2
Efesa Pawlpi Tei Lakah Thucah
1 “Efesa Pawlpi i vancungmi lakah hi bangin nganin hi. A taklam khutah aksi salih cawi in, sui meivaknak salih lak a, a vak kawkawi litu i thucahmi cu hi bangin hi.
2 Na nadehnak thei ing; teima zetin, na nadehdan le thinsau zetin, na um zia thei ing. Mahten mipha ngawl tei humah thincom ngawl a na um zia, le nungzuitu hi ngawl napi nungzuitu hi ung titu khi dongkanin zolthuson a hihnak haw na muh khawngnak thute thei khawng ing hi.
3 Na thinsau in, keima hangin thuak navecin, thakiam ma ci.
4 Mahnaven mawhsiat tuk pa khat na humah nei ing; a masa a na neihmi itnak cu atu-in nei lehma toh ci.
5 Na caksuknak a san zia hi ngaisungin! Na sualsik inna, masa a na bawlmi khi bawllehin, na sualnak na zamsan ma tale hung tung a, na meivaknak mundangah thawnsak tung hi.
6 Mahnaven pahhuaizet na hihnak pa khat um hi. Nikolas zuitu tei nadehnak cu keima huat bangkekin hua bok ci.
7 Beng nei na hi uh tale hawvang i pawlpi tei lak a hilhmi cu ngai un hi. Nehtu tei lakah Pathian huan sung a po mi nunnak thingngah eih theihnak thupia tung hi,” ti hi.Ref 2:7 Pian 2:9; Mang 22:2; Ezk 28:13; 31:8;
Smyrna Pawlpi Tei Lakah Thucah
8 “Smyrna pawlpi i vancungmi lakah hi bangin nganin hi.
“A bulpatnak le tawpnak, thi naven a nunglehmi i thucahmi cu hi bangin hi.Ref 2:8 Isa 44:6; 48:12; Mang 1:17; 22:13;
9 Haksatnak na thuak thei ing. Mi ca-ngah na hihlam vang thei ing; mahnaven a ngangai in mihau hi ci. Judah mi hi ung ti haw naven ahi ngangai ngawl tei a sonsiatnak haw vang thei ing. Amuh cu Satan tahaw hi.
10 Na thuak tukmi haksatnak cu lau pahsun, Satan in mi khenkhat thawngah khiak tianin teh tuk hi. Ni sawm sung haksat thuak tuk ci. Thihnak tian thuak tuk ahi hei in, muantakin um unna, na neh man uh nunnak sui lukhuh pia tung hi.
11 “Beng a nei ten Hawvangin pawlpi lakah a hilhmi ngai un, “Nehtu cu vei nih thihnak pen luat haw tuk hi,” ti hi.Ref 2:11 Mang 20:14; 21:8;
Pergamum Pawlpi Tei Lakah Thucah
12 “Pergamum pawlpi i vancungmi lakah hi bangin nganin hi.
“Namsau lang nih hiam neitu i thucahmi cu hi bangin hi.
13 Na umnak mun cu thei ing: Satan in, a kumpi khunnak a koihnak mun hi. Ka ca in muantak zetin nung ci; Satan umnak munah muantakmi ka thu theihpihtu Antipas a thah laih haw hei in, ka hum a, upnak na neihmi kiam cuang ma ci.
14 Mahnaven na humah lungkim ngawlnak dawm nei ing; nangmu sung pen Balaam i zilhnak zuitu khenkhat um haw hi. Milim biaknak an eihnak le nupa sualnak bawlin sualnak lamah lamhuai tukin Balak zilhtik hi.Ref 2:14 Mipum 22:5,7; 31:16; Daan 23:4; Num 25:1-3;
15 Mahti bang bokin Nikolas zuitu tei zilhnak a zuitute vang um haw hi.
16 Mah hangin hiti bang sualnak pen kikleh un. Na kikleh uh ma tale nangmuh tei lakah manlangin hung tung a, mahmite cu ka kam sung pen a tulmi namsau tuah do tung hi.
17 “Beng na nei uh tale Hawvang Thiangtho i pawlpi tei lakah a hilhmi cu na ngai un.
“Nehtute cu selmi manna moh khenkhat pia tung hi. Mah i humah suangpeek ngo pa khat ten pia tung a, mah suangpeek ngo humah a cotu tuk tei theihmi amuh tei min thak ngatin um tuk hi,” ti hi.Ref 2:17 Suah 16:14-15; 16:33-34; Jn 6:48-50; Isa 62:2; 65:15;
Tiatira Pawlpi Tei Lakah Thucah
18 “Tiatira pawlpi i vancungmi lakah hi bangin ngan hi.
“A mit mei alh bang vak a, a ke cu ciangzet nawtmi daal bangin a de mi Pathian Capa i thucah cu hi bangin hi.
19 Na nadehmi thei ing. Itnak na neihzia, muantak na hih zia, na nadeh zia le thinsaunak na neih dante thei khawng ing. Amasa sangin atu-in, tam saw in dek ci tihvang thei ing.
20 Mahnaven ka mawhsiatnak pa khat um hi. Mahmi cu Pathian i kamtai ing hi tin amahno a tidun cawmtu numei Jezebel na hahzau thongmi khi hi. Jezebelin ka mihingte lampui sualin, nupa sualnak bawlin milim biaknak ante ei haw hi.Ref 2:20 1Kum 16:31; 2Kum 9:22, 30;
21 A sihkik lehnak tukin hun pia naveng a nunsualnak lampi pen kikleh nuam ma hi.
22 Mah hangin natnak tuah zaunak humah koih tung a, amah tuah nupa sualnak a bawltute cu nase zetin thuak haw tuk hi. Amah tuah thilpha ngawl sualnak a bawlte a sihkikleh haw ma tale cu thuaknakte hi atu loli in, a hum hawah hengtik tung hi.
23 Amah zuitute vang that khawng tung a, mahten pawlpi hempoh ten mihing tei ngaihsutnak hempoh le deihnakte thei khawngtu ka hihlam thei haw tuk hi. Akua abang vang na bawlnak uh bangkekin pia kikleh tung hi.Ref 2:23 Saam 7:9; Jer 17:10; Saam 62:12;
24 Mahnaven Tiatira khua a ummi midang ten hi zilhnak pha ngawl cu zui ma uh ci a, midang tei, “Satan i selmi thukuh,” tihmi thei ma uh ci. Noh tei lakah hilh ing hi, na hum uhah vanngit suan thuah tuk mang.
25 Na pom sa, na neihsa uhmi hi ka hunleh laklawh hahsuah pahsuh un.
26-28 Nehtute le ka deihnak bangin a tawp tian a bawltu tei lakah, ka Pa i lak pen ka ngahmi thuneihnak pia tung hi. Minam hempoh tei humah uk theihnak pia tung; Thik thiangkhut tuah uk theihnak le lei beel bangin sukkeh theihnak thu amuhte pia tung. Ni konghong aksi vang amuhte pia tung hi.Ref 2:26-28 Saam 2:8-9;
29 Beng a nei hempohin, Hawvang Thiangtho i pawlpi tei lak a, ka hilhmi cu ngai un! ti hi.