19
1 Mahceng ten vancungmi tampi i aw bang ka zakmi in hi bangin ti hi, “Pathian cu thangphat hi tahen! Nunpatnak le sunloihnak le huham cu oh tei Pathian ta hi.
2 A thukhennak cu a dik le a manmi hi. Numei pha ngawl, tisa nopnak tuah leipi a nintiktu cu thukhennak thuak zo hi. Pathian nadektute a thah hangin amah cu Pathian in dantat zo hi,” tin ti haw hi.Ref 19:2 Daan 32:43; 2Kum 9:7;
3 Amuh ten hi bangin aubet haw laih hi, “Pathian cu thangphat hi tahen! Khuapi kang i meikhu cu kumkhua in vanah kai hi.”Ref 19:3 Isa 34:10;
4 Mahten upa sawm nih le pa li le nganhing pa lite cu a lu haw kunin, kumpi khunnak humah a khungtu Pathian cu bia haw hi. Amuh ten, “Amen! Pathian cu Thangphat hi tahen,” tin ti haw hi.
Tuuno Mopuai
5 Mahten kumpi khunnak pen aw pa khat a hengmi in hi bangin ti hi. “Oh tei Pathian cu pahcawi un; ama nadektute le a mihingte, a neu a ngeng ti ngawlin amah a kihcatu hempoh ten thangphat un.”Ref 19:5 Saam 115:13;
6 Mahceng ten mi honpi aw bang le tuihualpi aw bangmi vanthum bang aw za ing. Mah aw ngingin, “Pathian cu Thangphat hi tahen! Itahim titale Topa, Cungnungbel oh tei Pathian cu kumpi hi.Ref 19:6 Ezk 1:24; Saam 93:1; 97:1; 99:1;
7 Lungdam thatui in um nung! A thawmngennak cu pahcawi nung; itahim titale Tuuno mopuai hun heng zo hi, a khanglai nu vang mopuai bawl tukin a mansa hilhialin um zo hi.
8 A silh tukin patzai tuah tahmi puan ngo de silsel piak hi zo toh hi,” tin ti hi. (Mah puan ngo cu Pathian mihing tei thilpha bawlnakte hi).
9 Vancungmi in, “Hihi nganin: Tuuno mopuainakah sammi cu mi lungdammi haw hi. Hi thu hi Pathian thuman,” ti hi.Ref 19:9 Mt 22:2-3;
10 Mahten amah bia tukin a ke bulah kun ing; mahnaven amah in, “Mahtin kun pahsun, kei vang nangmah bangbokin, a nadektu ing hi. Jesuh i phuanmi thutak a pom ngahtu na unaupih tei lak pen pa khat hi bok ing hi; Pathian bek biak tukmi hi,” ti hi.
Profette lungthotiktu cu Jesuh i phuanmi thutak khi hi.
Cipuh Ngo Hum Khungtu
11 Mahten vancung khi hongin mu ing a, cipuh ngo pa khat um hi. A hum khungtu cu muantak le midik tin sammi hi. Thu a khen ten le ngal a do ten thumannak tuah khenin do hi.Ref 19:11 Ezk 1:1; Saam9 6:13; Isa 11:4;
12 A mitte cu mei alh bang hi a, a lu humah kumpi lukhu tampi khu hi. A humah a min ngatsa in um hi. Mahnaven amah sial ngawl kuamah in thei haw ma hi.Ref 19:12 Dan 10:6;
13 A vansilhmite cu thisan bang khawng hi. A min cu, “Pathian Thu,” hi.
14 Vancung ngalkap ten patzai tuah tahmi puan ngo thiangtho silhin, cipuh ngo humah khungin zui haw hi.
15 A kam sung pen a hiam zetmi namsau pa khat, hinnam tampi a nehnak tukin tul hi. Thik thiangkhut tuah uk tuk a, Cungnungbel Pathian thinuknak sabit ngawinak sungah sabit bangin ngawi tuk hi.Ref 19:15 Saam 2:9; Isa 63:3; Joel 3:13; Mang 14:20;
16 A puan le a kawngah min a ngat haw mi cu, “Kumpi hempoh lak pen kumpi, Topa hempoh lak pen Topa Bel hi,” tin ngan hi.
17 Mahten vancungmi pa khat cu ni humah dingin mu ing. Van a leng vano tei lakah nging zetin hitin au hi. “Pathian i bawlmi puai ngengpi ah hung khawm un.Ref 19:17-18 Ezk 39:17-20;
18 Hung unna, kumpi bawite, ngal bawite, ngalkapte, cipuh le cipuh uktute, mi hempoh, sal hei hihen, miluat hei hihen, mingeng le mineu hei hihen, himi hempoh tei cik ei un,” tin ti hi.
19 Mahten sahang, leihum kumpi bawite le a ngalkapte cu cipuh hum khungtu le a ngalkapte do tukin munkhatah tang langkhat haw hi.
20 Sahang cu manin, thawng khia haw a, a mitmuhin profet man ngawl tampi nalamdang bawl theite vang mancih haw hi. (Mahmi nalamdang a bawlnakin sahang melciknak tacik neitute le a milim biatute cu na zol ngah hi). Sahang le profet cu kaat mei tuah a alh langkhatmi meipi sungah a nungcungin vawk haw hi.Ref 19:20 Mang 13:1-18;
21 A ngalkapte cu cipuh hum khungpa i kamsung pen a tulmi namsau in that hi. Vano hempoh ten a cik a eih theihzah haw tenin ei haw hi.