9
1 Mahten vancungmi pa nganakin, a pengkul a tum ten van pen aksi pa khat lei ah a caksukmi mu ing. Mahmi aksi lakah taw nei ngawl khuk thukpi honnak tawhcang pia haw hi.
2 Mahmi aksi in taw nei ngawl khuk thukpi cu a hon ten, pumsuknak mei pualpi pen a tulmi meikhu bangin meikhu tampi tul bembum hi. Mah meikhu in, ni i vaknak cu thimtikin thimzing tung hi.Ref 9:2 Pian 19:28;
3 Meikhu lak pen khaau tampi lei ah caksuk haw in, mah khaute cu aikam i neihmi ngu bangin piak na hi haw hi.Ref 9:3 Suah 10:12-15
4 Mahmi khaute cu hampa, thingkung le thingkung dangte siatsuah tuk ngawlin hilh haw hi. A siatsuah theih haw tukmi cu a cal hawah Pathian melciknak tacik nei ngawl mihingte bek hi.Ref 9:4 Ezk 9:4
5 Khaau ten hi mihingte thah theihnak thunei haw ma hi, ha nga sung bek bawlsiat theihnak thunei haw hi. Mi a khalhsiat haw ten a nat dan cu aikam i dep na bangkek khi hi.
6 Mah ha nga sungah thihnak zei haw tuk naven tawk haw tukma hi. Thi nuam haw tuk naven thihnakin taisan tuk hi.Ref 9:6 Job 3:21; Jer 8:3
7 Mah khaute cu ngaldo tukin a ngallingmi cipuh bang haw hi. A lu hawah sui lukhu bangmi khu haw in, a mai haw cu mihing mai bang hi.Ref 9:7 Joel 2:4
8 A lu haw a, samte cu numei tei sam bang haw in, a kamsung a, a ha haw cu kiosa ha bang hi.Ref 9:8 Joel 1:6
9 A awm haw cu ngaldonak tuk a bawlmi thik lumphaw tuah tuam haw a, a lennak a ha haw a khen haw ten a ngingmi cu ngaldonak munah a tai limi cipuhleng tampi aw bang hi.Ref 9:9 Joel 2:5
10 Mei nei haw a, aikam bangin mi dep thei haw hi. Ha nga sung mi a bawlsiat theihnak haw cu a mei haw in, mi nattik theihnak huham a neih haw hangin hi.
11 Amuh ten uktu kumpi bawi nei haw in, mah a kumpi bawi haw cu taw nei ngawl khukpi uktu vancungmi hi. A min cu Hebru awnin, Abaddon hi a, Grik awnin Apollion hi. (A sullam cu, “Siatsuahtu” tihnak hi).
12 Lauhuaimi pa khatnak cu bo hi. Himi ceng ten lauhuaimi pa nih heng tuk laih hi.
13 Mahten vancungmi pa luknakin, a pengkul tum hi. Pathian mai a ummi sui biaklandawh kil li pen awn au thawm za ing.Ref 9:13 Suah 30:1-3
14 Mah aw in, vancungmi pa luknak lakah, “Eufrates luipi bulah kencihin, a ummi vancungmi pa lite cu hah toh un,” ti hi.
15 Vancungmi pa lite cu hah haw in, amuhte cu hih hun, ha, ni le kum kekin, mi hempoh i khen thum khenkhat that khawngtu tukin a mansa in koihmi na hi haw hi.
16 Cipuh hum khung ngalkapte cu a venghawng haw in, million za nih haw tin hilh hi.
17 Mahten muhnak ka neihmi ah cipuh le cipuh hum khungtute mu ing. A ngaldonak haw lumphawte cu meiling bangin san, safaia tihmi suang manpha bangin tangphaw pian le kaat bangin aile piante hi. A cipuh tei lu cu kiosa lu bang hi in, a kam sung haw pen mei alh, meikhu le kaat meite tul hi.
18 Mah cipuh kam pen a tulmi, mihing siatsuahtu phun thum, mei alh, meikhu le kaat mei in mihing khen thum khenkhat that khawng hi.
19 Cipuh tei huham neihnak cu a kam haw le a mei hawah hi. A mei haw cu ngul bang hi a, lu nei haw in; mah a lu haw cu mihingte liamsuah siatsuahnakin mang haw hi.
20 Hi mihing siatsuahtu pulhnat phun thum tei thah ngawlmi mihing ten amu bawlcopmi thil zamsan nuam cuang haw ma hi. Khawhuai biaknak, sui, ngun, daal, suang le thingtuah bawlcop milim, imah zak theih ngawl, muh thei ngawl, vak theih ngawlnak le awn thei ngawlmi biaknakte cawl cuang haw ma hi.Ref 9:20 Saam 115:4-7; 135:15-17; Dan 5:23
21 Mahbek sial ngawlin mithahnak mitzial bawlnak, nupa sualnak le ngukcaknakte pen sikkik nuam cuang haw ma hi.