21
Benjamin Tei Tuk In Zi Zei Haw
1 Israel miten Mizpah pen Topa i lakah thutepnak khozet pa khat bawl haw hi. A thutep haw mi cu, “Keimu lak pen kuamah in ka canu uhte Benjamin mitei huai tukin pia tukma ung hi,” tihmi hi.
2 Mah hangin Israel mite cu Bethel ah hung haw in, Topa i mai ah taaklam khuanu thim tian khungin, nasezet kap haw hi.
3 A kapthahin, “Maw Topa Israel Pathian, ita hi bang nate ka hum uhah heng him? Israel miphun lakah hinnam pa khat cu pailal tuk hi,” tin ti haw hi.
4 Israel mite cu a zingten zingtungno tho in, mahlai ah biaklandawh haw hi. Pawlkom biakpiaknak le meihal biakpiaknak Topa i lakah pia haw hi.
5 Amuh ten, “Israel miphun tei sung pen Topa i mai a khopkhawmnakah a tul ngawlmi kua um him?” tin dongdun haw hi. Topa i mai Mizpah ah a tul ngawlmi cu thah hi haw tuk hi, tin kho zetin thutepnak nei zo haw hi.
6 Israel mite cu a unau Benjamin hinnam tei ca in lungsia ngangai haw hi. “Tuni in Israel miten a phunpih uh buppi in paitik hung hi.
7 Amu sung pen a tangmi tei ca tukin iti bangin zi zeisak tuk hung kaw. A canu uhte cu huai tukin a pia tukma hung, tin Topa i lakah thutiam zo toh si hung,” ti haw hi.
8 “ Topa i lak a, Mizpah ah Israel miphun sung pen kua kaw a hung ngawl um?” tin dongdun haw hi. Gilead ngam a Jabesh pen pa khat hei a khopnak hawah hung haw ma tih thei haw hi.
9 Israel mite cu a sialdun haw ten Jabesh pen pa khat hei tel haw ma ngangai hi.
10 Mah hangin a ngalkap haw lak pen ngalphabelte thawng sawm le thawng nih hah haw in, “Hawh unna, Jabesh khuasung a ummi hempoh numei le naupang tianin that khawng un.
11 Pano hempoh le khanglai him ahi ngawlmi numei hempoh cu that khawng un,” tin thupia haw in, a thupiakmi bangin bawl khawng haw hi.
12 Jabesh khua sungah khanglai dawn za li um haw in mahte cu that ngawlin Kanaan ngam a ngiahbuk haw Shiloh ah pui haw hi.
13 Mahten a khawmdun khawmmi ten Rimmon Suangpi a um Benjamin mitei lakah mi hahin, ngallemnak thucah haw hi.
14 Benjamin mite cu kik haw in, Israel miten Jabesh khua pen that ngawlin a pui haw mi khanglai cu zi tukin pia haw hi. Mahnaven khanglai in tham ma hi.
15 Israel mite pumkhat bangin a um haw cu Topa in, a khenkhek khawng hangin Israel mite cu Benjamin hinnam tei ca in thasiazet haw hi.
16 Mah hangin a khawmtu hotu ten, “A tanglaihmi Benjamin pano tei ca tukin iti bangin zi zeisak tuk kam hung? Benjamin hinnam numei tale thah khawng hi zo haw si.
17 Israel hinnam sawm le pa nih sung pen hinnam khat hei a paih thong tuk phal ma hung. Benjamin hinnam a nun theihnak tukin lampi zei sak kul loli hi.
18 Mahnaven a canu uhte a huai haw tuk cu cangthei sih ma,” tin ti haw hi. Itahim titale kuamah in, na canu uh Benjamin mitei zi tukin pia pahsuh un tin thu a tep zo haw toh hang hi.
19 Amuh ten, “Shiloh ah Topa ca tukin kumsial a bawl mek uhmi puai cu ngei ngawlin heng tuk toh hi,” ti haw hi. Shiloh cu Bethel pen saklamah, Lebanon pen hanglam le Bethel le Shekhem laklawh lampi pen nisuahnak lamah um hi.
20 Israel miten Benjamin mitei lakah, “Hawh unna, sabit huan sungah ngelh un.
21 Komno in zo unna, hi puai sungah Shiloh khua khanglai hungin lam haw tuk hi. Sabit huan sung pen tul unna, mah khanglai tei lak pen na deihmi ten uh cu a nuam haw ngawl vangin man unna, pui unna Benjamin ngamah pinpih un.
22 A pa le a ningpa ten eimu lak hungin, a lungkim ngawlnak a hilh haw tale oh ten, ‘Ngaidam un: na canu uhte cu co hawta poh hen. Itahim titale a ngaldo haw laihin, a zi haw tukin ka mat uhmi hi haw ma hi. Na lungkimnak uh tuah piakmi vang hi ma hi. Na piak uhmi a hih haw ngawl hangin ka thutep uhmi vang pahbal ma uh ci,’ tin don tuk hung,” ti haw hi.
23 Benjamin ten a hilh haw bangin bawl haw hi. A lammi khanglai tei lak pen a zi haw tukin pa khat ten manin, taipih haw hi. A ngam hawah pinin, panmun la in, a khuapite lemleh haw hi.
24 Mah hun laihin Israel mite vang khenkhek haw in, amu hinnam le innkua ten tuah a khua le ngamah pin ten haw hi.
25 Mah hunah Israel miten kumpi nei haw ma hi. Mi hempohin amu nuamnak bang tekin nung haw hi.Ref 21:25 Thuk 17:6;