in ngaihsut mi hi: mahnaven mihing tei ngetnak zui in Topa in kumpi pa khat tel sak hi. A thupimi cu a kumpite le a mihing ten Pathian uknak le thukhennak nuai ah phano in um haw hi (2:7-10) tihmi thu hi. Pathian i dan nuai ah mihau ca-ngah a venghawngin bangten khawng hi.
1
Elkanah le A Innkua Shiloh Khua Ah
1 Efraim miphun sung pen Elkanah a tih haw mi cu Efraim mualhum ngam Ramah tihmi khua pa khatah um hi. Amah cu Zuf miphun Tohu i cikhaih Elihu i capa Jeroham i capa hi.
2 Elkanah cu zi pa nih nei in, Hannah le Peninnah hi. Peninnah in ca nei naven Hannah in ca pa khat hei nei ma hi.
3 Elkanah cu a khua pen Shiloh khua ah kumsialin Ihempoh tithei Topa bia tukin le biakpiaknak bawl tukin hawh mek hi. Shiloh khua ah Topa i thiampi cu Eli i capa pa nih Hofni le Finehas haw hi.
4 Elkanah in Topa i lakah biakpiaknak a piak ten a zi Peninnah le a ca tei lakah a covo haw pia ten hi.
5 A zi Hannah cu itzet naven a co tuk pa khat bek pia hi, itahim titale Topa in cano a piak ngawl hangin hi.
6 Ca nei ngawl a hih hangin Peninnah in Hannah cu bawlsia in, a zakcatik mek hi.
7 Kum khat nung kum khat hitih bangin bawl hi. Topa i innah a hawh haw ten Peninnah in Hannah cu thasiatik mek a hih ten Hannah cu an hei ei ngawlin kap mek hi.
8 A pasal Elkanah in, “Hannah ita an hei ei ngawlin kap nge cim? Ita lungsia in um leleng cim? Na ca in kei hi capa sawm khat sangin sunglawi saw ma ing maw?” ti hi.
Hannah le Eli
9-10 Ni khat cu Shiloh khua ah an a eih ceng haw ten Hannah cu tho in, a lung a nop ngawl leita hangin Topa i lakah kapthahin thungen hi. Thiampi na a dektu Eli cu Topa i biakinn kongka el a, khunphah humah khung hi.
11 Hannah cu thungenin, “ Topa aw, Ihempoh tithei Pathian, kei na salnu hi mu zazalin hi. Ka cimkhamnak theihsak inna, kei hi phawkngil zal pahsun. Capano na pia tale, a nunsung hempoh nangma ca in pia tung a, a sam hei met tuk mang hi, tin tiam ing hi,” ti hi.Ref 1:11 Mipum 6:5;
12 Hannah cu Topa i lakah ngeizet thungenin, Eli in, a muk cu zo leleng hi.
13 Mengdenin thu a nget hangin a muk cu phe li naven a aw tul ma hi. Mahtin a um cu zukham hi tin Eli in, a ngaihsut hangin,
14 Hannah lakah, “Zukham misilin um leng toh pahsun! Na zukham phatik inna, cipsoh hihin,” ti hi.
15 Hannah in, “Mah ma hi, zu kham hihim mang, sazapa, tin ti hi. Nguih theih le kham theih imah bawl mang! Ka lungkham leita hangin Topa i lakah ka vansannak hilhin, thungen li ing.
16 Numei pha ngawl bangin ngaisung hihim pahsun. Ka lungkham leita in le ka vansan leita hangin hi bangin thungen ing,” ti hi.
17 Eli in, “Lungmuang zetin hawh inna, Israel i Pathian in, a lak a, na ngetmi cu pia zal tahen,” ti hi.
18 Hannah in, “Ka humah hehpihnak lungmu nei leleng aw maw,” ti in hawh hi. Mahnung ten an dem ei in, a lungsia lehma toh hi.
Samuel Suahnak le Apnak
19 A zingten Elkanah le a innkua cu tho in Topa Pathian bia in, Ramah khua a inn hawah kikleh haw hi. Elkanah le a zi Hannah cu zaukawm haw a, Hannah i thungetnak cu Topa in theihsak hi.
20 Mah hangin Hannah cu naupai in, capa hing hi. A capa cu Samuel tin, a minsa hi. Itahim titale “ Topa i lakah ka ngetmi,” ti hi.
21 Elkanah le a innkua cu kumsialin, a piak haw mi biakpiaknak le a thutepsa bangin a dangno in biakpiaknak Topa i lakah pia tukin Shiloh khua ah hawh leleu haw hi.
22 Mahnaven Hannah cu hawh ma hi. A pasal lakah, “Ka capa cu nawicawp a tawp bek ten Topa i innah hawhpih nang inna, mahlai munah a nun sung hempoh um tuk,” ti hi.
23 Elkanah in, “A phabel na tihmi cu bawl inna, nau nawicawp a tawp laklawh cu innah umin hi. Topa in, na thutepmi cu kimtik zal hen,” ti hi. Hannah cu innah umin, a capa cu phano zo hi.
24 Nawicawp a tawp ten a nu in Samuel cu Shiloh ah hawhpihin kum thum khuicang pa khat, sangvut seu khat le sabit thawl khat keng haw hi. Naupangno hi naven Samuel cu a nu in Shiloh khua Topa i innah hawhpih hi.
25 Khuicang cu ngo in, Samuel cu Eli lakah hawhpih haw hi.
26 Hannah in, “Sazapa, phawkngil zo cim? Hi munah dingin Topa i lak thungentu numei nu khi keimah ing.
27 Topa i lakah capano ngenin, ka ngetmi cu atu-in pia zo hi.
28 Mah hangin amah cu Topa i lakah pia ing. A nun sung hempoh Topa tatuk hi,” ti hi.
Topa cu mahlai mun pan bia haw hi.