18
Babilon Caksuknak
1 Mahceng ten vancungmi pa khat cu van pen a tolhsuk khi mu ing. Amah in thuneihnak huham ngengzet nei in, a vaknakin leihum buppi vaktik khawng hi.
2 Nging zetin hi bangin au hi. “Numei nu cu caksuk zo! A ngeng zetmi Babilon cu caksuk zo! Khawhuai le hawvang siasuak ten luah haw in, a sungah ningdelhhuai le mitkem hah vanote dim haw hi.Ref 18:2 Isa 21:9; Jer 51:8; Mang 14:8; Isa 13:21; Jer 50:39;
3 Itahim titale hinnam hempoh ten tisa nopsaknak, sualnak zu in haw a, kham khawng haw hi. Kumpi bawite tuah nupa sualnak bawl haw hi, “Sumbawlte vangin supnak nei ngawl numeinu i tisa nopsaknak hangin mihau suak haw,” ti hi.Ref 18:3 Isa 23:17; Jer 51:7;
4 Mahten aw dang pa khat vancung pen ka zakmi cu hi bangin hi.
“Tul un, ka mihingte;
Hi nu i lak pen tul un,
a sualnak sungah tel pahsuh un,
dantat a tawhnakah vang
tel kha pahsuh un.Ref 18:4 Isa 48:20; Jer 50:8; 51:6,45;
5 Itahim titale a sualnak cu
van khongto in,
a phatngawlnak cu
Pathian in cing leleng hi.Ref 18:5 Pian 18:20-21; Jer 51:9;
6 Nangmu humah a bawl bangkekin
ama humah bawlbok un.
A bawlmi i let nihin phuba la un.
Nangmu intukin,
a tawhhelmi sangin han saw deuhin,
a intuk khuat sungah
tawhhel sak un.Ref 18:6 Saam 137:8; Jer 50:29;
7 Sunloihnak le nunnopnak amahno
a piakdun cop zahin
natnak le khaw-ngaihnak pia un.Ref 18:7-8 Isa 47:7-9;
Itahim titale
a lungmu sungno in,
‘Hilai ah khung ing,
kumpinu hi ing,
meivong kha mang,
khaw-ngaihnak tawk awng tuk mang,’
tin ti hi.
8 Hitih bang a hih hangin,
ni khat sungin
a humah pulhnat tung tuk a,
natnak, khaw-ngaihnak le
paamnak le mei tuah halnak
tawk tuk hi.
Itahim titale a thu a khentu
Topa Pathian cu
Cungnungbel hi,” ti hi.
9 Lei tisa sualnak le taksa nopsaknak sungah a teltu leihum kumpi bawi ten Babilon khuapi meikang khu amuh haw ten kapin au haw tuk hi.Ref 18:9-10 Ezk 26:16-17;
10 Mahti bangin a thuaknak amuh haw ten thuak kha bok sual kawn ung tih lau in, khawla thimah dingin, “Itihzah lauhuai him! Itizah mulling hah him! Khua ngeng le khuapi Babilon! Nazi pa khat sungin dantat piaknak tawkta ci,” tin ti haw tuk hi.
11 Leihum a sumbawlte vang mahmi nu i ca in kap haw, itahim titale kuamah in, a van haw lei haw ma toh hi.Ref 18:11 Ezk 27:31, 36;
12 Kuamah in amuh tei sui, ngun, suang manpha, kep manpha, pat puan ngo, sandang puan, pu puan le puan sante, a manpha zetmi thing namtui tuah bawlmi thil phunkim saiho, daal, thik, suangval leRef 18:12-13 Ezk 27:12, 13, 22;
13 thing namtui, masala, pak namtui, mura namtui, frankinsens, sabit le situi, vainim le sangvut, khui le tuu, cipuh le cipuh leeng le mihing salte vang kuamah in lei haw ma toh hi.
14 Sumbawl ten mahmi nu i lakah, “Ka nei ahin tin na hazawlmi thilpha hempoh paithong khawng zo, na hauhnak le na sunloihnak bo khawng zo in, ituk mah ten ngahleh tukma toh ci,” tin ti haw hi.
15 Mah khuapi sung a sumbawl mihau ten a thuaknak sungah tel kha sual tuk a lau haw hangin, a khawlanakah ding haw tuk hi. Khawngai in kap haw tuk a,Ref 18:15 Ezk 27:31, 36;
16 “Lauhuai em! Mulling hah si! Babilon khuapi cu! Pat nem tuah tahmi puan ngo, sandang le sandup puante silh le ceng mekin, sui, suang manpha le kep, khi-ngui mawite tuah thuam thei li mek taven.
17 Mahnaven nazi pa khat sungin a hauhnak hempoh cu paitik khawngta hi,” tin ti haw tuk hi.
Timbaw mawngtu bawite le hawmkuang hum khungtu hempoh, hawmkuang sung a nadektu le tui hum a nuncaknak a zeitu hempoh ten khawla pi pen dingin,Ref 18:17 Isa 23:14; Ezk 27:26-30;
18 Khuapi meikang khu amuh haw ten, “Hi khuapi bang khuapi ituk mah ten um awng ma hi,” tin au haw hi.Ref 18:18 Ezk 27:32;
19 A lu haw leivul leihin, kapin tau li haw, “A lauhuai le mulling hahzet hei, hi khuapi ca in! Timbaw nei a, tui humah sumbawltu hempoh cu numei nu i hauhnak thawmin, mihau a suahnak haw khuapi hi. Mahnaven nazi pa khat sungin a neihnak hempoh bo thong khawng hi,” tin ti haw hi.Ref 18:19 Ezk 27:30-34;
20 Maw vancung, Babilon siatnak hangin lungdamin! Pathian mite aw, tiikmi le profette lungdam thatui in um un. Itahim titale noh tei hum a, thil a bawlmi hangin Pathian lak pen dantatnak tawk zo hi.Ref 18:20 Daan 32:43; Jer 51:48;
21 Mahten a tha ngilzet vancungmi pa khatin cang ngawinak suangpeek tia suang pa khat la in, tuipi sungah vawk thahin hi bangin ti hi, “Hiti bangin Babilon khuapi cu vawksuk hi tuk a, kuamah in muleh haw tukma toh hi.Ref 18:21 Jer 51:63-64; Ezk 26:21;
22 Aw mawi tingtang le mihing tei aw nging, pheveu tum thiam tei pheveu aw le pengkul aw na sung pen ngingleh tukma toh hi. Nadehnak phunkim dektu na sungah muleh haw tukma toh hi. Cang ngawinak aw nging vang zak hileh tukma toh hi.Ref 18:22 Ezk 26:13; Isa 24:8;Ref 18:22-23 Jer 7:34; 25:10;
23 Na sungah mei inn vak muh tuk umleh awng tukma toh hi. Zihuaitu tangval aw hei hihen zak tuk umleh tukma toh hi. Na sum bawlte khi lei humah huham neibel hi haw a, na mit zial thiamnakin leihum a mi hempoh zol khawng thei ci.”
24 Pathian mite le profet tei thisante a sungah a luan hangin Babilon cu dantat hi zo hi; mahzuh hi, leihumah thahnak thuaktu tei thisan cu hi khua sungah luang hi.Ref 18:24 Jer 51:49;