4
Vancungah Pathian Biaknak
1 Mahceng ten muhnak adang pa khat ka neihmi cu Vanah kongka pa khat hongin mu ing. Mahten a masa a ka zakmi pengkul aw bangin a ngingmi aw in, “Hilai ah hungto inna, hi ceng ten a piang tukmi lak tung hi,” tin ti hi.
2 Phawhkhak ngawlin hawvangin zial hi. Vancungah kumpi khunnak pa khat umin, a humah mi pa khat khung hi.Ref 4:2 Ezk 1:26-28; 10:1;
3 A mitmai cu suang manpha jasper le suang manpha Karnelian bangin de selsul hi; a kumpi khunnak elkim cu emerald suang manpha i pianzia bangin uicalin kiim pimpem hi.
4 A kumpi khunnak elkimah a dang kumpi khunnak sawm nih le pa li na um a, mah i kumpi khunnak humah puan ngo silhin, sui lukhu khu in upa sawm nih le pa li khung haw hi.
5 Mahmi kumpi khunnak pen khuaphelep zawzok le vanthum dudum thawm thang hi. Mah kumpi khunnak mai ah meivak salih um hi. Mah meivak salihte cu Pathian hawvang salihte hi haw hi.Ref 4:5 Suah 19:16; Mang 8:5; 11:19; 16:18; Ezk 1:13; Mang 1:4; Zek 4:2;
6 Kumpi khunnak mai ah suang manpha bangin a thiang kilkelmi thalang tuipi um hi.Ref 4:6 Ezk 1:22;
Kumpi khunnak elkimah, a nung le mailamah mit tuah a dimmi sahang pa li um haw hi.
7 A pa khatnak sahang cu kiosa bang hi, a pa nihnak cu khuicang bang, a pa thumnak cu mihing i mel bang hi in, a pa linak cu a leng li laihmi mupi bang hi.Ref 4:7 Ezk 1:5-10; 10:14;
8 Mah nganhing pa li ten ha pa luk ten nei haw a, mah hate cu a sunglam, a pualamin mit nguakcang tuah dim hi. Sun le zan catngawlin,
“Thiangtho, Thiangtho, Thiangtho,
Cungnungbel Topa Pathian,
um zo, umlaih le a um tuk laihmi hi,”
tin lasa haw hi.Ref 4:8 Ezk 1:18; 10:12; Isa 6:2-3;
9 Sahang pa li ten kumpi khunnak humah khungin, kumkhua pen kumkhua tian a nungmi lakah sunloihnak, upatnak le lungdamnak lasa haw hi.
10 Mahti bangin la a sak haw ten kumpi khunnak humah a khungtu mai ah upa sawm nih le pa li ten kunin, kumkhua in kumkhua tian a nungmi cu bia haw hi. A sui lukhu haw cu kumpi khunnak mai ah koihin;
11 “Kohtei Topa le Pathian,
nang cu sunloih upat le
huham ngah takmi hi ci.
Itahim titale nangmah in
ihempoh semsuah ci a,
na thu in umtikmi le
nuntikmi haw hi,”
tin ti haw hi.