MANGMUHNAK
Johan i Mangmuhnak
(The Revelation to John)
Thulamsial
Johan i Mangmuhnak hi Khristian tei bawlsiat le haksat a thuak laih haw hunin ngatmi hi. Bawlsiat a thuaknak haw cu Jesuh Khrih a upnak haw hangin hi. Laingantu pa i deihsanbelmi cu laisialtute muansannak tuah thatho le lungtho in um haw hen tin thapia nuam hi. Haksatnak le bawlsiatnak a thuak laihtak haw in, Khrih a upnak haw taisan ngawlin a khohkhah theihnak haw tukin sosuah hi.
Hi laibu sungah a tam saw cu Johan lak a, phuansuahmi le Johan in, a manglam bangin a muhmi thute hi. Hi phuanmi le muhmi thute cu a limlaknak phuanmi a hih hangin a sialtu Khristian ten a sullam thei haw tuk naven midang tei ca in sullam nei ngawl thu-ipmi bang hi. Mahnaven theih theihnak tuk tampi um leng hi. Pathian thangphatnak la a sak uhten thu bulphuhbelmi, saknot a sak thuah lih uh bangin hi. Mangmuh laibu sungah a thu bulphuhmi cu muhnak le phuansuahnak a phunkimin phuan thuah le hilh thuah lihin um hi. Hi Mangmuh laibu sung a, thu noinangte ah dangdun bang naven updan le pomdan bangten hi. Mah bulphuhmi thu cu; Pathian in Topa Jesuh Khrih mangin, a ngalte hempoh le Satan vang neh khawng tuk a, mahmi nehnak cangkim hun a hen ten amah a umtu le muantakmite cu van thak le lei thak co theihnak thupha muicu laksawng pia tuk hi, tihmi hi.
1
Johan i Mangmuh
1 Hi thu hi Jesuh Khrih i phuanmi hi: A hengpal tukmi nate, a sila tei lakah langtik tukin Pathian in, a lakah a phuanmi hi. Mahmi cu Khrih in, a vancungmi pa khat hahin, a sila Johan lakah a theihtikmi hi.
2 Johan in, a muhmi hempoh cu hilh khawng hi. Pathian lak pen a hungmi thuthang le Jesuh Khrih i theihtikmi thutak cu Johan in hi bangin hilh hi.
3 Hi laibu a sialtu le profet i phuanmi thu a zatu le a sung a ngatmi a zuitute cu thupha co mite haw hi. Itahim titale hi thute a kimnak tuk hun nai zo hi.
Pawlpi Salih Tei Lakah Nuksatnak
4 Asia ngamsung a ummi pawlpi salih tei lakah keimah Johan in hitin nuksat ing. Tu laih takin, a ummi le a um awng zo mi le mailam hei ah a um tuk laihmi Pathian le a kumpi khunnak mai a ummi hawvang salih le,Ref 1:4 Suah 3:14; Mang 4:5;
5 A muanhuai theihpihtu, hin masakbel Capa, thihnak pen thawh kiklehtikmi leihum kumpite uktu Jesuh Khrih i hehpihnak le lemdaihnak thupha cu nohtei humah um tahen.
Ohte it in, a thihnak hangin sualnak pen luattik zo hi.Ref 1:5 Isa 55:4; Saam 89:27;
6 A Pathian le a pa i nadektu hi tukin ohte cu kumpi le thiampi phunin, a bawlsaktu Jesuh Khrih lakah sunloihnak le huham cu kumkhua in um tahen! Amen.Ref 1:6 Suah 19:6; Mang 5:10;
7 Zo un! Khrih cu meingo hum pen hung tuk a, mi hempoh ten mu haw tuk hi; amah a suntute vangin mu bok haw tuk hi. Leihum mi hempoh ten sikkikin, kap haw tuk hi. Mahtin um tatak tuk hi! Amen.Ref 1:7 Dan 7:13; Mt 24:30; Mk 13:26; Lk 21:27; 1Thes 4:17; Zek 12:10; Jn 19:34, 37;
8 Cungnungbel Topa Pathian in, “Kei cu Alfa le Omega, ihempoh i bulpatnak le a tawpnak ing.” A bosa hun, tu hun le a heng tuk laihmi hunah hei in, a um leleng tukmi ing, ti hi.Ref 1:8 Mang 22:13; Suah 3:14;
Johan In Khrih A Muhnak
9 Keimah cu na unaupih uh Johan ing hi, Jesuh i nungzuitu pa khat ka hihnak hangin nangmuhte tuah langkhatin Khrih uknak sungah a teltu tei hum a haksat thuaknakte ah, a thuak litu bok ing hi. Pathian thu le Jesuh i phuansuahmi thudik ka hilhnak hangin Patmos tuikulhah a koihmi haw ing.
10 Topa i Ni in, Hawvang tuah ka dim laih takin, ka nunglam pen pengkul aw bang awn ngingzet za ing.
11 Mahmi aw, ngingin, “Na muhmi hilai sungah ngan inna, mah laibu cu Efesa, Smyrna, Pergamum, Thiatira, Sardis, Filadelfia le Laodisia khua salih a ummi pawlpi tei lakah kuatin,” ti hi.
12 Mahtin a titu cu akua him tin hekkikin ka zoh ten sui meivaknak salih mu ing.
13 Mah meivak tei lakah, mihing bang pa khat angki cualpi a ke mit tian silhin, a awmah sui awmkilh kilhmi mu bok ing.Ref 1:13 Dan 7:13; 10:5;
14 Mahmi pa i sam cu tuumul le vuk bangin ngo hi.Ref 1:14-15 Dan 10:6; A mit cu mei alh bang hi.Ref 1:14 Dan 7:9
15 A ke cu pumsuknak meiling sungah haltui celh ten tah lehmi daal bangin de hi. A aw cu teusang tuicak aw bang hi.Ref 1:15 Ezk 1:24; 43:2;
16 A taklam khutin aksi salih na cawi a, a kam sung pen lang nih hiam namsau pa khat tul hi. A maicang cu suun laihtak ni bangin khap hi.
17 Mahtin ka muh ten mithi bangin a kebulah lum ing. A taklam khut cu ka humah nga in, “Lau pahsun, Keimah cu a bulpatnak le a tawpnak ing hi;Ref 1:17 Isa 44:6; 48:12; Mang 2:8; 22:13;
18 A nungmi hei hi ing. Thi zo na vengin atu-in kum zangza ca in nungleh zo ing. Thihnak le mithi khua ah thuneitu ing hi.
19 Mah hangin na muhmi nate, tulaihtak a, a ummi le mailam a, a um tuk laihmite hi nganin hi.
20 Ka taklam khut a na muhmi aksi salih le sui meivaknak salih tei sullam thu-ip cu hitih bangin hi. Aksi salih cu pawlpi salih tei vancungmite hi haw a, mei vaknak salih cu pawlpi salih hi haw,” ti hi.