RUTH
Laibu
(The Book of Ruth)
Thulamsial
Ruth tangthu hi Thukhentu tei khan sungin a ummi thu hi. Ruth cu Moab mi hi ama Israel pa tuah huaidun haw hi. A Pasal a thih ten Israel mi, a ni le Israel Pathian humah muantak zetin um leng hi. A dawlbelin, a pasal unau tuah huaidun haw in, mah a huaidunnak haw hangin Israel tei kumpi ngengbel David suahkehnakin cangta hi.
Thukhentu tei laibu sungah Pathian mihing ten amah a nunghek haw ten a hum hawah siatnak hengmek tih mu thei hung hi. Ruth laibu sungah miphun dang pa khatin Israel Pathian a biak haw ten muicu co lengin muantak miphunin cang hi tih thu mu thei hung.
1
Elimelech Tei Innkua Moab Ah
1 Thukhentu tei Israel ngam a uk haw lai in, mahlai ngamah paampi tung hi. Judah ngam Bethlehem khua a um, Ephrath miphun Elimelech cu a zi Naomi le a capa pa nih Mahlon le Chilion tuah Moab ngamah bawklawk tukin hawh haw hi.
2 A min cu Elimelech hi in, a zi min Naomi hi in, a ca pa nih Mahlon le Chilion haw hi. Amuh cu Judah ngam Bethlehem a, Ephrath hinnam haw hi. Moab ngamah heng haw in, mahlai ah um haw hi.
3 Naomi i pasal Elimelech a thih ten a capa pa nih tuah um haw hi.
4 A capa pa nih ten Moab mite Orpah le Ruth cu zi in huai haw hi. Kum sawm nungten
5 Mahlon le Chilion vang thi leleu haw in, amah nguakcang ca nei ngawl, meivongin um hi.
Bethlehem Ah Naomi le Ruth Kik Haw
6 A nung ngeican umngawlin, Naomi in, Topa in, a phunpihte cu lo sungsuak muicu pia tih a theih ten, a mo tuah Moab ngam pen kikleh tukin ngaisung hi.
7 Judah ngamah kikleh tukin tul haw, mahnaven lam lak pen
8 a mo tei lakah, Naomi in, “Innah kiklehin, na nu tei lakah umta un hi. Topa cu keimah le a thisa tei humah a phat bangin nangmu humah vang thupha pia tahen.
9 Topa in pasal neileh thei tukin thupha pia tahen.”
Mahceng ten Naomi in, damno in maw tin thutin nuksat hi. Kapthahin,
10 “Kikleh thawthong tukma ung, na miphun tei lakah hawh bok tuk ung,” tin ti haw hi.
11 Naomi in, “Canute aw, hawhta poh un, keimah zuinuam pahsuh un, ka sung pen nangmuh tei pasal tuk capa hei hingleh thei tukma toh ing.”
12 Innah pinkik poh un hi. Itahim titale kei pasal neileh thei tukma toh ing, tek leita zo sing. Muansannak nei in, tuni takah pasal nei in capate ka nei hei in,
13 a upat haw tian ngak zo cuang tukma uh ci. Pasal dang na neih tuk uh a khamtu hi saw hi ni maw? Ka canute aw, hitih bang cu hi thei tukma hi. Topa in kei langpang zo hi, nangmu ca in ka lungnop peu mang hi.
14 Kap leleu haw a, Orphah in, a teknu cu thutin, a nuksat ceng ten innah pinleh hi. Ruth in, a teknu cu pom lo hi.
15 Mah hangin Naomi in, a lakah, “Ruth na pasal unau i zi cu a miphun pih tei lakah le a pathian lakah kikleh zo hi. Amah tuah innah pinkik bokin hi.”
16 Mahnaven Ruth in, “Nangmah zamin kik tuk cu tili toh pahsun. Na lakah hawhtik saw in, na hawhnak hempoh ah hawh bok tung. Na umnakah um bok tung. Na mihingte cu ka mihing hi bok tuk hi. Na Pathian vang ka Pathian hi tuk hi.
17 Na thihnakah thi bok tung, mahlai ah vui hi bok tung. Thihnak sial ngawl nang le kei a khenduntik tale Topa i bawlsiatnak ka humah heng tahen,” ti hi.
18 Naomi in, Ruth in zuinuam lo tih amuh ten imah awn ngam ma toh hi.
19 Bethlehem tian hawh haw hi. A hen haw ten khua hek kawi haw a, lungdam zetin mah mun a um numei ten, “Hi nu hi Naomi ngangai maw?” ti haw hi.
20 Naomi tin sam pahsuh un, Marah tin sam un toh un, tin Naomi in don hi.
21 Hilai mun pen ka tul lai in, hausazet ing. Mahnaven Topa in atu-in khut thacangin kiklehtik hi. Cungnungbel Topa in ka humah thukhenin haksatnakah a hentik nungten, ita kei Naomi tin sam uh cim?
22 Hiti bang a hih ten, Naomi cu Moab pen a capa i zi Moab miphun Ruth tuah barli lak hunin, Bethlehem ah hengkikleh haw hi.