6
Tacik Pa Lukte
1 Mahten Tuuno in tacik salih lak pen pa khat a duh khi mu ing, sahang pa li lak pen pa khatin, a aw vanthum bangin, “Hungin hi” tin a tihmi za ing.
2 Ka zoh ten cipuh ngo pa khat mu ing. A hum khungtu pa in thal kahnak saili pa khat cawi hi; amah cu kumpi lukhu pia haw hi, ngalnehtu in ngal neh tuk a hawh bangin cipuh hum khungin hawh hi.Ref 6:2 Zek 1:8; 6:3,6;
3 Tuuno in tacik pa nihnak a duh ten sahang pa nihnakin, “Hungin hi,” tin a tihmi za ing.
4 Adang cipuh san pa khat tul hi. A hum khungtu pa i lakah leihum ngalpi phuak tuk thuneihnak pia haw hi; mahten mihingte pa khat le pa khat thatdun thei tukin, namsau ngengpi vang pia haw hi.Ref 6:4 Zech 1:8, 6:2;
5 Tuuno in tacik pa thumnak a duh ten sahang pa thumnakin, “Hungin hi,” tin a tih khi za ing. Ka zoh ten cipuh hang pa khat mu ing. A hum khungtu pa in cuaikhainak pa khat cu a khutah cawi hi.Ref 6:5 Zech 6:2, 6;
6 Sahang pa li lak pen aw nging bang ka zakmi in, “Ni khat thaman sangvut pawng khat ni khat thaman barli pawng thum. Mahnaven olif kung le sabit huan cu siatsuah pahsun,” ti hi.
7 Tuuno in tacik pa linak a duh ten sahang pa linakin, “Hungin hi,” tin a tih khi za ing.
8 Ka zoh ten cipuhngo pa khat mu ing. A hum khungtu pa i min cu ‘Thihnak,’ tih na hi a, a nung pen mithi khua in zui hi. Amuhte cu leihum mihing hempoh i khen li khenkhatte khi, ngaldonak, paamnak, natnak le sahang tei bawlsiatnak tuah thah theihnak tuk thuneihnak piakmi na hi haw hi.Ref 6:8 Ezk 14:21;
9 Tuuno in tacik pa nganak duuk hi. Pathian thu a hilh haw hangin le muantak zetin, a phuan ngamnak haw hangin, thahnak tawktu tei hawvangte cu biaklandawh nuai ah mu ing.
10 Amuh ten nging zetin hitin au haw, “A thiangthomi le a dikmi Cungnungbel Topa aw, leihummi, kohte thatin, thi a luangtiktu hi phu la ngawlin le dantat ngawlin na um tuk,” tin ti haw hi.
11 Amuhte cu puan ngo pa khat ten piak hi haw in, “Nangmuh bangin thahnak thuak tuk na unaupih le na sangngamte a kim laklawh hun comno sung um hih un,” tin hilh haw hi.
12 Tuuno in tacik pa luknak a duh khi mu ing. Hiinhing nase zetin, ni cu puansia haang bangin haang a, hade cu thisan bangin san hi.Ref 6:12 Mang 11:13; 16:18; Isa 13:10; Joel 2:10, 31; 3:15; Mt 24:29; Mk 13:24-25; Lk 21:25;
13 Mahten aksite cu lei ah huihpi in theikuh a muhvawk bangin mutvawk hi.Ref 6:13 Isa 34:4;
14 Van cu laidalpi bangin zialin thamthongta hi. Mual le tuikulhte a umnak tek haw pen thawn khawng haw hi.Ref 6:14 Mang 16:20;
15 Mahten leihum bawite, ngam uktute, ngalbawite, mihau, thuneitute, midang hempoh, sal le miluatte tuah suanghol sung le mualhum suang nuai ah ngelh haw hi.Ref 6:15 Isa 2:19, 21;
16 Mual le suangpi tei lakah, “Keimuh hu delh unna, kumpi khunnak a, a khungtu mitmai le Tuuno thinuknak pen sel zazal un.Ref 6:16 Hos 10:8; Lk 23:30;
17 A thinuknak hangin, a lauhuai zetmi ni cu heng zo hi, akua kaw a thuak thei tuk,” tin au haw hi.Ref 6:17 Joel 2:11; Mal 3:2;