16
Pathian Thinuknak Kuangte
1 Mahten biakinn pen aw ngingzet za ing a, vancungmi salih tei lakah hitin otpih mi aw za ing, “Hawh unna, Pathian thinuknak khuathai salih cu leihumah leihsuk un,” ti hi.
2 Pa khatnak vancungmi cu hawhin, a khuathai cu leihumah buaksuk hi. Sahang melciknak neitu le sahang zuk a biatu tei humah a lauhuai zetmi le nase zetmi meima sia piang hi.Ref 16:2 Suah 9:10;
3 Mahten vancungmi pa nihnakin, a khuathai cu tuipi humah leih hi. Tui cu mithi sung pen tulmi thisan bangin cang a, tuipi sung a ummi nganhing hempoh thi khawng haw hi.
4 Mahten vancungmi pa thumnak ten a khuathai cu luitui le ciktui humah a leihsuk haw ten luitui le ciktuite cu thisan suak khawng hi.Ref 16:4 Suah 7:17-21; Saam 78:44;
5 Tui humah thuneitu vancungmi in, “Hi na thu khennakte cu a dikmi hi; Maw a thiangthomi, atu a ummi le ni dang laih cawngin, a um zo mi, mailam huncan tianin, a um leleng tuk laihmi Pathian,
6 mi thiangthote le profet tei thisan a luantik haw hangin, a in haw tuk thisan na piakmi hi a in haw tukin phu hihim,” ti hi.
7 Biaklandawh pen aw pa khat ka zakmi in, “ Topa Cungnungbel Pathian, na thukhennakte hi a dik le a man tatak na hi,” ti hi.
8 Mahten vancungmi pa linakin, a khuathai cu ni humah leih hi. Ni cu mihingte mei tuah kangtik theihnak thupiakin um hi.
9 Mihingte cu nisa tuah kangtik a hih haw hangin amuh ten hi haksatnak hum a thuneitu Pathian min cu sonsia in tam haw hi. Mahnaven amuh ten a sualnak haw pen sikleh ngawlin Pathian hei thangphatnak pia cuang haw ma hi.
10 Mahten vancungmi pa nganakin, a khuathai cu sahang i kumpi khunnak humah leih hi. Sahang i uknak ngam hempoh ah thimnak heng a, mihingte cu a thuaknak haw na leita hangin a lei pet haw hi.Ref 16:10 Suah 10:21;
11 A natnak haw le a meima haw hangin Pathian cu tamsia in phu li haw hi. Mahnaven thil sual a bawlnak haw pen sikleh cuang haw ma hi.
12 Mahten vancungmi pa luknakin, a khuathai cu Eufrates luipi humah leih hi. Luitui cu kang khawng hi. Mahmi in nisuahnak lam pen a hungmi kumpi tei lampi honsak hi.Ref 16:12 Isa 11:15;
13 Mahten simphuk bang hawvang thiang ngawl pa thum mu ing. Mah mite cu, ngulpi i kamsung, sahang i kamsung le profet man ngawl tei kam sung pen a tulmite hi haw hi.
14 Mah mite cu nalamdang bawltu khawhuai tei hawvangte hi haw hi. Mah hawvang pa thum ten leihum kumpi bawi hempoh munkhatah pui khawm haw hi. Mah tei a pui khawmnak haw cu Cungnungbel Pathian Ni sunglawi ni ten ngaldo tukin hi.
15 “Ngai un! Nguca bangin hung tung hi. Mipi mai ah thacang le zakca in, a um haw ngawlnak tukin hihbu ngawl a nikcen puansilh a kemtute cu mi lungdam mite hi haw hi,” tin Topa in ti hi.Ref 16:15 Mt 24:43-44; Lk 12:39-40; Mang 3:3;
16 Mahten hawvang pa thumin, kumpi bawite cu Hebru awnin, Armageddon a tihmi munah pui haw hi.Ref 16:16 2Kum 23:29; Zek 12:11;
17 Mahten vancungmi salihnakin, a khuathai cu huih lakah leih hi. Kumpi khunnak umnak biakinn sung pen aw pa khat hengmi in, “Ceng zo,” ti hi.
18 Mahten khuaphelep zawzokin, vanthum dudum a, mulling hah zetin hiinhing hi. Mihing pian sawngin mahtibang hiinhing um awng ma laih hi; hiinhing lak pen a nasebel hi.Ref 16:18 Mang 8:5; 11:13, 19;
19 Khuapi ngengzet cu khen thum suahin khenkhek hi, ngamdang a khuapi hempoh vang sia khawng hi. Pathian in Babilon cu cing leleng hi. Pathian in, a thinuknak sabittui cu khuathai in Babilon khuapi intik hi.Ref 16:19 Isa 51:17;
20 Tuikulh hempoh paithong khawngin, mual hempoh thamthong khawng haw hi.Ref 16:20 Mang 6:14;
21 Nial ngengzet, pa khat pawng za khat tian a ngitmi van pen cak hi. Mahtibang haksatnak a thuak haw hangin mihing ten Pathian cu tamsia haw hi, itahim titale a thuak haw mi, a lauhuai bawlsiatnak cu nase leita hi.Ref 16:21 Suah 9:23; Mang 11:19;