4
Boaz In Ruth Huai
1 Khua sungmi tei a tawhdun khawm meknak haw munah Boaz cu hawhin khung hi. Boaz i hilhmi Elimelech i unau pih naibelpa cu Boaz in samin, “Hilai ah hungin khung hemin” tin ti hi. A tih bangin hungin khung hi.
2 Boaz in khuasung upa sawmte sam inna, mahlaiah khungtik bok hi. A khun ceng haw ten,
3 a unau pih pa i lakah, “Atu-in Naomi cu Moab ngam pen hengkikleh zo hi. Amah in, a unau pih pa uh Elimelech i neihmi lo cu zuak nuam hi.
4 Mah hangin nang vangin mah thu cu na theih kul bok tuk hi. Atu-in nangmah in, na deih tale, hi a khungmi tei mai ah lei inna, na deih ma tale hilhin hi. Itahim titale a leitu tuk a masabel cu nangmah hi ci a, mah cengten keimah tung hi” ti in ti hi.
Mahpa in “Lei tung hi,” tin ti hi.
5 Boaz in, “Pha hi, mahnaven Naomi lak pen lo na lei tale, Moab meivongnu Ruth vang na leicih kul tuk hi. Lo cu mithi pa i innkua sungah um tuk,” ti hi.
6 Mahpa in, “Hi thu ah lo lei theihnak ka neihmi hi, mang tuk mang, itahim titale ka canau ten co ngawlin um kha haw kawn, nangmah in lei in hi. Kei cu lei tuk mang,” tin ti hi.
7 Mah hun laihin Israel ngam sungah nate a zuak haw ten hei hihen, a thekdun haw ten hei hihen, a zuaktu in, a kedam dukin, a leitu i lakah piak daan hi. Mahmi in, a thu haw leiceng tih langtik haw hi.Ref 4:7-8 Daan 25:9;
8 Mah hangin mahpa cu Boaz lakah, “Nangmah in lei in,” tin a kedam cu dukin, Boaz pia hi.
9 Boaz in, “Hilai um upate le midang tei lakah Elimelech le a capa Chilion le Mahlon tei neihmi na hempoh Naomi lak pen ka leimi theihpihtu cu, nangmuhte hi uh ci.
10 Mah i hum pen a thi zo mi Mahlon i zi Ruth cu ka zi hi tuk hi. Mahti bangin mithi pa i innkua le a hinnam cu ka miphun i lakah le a khua sungah um leleng thei tuk hi. Tuni in nohte cu hi thu ah theihpihtu uh ci,” tin ti hi.Ref 4:10 Daan 25:5-6;
11 Upate le midangte cu, “Hi zuh hi, kohte cu theihpihtu hi ung. Jakob ca tamzet a hinsaktu Rachel le Leah bangin Topa in, na zi cu bawl tahen. Ephrath hinnam sung pen mi neinung hi zal inna, Bethlehem ah na minthang tahen.Ref 4:11 Pian 29:30;
12 Judah le Tamar tei capa Perez innkuate bangin hi numei nu i sung pen Topa i piak tukmi na canaute vang hi bok tahen,” tin ti haw hi.Ref 4:12 Pian 38:27-30;
Boaz le A Casuante
13 Mah hangin Boaz in Ruth cu innah pinpihin, a zi in mang hi. Topa in muicu pia a, naupai in capa pa khat hing hi.
14 Numei ten Naomi lakah, “ Topa cu thangphat hi tahen! Nangmah cingkhawitu tuk tupa pa khat pia hi. Na naupangpa cu Israel ngam sungah a minthang tahen.
15 Na capa i zi in nangmah itzet hi. Capa salihte sangin nemcuam saw hi. Atu-in, na tek ten nunnak thak piatu tuk le himnak piatu tukin tupa hinsak hi” tin ti haw hi.
16 Naomi in nauno cu la in, a angsungah pomin, cingkhawi hi.
17 A innnel numei ten nau cu Obed tin, a minsa haw hi. Mi hempoh tei lakah Naomi in capa pa khat nei zo hi, ti in hilh haw hi.
Obed cu Jesse i pa hi. Jesse cu David i pa hi.
18 Hite hi Perez pen David tian a cikhaih haw mi hi.
19 Perez i pa Hezron, Hezron i pa Ram, Ram i pa Amminadab,
20 Amminadab i pa Nashon, Nashon i pa Salmon,
21 Salmon i pa Boaz, Boaz i pa Obed,
22 Obed i pa Jesse, Jesse i pa David hi.