10
Vancungmi le Laizialno
1 Mahten a ngil zetmi vancungmi pa khat cu vancung pen a tolhsuk mu ing. Amah cu meingo in tuam a, a lu elkimah uical um hi. A mai cu ni bangin vak hi, a ke cu mei alh khuam bang hi.
2 A khutah laizial neuno phalh sa cawi hi. A taklam ke in tuipi sik a, a veilam ke in leihum sik hi.
3 Nging zetin, a aumi cu kiosa tampi aw bang hi. Mahtin a au ceng ten vanthum salih ten tol dudumin aw ngingzet tuah don bok haw hi.
4 A ot bek haw ten lai tuah ngan tukin el ing. Mahnaven van pen aw pa khat nging za ing hi, “Van thum salih tei otmi cu imdenin koihin, lai tuah ngan pahsun,” ti hi.
5 Mahten ka muhsa vancungmi, tuipi le leihum a, a dingtu in vanlamah a taklam khutzaakto in,Ref 10:5-7 Suah 20:11; Daan 32:40; Dan 12:7; Amos 3:7;
6 Kumkhua a nungmi Pathian, van le leipi, tuipi le a sungah a um hempoh a bawltu Pathian min salin thutiamnak bawl hi. Mahten vancungmi in, “Ngei tukma toh!
7 Vancungmi salihnak i pengkul a tum ten a sila profet tei lakah hilh kuhin, a hilhsami, a tuptahmi le a ngaihsutnakte Pathian in kimtik tuk hi,” ti hi.
8 Mahten vancung pen aw ka zakmi in, a otpih lehmi cu, “Hawh inna, tuipi le leihum a, a dingtu i khut sungah a ummi laizial phalhsami khi la in,” ti hi.Ref 10:8 Ezk 2:8-3:3;
9 Vancungmi lakah hawh ing a, laizial neuno cu ngen ing. Amah in, “La inna, ei in, na pum sung pen kha tuk naven, na kam sung pen khuaitui bangin hum tuk,” ti hi.
10 A tihnak bangin la in, ka eih ten ka kam sungah khuaitui bangin hum hi. Mahnaven ka hem ten ka pum sungah khazet hi.
11 A hilh betmi cu, “Pathian i ngam tampi, hin tampi, awn tampi le kumpi tampi tei lakah a cahmi thu khi phuangin,” ti hi.