17
Numei Pha Ngawl Minthang
1 Mahten khuathai salih cawitu vancungmi salih tei lak pen pa khat ka lakah hungin hi bangin ti hi. “Hung inna, lui tampi el a, tohmi khuapi minthang numei pha ngawl nu khi iti bangin dantatin bawlsia haw tuk him tih lak nang.Ref 17:1 Jer 51:13;
2 Leihum kumpi bawite, amah tuah nupa sualnak bawl haw a, leihum mite vangin ama taksa sualnak sabittui a in haw hangin khamin, ngui khawng haw hi.”Ref 17:2 Isa 23:17; Jer 51:7;
3 Hawvang Thiangtho in zialin, keimah cu vancungmi in phillawnah hawhpih hi. Mahlai ah sahang a san humah numei pa khat khung mu ing, mahmi sahang i pumpicingah Pathian zotsak nautatnak min tampi ngan haw hi. Mah sahangin, lu salih le ki sawm nei hi.Ref 17:3 Mang 13:1;
4 Mah numei nu in, a sandang le sandup vansilhin, sui khi le bengbet, suang manpha le kep tuah thuam hi. A khutah a tisa sualnak zoh mawi ngawl numei pha ngawl le ningdelhhuai nate tuah a dimmi sui khuathai pa khat cawi hi.Ref 17:4 Jer 51:7;
5 A calah thu-ip sullam neimi min pa khat ngan haw hi. “A ngengmi Babilon, numei pha ngawl le leihum a ningdelhhuai hempoh tei nu” tin ngan haw hi.
6 Mahten mahmi numei nu cu, Pathian mihing tei thisan le Jesuh thuzuinak hangin thahnak a thuaktu tei thisan a in hangin, ngui in, kham hi tin mu ing.
Mahmi nu ka muh ten lamdangsazet ing.
7 Mahten vancungmi pa khatin, “Ita lamdangsa cim?” Numei nu i thu-ip sullam le numei nu i a hum a khunmi, lu salih le ki sawm nei sahang i sullam thu-ip cu na hilh nang.”
8 Hi na muhmi sahang cu nung awng naven atu-in nungleh ma toh hi, taw nei ngawl khuk sung pen tul tuk a, siatnak le lalthongnakah letvawk tuk hi. Leihum mihing, leipi pian laih ngawlin nunnak laibu sungah a min a ngat khak ngawl ten mahmi sahang a zoh haw ten lamdangsazet haw tuk hi. Nung awng naven atu-in nungleh ma toh; mahnaven langleh tuk laih hi.Ref 17:8 Dan 7:7; Mang 11:7; Saam 69:28;
9 Cihnak le theihnak kul hi. Lu salih cu numei nu i kumpi khunnak mual salih hi. Kumpi bawi salih vang na hi haw hi.
10 Mah kumpi bawi salih sung pen pa nga cu tu zo haw a, pa khatin uk laih, a dang pa khat cu hung ma laih hi. A hun ten hun comno sung uk tuk hi.
11 Nung awng naven atu-in, a nungleh ngawl tohmi sahang cu kumpi bawi liatnak hi; kumpi bawi salih lakah a telmi na hi a, siatnak le lalthongnakah heng tuk hi.
12 Ki sawm khat na muhmi cu ngam uk tawpan laihngawltu kumpi bawi sawm khatte hi haw hi. Mahnaven amuhte cu sahang tuah nazi pa khat sung uk tukin thuneihnak piak hi haw tuk hi.Ref 17:12 Dan 7:24;
13 Hi sawm khat ten a huham haw le a thuneihnak haw cu sahang lakah pia tukin ngaihsutnak nei tek haw hi.
14 Amuh ten Tuuno do haw tuk hi, mahnaven Tuuno le a sammi, a tenmi le amah a muangtu ten neh haw tuk hi; itahim titale, Tuuno cu bawi hempoh lak pen bawibel, kumpi hempoh lak pen kumpibel na hi tin ti hi.
15 Mahten vancungmi in, “Numei pha ngawl i kumpi khunnak a, tui na muhmite cu, ngam hempoh, hinnam hempoh, miphun hempoh le awn namkim hi haw tuk hi.
16 Ki sawm khat na muhmi le sahang ten numei pha ngawl cu hua haw tuk hi. A neihmi thil hempoh lonsak haw tuk a, thacangin zam haw tuk hi. A cik ei haw tuk a, mei tuah halkang haw tuk hi.
17 Pathian i tuptahmi a bawlsuaknak haw tukin Pathian in, a lungmu sung hawah bawl nuamnak lungmu koih hi. Mah hangin lungmu munkhat, nadek langkhat haw in, Pathian thu a kim laklawh a ngam uknak huham haw cu sahang lakah pia haw hi.
18 Na muhmi numei cu leihum kumpi bawite uktu khuapi ngeng hi,” ti hi.