8
Tacik Salihnak
1 Tuuno in, tacik salihnak a hon ten vanhumah awn au imah um ngawlin nazi lang sung hawng dai diudeu hi.
2 Pathian mai a dingtu vancungmi salih mu ing. Amuh tei lakah pengkul salih pia haw hi.
3 Adang vancungmi pa khatin pak namtui halnak sui khuat cawi in, biaklandawh bulah ding hi. Pathian i mihing tei thungetnak tuah piakcih tuk le kumpi khunnak mai a dingmi sui biaklandawh humah piak tukin mah vancungmi lakah pak namtui tampi pia haw hi.Ref 8:3 Amos 9:1; Suah 30:1,3;
4 Pathian mai a dingtu vancungmi i khut pen pak namtui halnak meikhu cu Pathian mitei thungetnak tuah munkhatin humlamah kaito hi.
5 Mahten vancungmi in pak namtui halnak khuat khi la in, biaklandawh a mei cu a sungah a thun ceng ten leihumah vawk hi. Mahbek ten vanthumin, kekta a, khuaphelepin hiinhing hi.Ref 8:5 Thiam 16:12; Ezk 10:2; Suah 19:16; Mang 11:19; 16:18;
Pengkulte
6 Mahten vancungmi salih ten pengkul salih tum tukin mansa in um haw hi.
7 Vancungmi pa khatnakin, a pengkul a tum ten nial le mei, thisan tuah cokhelin leihumah nguah bangin zusuk luluih hi, leipi i khen thum khenkhat kang khawngin, thingkung khen thum khenkhat le hamhing hempoh kang khawng hi.Ref 8:7 Suah 9:23-25; Ezk 38:22;
8 Vancungmi pa nihnakin, a pengkul cu a tum ten a alh dudum mualpi bang khi tuipi thuanthum sungah vawk haw hi. Mahten tuipi i khen thum khenkhat cu thisan suak khawng hi.
9 Tuipi sung a, nganhing khen thum khenkhat thi khawng haw a, hawmkuang khen thum khenkhat sia khawng hi.
10 Vancungmi a pa thumnakin, a pengkul tum hi. Mahten aksi ngengzet pa khat mei alh bangin alh limi cu van pen cakin, luitui le ciktuite khen thum khenkhat humah cak hi.Ref 8:10 Isa 14:12;
11 Mah aksi i min cu, “A Kha mi,” hi. Tui khen thum khenkhat cu tuikha suakin, mihing tampi mah tui kha a in haw hangin thi haw hi.Ref 8:11 Jer 9:15;
12 Mahten vancungmi pa linakin, a pengkul a tum ten, ni khen thum khenkhat, hade khen thum khenkhat le aksi khen thum khenkhat cu thim hi. Mah hangin khuavaknak khen thum khenkhat pai hi. Sun khen thum khenkhat le zan khen thum khenkhatah khuavak ma hi.Ref 8:12 Isa 13:10; Ezk 32:7; Joel 2:10, 31; 3:15;
13 Mahten zo ing a, van zaangzawl a lengmi muvanlai pa khatin nging zetin, “Lauhuai dan! Lauhuai dan! Vancungmi pa thum ten a pengkul a tum haw ten leihum a ummi hempoh tei ca izahtak lauhuai kaw!” tin ti hi.