3
Sardis Pawlpi Tei Lakah Thucah
1 “Sardis pawlpi i vancungmi lakah hi bangin nganin hi:
“Pathian i hawvang salih le aksi salih neitu i thucahmi cu hi bangin hi. Na nadehmi thei ing, a nungmi pawlpi tin na minthangzet naven a thi na hihlam thei ing.
2 Mah hangin khanglo inna, na neih laihmi a thi suak laih ngawlin thazaang a thakin la lehin hi. Itahim titale na nadeh sa hi Pathian mai ah cangkim ma laih tin mu ing.
3 Mah bangin a zilh haw mi le na zaksa mite hi phawkngil pahsun: a zui tum inna, na sualnak pen kiklehin hi. Khanglo ngawlin na um tale nguca bangin na lak ka hunlam thei tukma ci.Ref 3:3 Mt 24:43-44; Lk 12:39-40; Mang 16:15;
4 Mahnaven Sardis khua a ummi sung pen mi demno ten na puan uh ciang zetin koih uh ci. Puan ngo silhin, keimah tuah hawh tuk uh ci; itahim titale mahtin hawh tukin phu uh ci.
5 Nehtute cu mahti bangin puan ngo silh haw tuk a, nunnak laibu sung pen a min haw phiat tuk mang hi. Ka pa le a vancungmi tei lakah kata hi haw hi, tin ciang zetin hilh tung hi.Ref 3:5 Suah 32:32-33; Saam 69:28; Mang 20:12; Mt 10:32; Lk 12:8;
6 Beng a nei hempoh ten Hawvang Thiangtho in pawlpi tei lakah a hilhmi cu ngai un! ti hi.
Filadelfia Pawlpi Tei Lakah Thucah
7 “Filadelfia pawlpi i vancungmi lakah hi bangin nganin hi.
“A thiangthomi le a dikmi i thucahmi cu hi bangin hi.
Amah cu David i tawh keemtu na hi a, kongka a honmi kuamah in khak thei haw tukma hi. Ama khahmi cu kuamah in hong thei haw tukma hi.Ref 3:7 Isa 22:22; Job 12:14;
8 Na nadehmi thei ing. Na zaangtha dawm tihvang thei ing. Mahnaven ka thuzilhmi zui in muantakin um ci. Na mai ah kongka hong ing a, kuamah in khak thei haw tukma hi.
9 Ngai un! Judah mi hi ung ti sihin, ahi ngangai ngawl zolthu sontu Satan mihingte cu na lakah hawhin, na mai ah kuntik tung hi. Nangmah ka ihnak thu hi a venghawng haw in thei haw tuk hi.Ref 3:9 Isa 49:23; 60:14; 43:4;
10 Ka thupiakmi bangin thinsau in haksatnak na thuak theih hangin leihummi hempoh thiatha zohnakin, a heng tukmi haksatnak sung pen luattik tung hi.
11 Hungpal tung. Nehtu na hihnak hangin na ngah tukmi laksawng cu kuamah i lonsak theih tuk ngawlin na neihsami komzet kemin hi.
12 Nehtu cu ka Pathian i Biakinn sungah sutpi khuamin bawl tung a, mah Biakinn cu taisan awng tukma hi. Ka Pathian i min vang a humah ngan tung. Mah khuapi cu vancung ka Pathian lak pen a heng tukmi hi. Mahten ka min thak vang a humah ngan tung hi.Ref 3:12 Mang 21:2; Isa 62:2; 65:15;
13 Beng nei hempohin, Hawvang Thiangtho i pawlpi tei lak a hilhmi cu za haw tahen! ti hi.
Laodisia Pawlpi Tei Lakah Thucah
14 “Laodisia pawlpi i vancungmi lakah hi bangin nganin hi.
“Amen tihmi, muantak le theitu tetti dik hi in Pathian i semsuahmi hempoh tei bulpi, a tawpatnak i thucahmi cu hi bangin hi.Ref 3:14 Thup 8:22;
15 Na nadehmi thei ing. Dap le dap sih ngawl, sa le sa sih ngawl na hihlam thei ing. Na dap tale dap vanglak inna, na sa tale sa vanglakin tih deih ing.
16 A dap le dap ngai sih ngawl, sa le sa si ngawl, lum pelhpulh na hih hangin ka kam pen sia tul tung hi.
17 Nangmah in, “Kei cu mihau mi neinung ing, ka kin ka sapmi hempoh nei ing,” tin ti ci. Mahnaven nangmah cu mi ca-ngah, mi hehpihhuai na hihlam theidun cawm ma ci. Nangmah cu mi ca-ngah, puansilh ngawl thacang le mitcaw mi hi ci.
18 Ngaihsutnak ka piakmi cu sui ngangai ka lak pen lei inna, hau tuk ci. Puan ngo vang lei in silh inna, zahcakhuai thacang a na ummi cu hupin hi. Na mit khua na muh theihnak tukin mitna sii lei inna noihin hi.
19 Ka it ka deihmite cu liatin dantat ing. Mah a hih hangin hantiam inna, sualnak pen kiklehin hi.Ref 3:19 Thup 3:12; Heb 12:6;
20 Ngai tehin; kongka bulah dingin kongka kiu ing. Akua hei hihen, ka aw za in, kongka a hon tale, a inn sungah tumin, a lakah an ei tung a, amah vang keimah tuah an ei bok tuk hi.
21 Nehtu hi zo ing a, atu-in ka pa i kumpi khunnak humah ka khun bangin nehtute cu ka kumpi khunnak humah khun theihnak thupia tung hi.
22 “Beng a nei hempohin, Hawvang Thiangtho i pawlpi tei lakah a hilhmi cu ngai un!” ti hi.