2
Boaz Lo Ah Ruth Nadek
1 Naomi i pasal Elimelech lam ten unau mihauzet nei in, a min Boaz hi.
2 Ruth in Naomi lakah “Lo ah hawh nangin, cang attu tei zammi cangsang zei tung, keimah a hehpihtu tei lakah hawh tung hi,” tin ti hi.
Naomi in, “Hawhin zei ngai in, ka canu aw” ti in don hi.Ref 2:2 Thiam 19:9-10; Daan 24:19;
3 Mah hangin Ruth cu lo ah hawhin nadektu tei nung pen cangsang la pepel hi. A hawhnak cu Elimelech i unau pa Boaz i lo hi.
4 Khuanu deuh ten Boaz cu Bethlehem pen lo ah hengin, “ Topa cu na lakah um tahen,” tin nadektute thupha pia hi.
Nadektute vangin, “ Topa in thupha pia tahen” tin donleh haw hi.
5 Mahceng ten Boaz in, a nadek lamhuaitu pa i lakah, “Hihi i lai a khanglai kaw?” tin dong hi.
6 A umlawhpa in “Naomi in Moab ngam pen a pinpihmi nu hi.
7 Ka lakah hehpihnakin, na nadektu tei nungzui in cangsang la nang maw tin ngen hi. Zingtungno pepan tutian nadekin, a tuno hah bukah cawl hi,” tin hilh hi.
8 Boaz in Ruth lakah, “Canu aw thuhilh nang, mundangah hawh ngawlin hih lo bekah cangsang zei leleng poh inna, hilai ah umin hi.
9 Cang a ahnak haw zo inna, cang attu panote cu nangmah bawlsia tuk ngawlin cah zo ing. Na dangdum tale pano tei cawisa thawl sungta tui cu in pohin,” ti hi.
10 Ruth in, a mai lei tawngkha tianin kun thahin Boaz lakah, “Kei ngamdang numei hizah takin na hehpih,” ti hi.
11 Boaz in, “Na pasal thih sawng na teknu i hum a na bawl hempoh a venghawngin keimah hilh khawng zo haw hi. Na nu, na pa, na suahnak ngam na zamsannak le na hawh awng ngawl le na theih awng ngawl miphun lakah na hen thu vang za khawng zo ing.
12 Hi ti bangin na bawlnak hangin Topa in thupha pia hi. Himnak deihin, a ha nuai a, na belhmi Topa Israel tei Pathian in, a laksawng cu a kimno in pia tahen,” tin ti hi.
13 Ruth in, “Bawipa aw kei cu na nadektu pa khatno hei bangma na veng, na hehpihnak awnkam ka zak ten lungmuangzet ing, tin,” ti hi.
14 Sunsiah eih hun ten Boaz in Ruth lakah hawhin, “Na cangho ei bokin, Sabit tui sungah diat inna, ei bokin,” tin ti hi. Mah hangin Ruth vang nadektu tei lakah khung hi. Boaz in Ruth cu vaiphante pia hi. Kham zetin ei in, a khamval hei um lai hi.
15 Cangsang zei tukin a hawh ceng ten Boaz in, a nadektu tei lakah, “Cangtel umnak lam hei ah cangsang cu zei hen, kham pahsuh un.
16 Cangtel sa sung hei pen dawmlaih dokin, a khul tukin koih nim un, a liat vang liat pahsuh un,” tin ti hi.
17 Mah hangin Ruth in cangsang cu lo sungah sun nilui zei in, a ngah hempoh a cil ten seu khat kim hi.
18 Cang cu pua in, innah a pin ten a teknu lakin, mahten a sunsiah eih bang vang a teknu pia hi.
19 Naomi in, “Tu sun aw, ilai lamah kaw cangsang na zei? A koi lo ah nadek cim? Nang a hehpihtu pa cu Pathian in thupha pia tahen,” ti hi.
Ruth in, “Boaz a tih haw pa i lo ah dek ing,” tin a teknu Naomi cu hilh hi.
20 Naomi in, “A nungmi tei humah hihen, a thisa tei hum hei ah hihen hehpihnak a nei lelengtu, Topa in Boaz cu thupha pia tahen,” ti hi. Ruth lakah “Boaz cu ka phunpih ka unau ngangai hi. Eimuh a cingkhawitu tuk vang amah hi,” tin hilh hi.Ref 2:20 Thiam 25:25;
21 Ruth in, “Mah ngaibel tuk, ka ca-ngah sung hempoh keima lakah dek leleng bokin,” tin ti lai hi.
22 Naomi in Ruth lakah, “Mah ngai hei, ka canu; midang lo ah na hawh tale nangmah zawnsaktu hei um kha thei hi. Boaz lo a, nadektu numeite tuah nadeh cu phabel hi tin don hi.”
23 Mah hangin Ruth cu Boaz i nadektu tei lakah nadek bokin barli cang le sangvut a ah ceng haw tian cangsang zei hi. Ruth cu a teknu i lakah um leleng hi.