7
Israel Mi Thawng Za, Thawng Sawm Li le Thawng Li
1 Mahceng ten lei ningli a dingmi vancungmi pa li mu ing. Mah vancungmi pa li ten leihum le tuipi humah le thingkungah huihtheu tuk ngawlin kham haw hi.Ref 7:1 Jer 49:36; Dan 7:2; Zek 6:5;
2 Nisuahnak lam pen a nungmi Pathian i melciknak tacik cawitu a dang vancungmi pa khat tul khi mu ing. Pathian in leipi le tuipi siatsuah theihnak thu a piakmi vancungmi pa li nging zetin sam hi.
3 Vancungmi in, “Ka Pathian uh i nadektu sila tei calah tacik a khet laklawh hun sung cu leipi, tuipi le thingkungte siatsuah hih pahsuh un,” ti hi.Ref 7:3 Ezk 9:4,6;
4 Mahten Pathian melciknak tacik khetnakin, a cal hawah khetsa mite cu thawng za le thawng sawm li le thawng li hi tin hilh haw hi. Mahmite cu Israel minam sawm le pa nih sung pen haw hi.
5 Judah hinnam, Reuben hinnam, Gad hinnam,
6 Asher hinnam, Naftali hinnam, Manasseh hinnam,
7 Simeon hinnam, Levi hinnam, Issakhar hinnam,
8 Zebulun hinnam, Josef hinnam, le Benjamin hinnam pen thawng sawm le thawng nihte ten haw hi.
Sialcelh Ngawl Mipi
9 Mahceng ten ka zo le mipi tamzet mu ing. Kuamah i sialcelh ngawl mipi hi. Amuhte cu mi phunkim, hinnamkim le awn phunkim pen hung mite hi haw in, kumpi khunnak le Tuuno mai ah ding haw; puan ngo silh haw in, a khut hawah suhsau kang cawi tek haw hi.
10 “Nunpatnak cu kumpi khunnak humah a khungtu Pathian le Tuuno lak pen hung hi,” tin ngingzet au haw hi.
11 Vancungmi hempoh cu kumpi khunnak, upate le thilnung pa li elkimah ding haw in, kumpi khunnak mai ah lu kunin, Pathian bia haw hi.
12 “Amen! thangphatnak, sunloihnak, cihnak, lungdamnak, upatnak, ngilnak le huham cu kumkhua in oh tei Pathian ta hi tahen! Amen,” tin ti haw hi.
13 Upa sawm nih le pa li lak pen pa khatin, “Hi puan ngo silhtute hi a kuate kaw? Ilai pen hung haw him?” tin dong hi.
14 “Thei ma sing, Topa, nangmah in thei saw tuk ci,” tin donleh ing. Amah in, “Hi mite cu bawlsiatnak nasezet sung pen a himno in, a suakmite haw hi. A puan haw cu Tuuno thisan sungah sawpin, ngotik zo haw hi.Ref 7:14 Dan 12:1; Mt 24:21; Mk 13:19;
15 Mah hangin Pathian i kumpi khunnak mai ah dingin biakinn sungah sun le zanin nadek haw hi. Kumpi khunnak humah a khungtu in umpih tuk a, mah a umpihnak cu a himnak le a luatnak haw hi tuk hi.
16 A ngil haw kialin, dangdumleh haw tukma toh hi; nisa le khua-um tulnak vang thuak haw tukma toh hi.Ref 7:16 Isa 49:10;
17 Itahim titale kumpi khunnak laizang a ummi Tuuno cu amuhte cingtu na hi tuk a, nunnak piatu ciktui umnakah pui tuk hi. Mahten a hitui haw hempoh cu Pathian in huksak khawng tuk,” ti hi.Ref 7:17 Saam 23:1; Ezk 34:23; Saam 23:2; Isa 49:10; 25:8;