2
Hannah i Thungetnak
1 Hannah cu hi bangin thungen hi.
“ Topa in ka lungmu cu
lungdamnak tuah dimtik zo hi.
A bawlsa mi hangin
ka lungdam.
Ka ngalte cu nuihsan
thei zo ing;
A bop zo hangin ka lungdam.Ref 2:1-10 Lk 1:46-55;
2 Topa bangin a thiangthomi
kuamah um haw ma;
a Pathian uh bangin mihuptu suangpi
kuamah um haw ma.
3 Ngal zetin, na tuangkhawnnak uhte
cawl toh un;
Pualthau zetmi na awnkam uhte
cawl toh un.
Itahim titale Topa cu ihempoh
a theitu Pathian hi.
Mihing tei bawlmi hempoh humah
thukhentu hi.
4 A ngilmi ngalkap tei thalcang
ek khawng hi.
Mahnaven mi thanem cu
ngilleh haw hi.
5 An a khamzet ten
an tha lawh haw tuk a,
ngilkialte a vonvahleh haw hi.
Ca nei thei ngawl numei in
ca salih nei hi.
Ca tampi a neimi nu cu
ca nei ngawlin cangleh hi.
6 Topa in thitikin,
nunnak pialeh hi.
Mithi khua ah hen tukin,
a thi mite nunglehtik hi.
7 Mi khenkhat ca-ngahtikin,
a khenkhat hautik hi.
A khenkhat mi nauta cangtikin,
a dangte mi thupi in
cangtik hi.
8 Mi nautate cu leivul lak pen
phongto in,
mi tingsamte cu vut lak pen
khaisang hi.
Kumpipa i capate tuah khungtikin,
upatnak munah umtik hi.
Leipi bulphuhnak cu Topa ta hi.
Mah humah leipi cu dingtik hi.
9 “A mi thiangtho tei ke kal
cingkhawi hi.
Mahnaven mipha ngawlte
khuathim lakah pailal hawta hi.
Mihing tei cahnak bek tuah
lawhtinnak umma hi.
10 Topa dodaltute cu
siatsuah khawng
hi haw tuk hi.
Vancung pen
vanthum bangin tol dudup
tuk hi.
Topa in leihum thu
son tuk hi.
A kumpipa i lakah cahnak
pia tuk hi.
A tensami kumpi cu nehtu
hitik tuk hi.”
11 Elkanah cu Ramah ah kik hi. Mahnaven Samuel cu Shiloh ah um vawkin thiampi Eli i khutnuai ah Topa i nadek hi.
Eli Capate
12 Eli i capate cu mi suaksualzet haw hi. Topa Pathian vang imah simsial haw ma.
13 Israel tei lak pen thiampi tei covo a ngahnak dante vang siatik khawng haw hi. A dan haw bangin mi pa khatin Pathian lakah biakpiaknak a piak ten thiampi pa i umlawhpa cu kak thum neimi daal keu tuah hung hi. Biakpiaknak cik a huan lih laihtak haw hi.
14 Beel sung a, cik cu a daal keu tuah sawhin, a thuk theihmi hempoh cu thiampipa tatuk hi. Biakpiaknak pia tukin Shiloh khua ah a hungmi Israel mi hempoh ten mahti bangin bawl leleng haw hi.
15 Eli i capa tei khanah a ngawh haw mi ngan thau hei mei ah a haal haw laih ngawlin thiampi pa i umlawhpa hungin biakpiaknak a bawltu pa i lakah, “Thiampi pa i ca tukin kio tuk cik pia in hi. Huan sa cu sang tukma hi. Cik sial bek sang,” ti hi.
16 Biakpiaknak a piatu pa in “A thau hi mei ah haal masa nung inna, mah nungten na deihmi la lehin hi,” tin, a tih ten, thiampi pa i umlawhpa in, “Hi ma hi, tu loli in pinin, na pia ma tale la lo tung,” ti hi.
17 Eli i capa tei sualnak cu Topa i mai ah nase leita hi, itahim titale Topa i lak a, piakmi biakpiaknak cu nautatnak tuah nawngkaitik haw hi.
Shiloh Khua Ah Samuel
18 Naupangpa Samuel cu Topa i thiampi nadekin, a thiangthomi angkicual silh mek hi.
19 Kumsialin, a nu in angkicual khuisakin, kum khat vei khat a pasal tuah biakpiaknak a bawl haw ten mah angki cu a capa pia mek hi.
20 Elkanah le a zi cu Eli in muicu pia in, Elkanah lakah, “ Topa i lak a na piakmi capa ai-in, hi na zi sung pen Topa in ca dang pia zal tahen,” ti hi.
Mah nungten a khua ah pin haw hi.
21 Topa in Hannah cu muicu pia in, capa pa thum le canu pa nih neileh hi. Naupangpa Samuel cu Topa i nadekin khangto pepel hi.
Eli le A Capate
22 Eli cu tekzet toh hi. Israel tei humah a capa tei nuncan le Pathian umnak puanbuk sung tumnak kongka ah nadektu numei tianin, a zaupih haw thu thei leleng hi.
23 Mahte hangin a capa tei lakah, “Ita hi ti bangin nung uh cim? Mi hempohin thilpha ngawl na bawlte hilh haw hi.
24 Cawl toh un! Ka ca aw, hi ti bangin bawl toh pahsuh un! Topa i mihing tei son lihte hi thupha ngawlzet hi.
25 Mi pa khatin midang humah a sual tale, a lemtu tukin Pathian um hi. Mahnaven mi pa khatin Pathian humah a sual tale, akua in lemnak bawl thei tuk him?” tin ti hi. A pa haw in liat li naven sang nuam haw ma hi, mahnaven amuhte cu thitik tukin Topa in ngaisung sa zo hi.
26 Naupangpa Samuel cu Pathian mai le mihing mai ah mitmai pha ngahin khang pepel hi.Ref 2:26 Lk 2:52;
Eli Innkua Humah Thusia Heng
27 Profet pa khat Eli lakah hungin, Topa i thu cu hi bangin hilh hi; “Na pu uh Aaron le a innkua Izipt ngam Faro i sal a hih haw laihin, Aaron lakah lang ing.
28 Keima thiampi a hih hawnak tukin biaklandawhah ka nadekin namtui halin, keima ca in angkicual thiangtho a puatu tukin ama unaupihte cu Israel miphun hempoh lak pen teng zo ing. Mah hum pen biaklandawh hum a meihalin biakpiaknak a piak haw mi sung pen a ngah bok hawnak tukin covo pia ing.Ref 2:28 Suah 28:1-4; Thiam 7:35-36;
29 Hiti bang hi leng naven ita kei na thupiak bangin a piak haw mi le zehsa a piak haw mi hampumnak tuah zo in iksik cim? Ita ka miphun Israel tei biakpiaknak a piakmi hempoh lak pen cik ukbel cu na capate eitikin, thau khawng si uh si. Keimah sangin na capate sunglawitik saw cim?
30 Na unaupihte hihen, na phunpih hihen kumkhua in keima thiampi dek un hi, tin Israel i Topa Pathian, keimah hihimin tiamsa zo ing. Mahnaven mah bangin hi tukma toh hi tih thu hilh ing. Keimah a sunloihtu cu sunloih bok tung, a zawnsaktu cu zawnsak bok tung.
31 Ngaisung hemin, na unaupih lak pen tekkunin, a nungmi um haw ngawlnak tukin, na sung khat le na phunpih sung pen tangval hempoh ka thihtik tuk hun heng tuk hi.
32 Na lungkhamin, Israel tei lak a muicu ka piakmi iksikzet tuk ci, mahnaven na unaupih lak pen tekkun tian a nung pa khat hei um awng tukma hi.
33 Na casuan sung pen mi pa khat bek nungdam tuk a, ka thiampi nadek tuk hi. Amah cu a mitcaw in lungbing amthongin um tuk hi. Na casuan dang hempoh cu sak thi in thi khawng haw tuk hi.
34 na capa pa nih Hofni le Finehas ni khat sung loli in, a thih haw ten ka thuhilh mite cu dik hi tih lang tuk hi.Ref 2:34 1Sam 4:11;
35 Mah nungten keima ca in muantak thiampi pa khat teng tung a, ka deihmi hempoh bawl khawng tuk hi. Tu le ca tampi pia in, amuhte cu ka tenmi kumpi mai ah nadek leleng haw tuk hi.
36 Na tu le ca sung pen nungdammi a um haw tale an eih tuk a ngah hawnak tukin kumpipa i lakah hawhin, sumpai le an ngenin thiampi bawmtu a hih theih hawnak tuk vang ngen haw tuk,” ti hi.