4
Abraham Tuah Tehkipnak
1 Ohtei hin le nam cikhaihtu a pupi uh Abraham thu ah, itin kaw a ngaihsut tuk uh? Amuh le a tawh mite hi iti bang kaw?
2 Thil a bawlmi hangin Pathian tuah lemdunnak co a ti uh ahin, tuangkhawn tuk dawmlaih cu neibel tuk hi! Mahnaven Pathian i mai ah tuangkhawn tuk imah nei ma hi.
3 Lai Thiangtho in, “Abraham in Pathian umin, mah a upnak hangin Pathian in midikcang bangin sang,” ti hi.Ref 4:3 Pian 15:6; Gal 3:6;
4 Mi pa khatin, na a deh tale a nadeh man cu pia haw hi, mahmi cu laksawng hi tin ngaihsut tukmi hi ma hi. Ama nadeh i thaman hi.
5 Mahnaven nadehnak hi ngawlin upnak a neitu, sualnak neimi, sualnak nei ngawlin a bawltu, Pathian a muangtu i upnak cu Pathian in Amah tuah lemdunnak tukin a san sakmi hi.
6 Pathian in mi pa khat cu dehnak demno hei tel hihim ngawlin midik bangin a cosan sakmi pa i lungdamnak David in, a son ten, a son nuammi hi.
7 “Pathian in, a phat ngawlnak haw
a ngaihthiammi le,
a sualnak haw a zah mite cu
mi lungdamte haw hi.Ref 4:7-8 Saam 32:1-2;
8 Topa in, a sualnak haw
a tiamteh ngawlmi le,
a sualnak haw cazin sungah
a khum khak ngawlte cu
mi lungdamte haw hi,” ti hi.
9 David i otmi lungdamnak hi vunceptan mite bek i co theihmi hi ni maw? Mah kha ma hi! Hih lungdamnak cu vunceptan ngawlmi hei in co theihmi hi. Itahim titale a hilh zo uhmi Lai Thiangtho ah, “Abraham in Pathian umin, mah a upnak hangin Pathian in midik bangin sang,” ti hi.
10 Mahmi cu i tuk laihin kaw? Abraham i vunceptan laih ngawlin maw, a tan ceng ten kaw? A tan ceng ten kha ma, a tan laih ngawlin hi. Midikin, a san ceng ten Abraham in vunceptalhnak bawl hi.
11 Pathian in vuncep a tan laih ngawl hei in, a upnak hangin midikah sang hi tih melciknakin vunceptalhnak bawl hi. Mahtibang a hih hangin vunceptan ngawl ten amu upnak hangin Pathian i midik tin, a cosanmi tei ca in Abraham cu hawvang lamah pabel hi.Ref 4:11 Pian 17:10;
12 Itahim titale vunceptan mite cu vuncep a tan haw bek sial ngawlin a pupi uh Abraham i vunceptan laihngawlin, a nun bangin upnak tuah a nungtute haw hi.
Upnak Hangin Ngahmi Pathian Thutiam
13 Pathian in Abraham le a casuante cu hi leipi hi nangmuta tuk hi tin thu a tep ten, Abraham in Daan a zui hangin kha ma hi. Mahnaven Abraham in umin, Pathian in midikin, a cosan hangin saw hi.Ref 4:13 Pian 17:4-6; 22:17-18; Gal 3:29;
14 Pathian i thutepnak cu Daan a zuitu tei lakah piak hi a ti uh bang ahin, mihing tei upnak cu phukthong tuk hi, Pathian i thutep cu man nei ngawlin cang khawng thong tuk hi.Ref 4:14 Gal 3:18;
15 Daan in Pathian thinuknak hengtik hi; mahnaven daan um ngawlnak munah Daan zui ngawl sualnak hei um bokma hi.
16 Mah hangin thutepnak cu upnak humah a dingmi hi, Abraham casuan hempoh tei lakah Pathian i hehpihnak laksawng hi tin thutepnak hi. Daan a zuitu tei ca bek kha ngawlin Abraham bangin a umtu tei ca vangin hi bok hi. Itahim titale Abraham cu hawvang lam pen a venghawng uh i pa hi.Ref 4:16 Gal 3:7;
17 Lai Thiangtho vangin, “Nangmah cu miphun tampi tei pa in bawl zo ing,” ti hi. Mah hangin mah thutepnak cu Abraham i upmi Pathian mai ah a khomi thutepnak hi. Abraham i upmi Pathian cu mithi a nungtiktu le a thu in, a piang ngawlte piangtik theitu Pathian hi.Ref 4:17 Pian 17:5;
18 Abraham in umin, muansan tuk a umleh ngawl toh hei ten muansannak a neih nawm laih hangin, “Mi phun tampi tei pupi,” in cang hi. Lai Thiangtho in, “Na casuante cu aksi zah haw tuk hi,” a tihmi khi kim hi.Ref 4:18 Pian 15:5;
19 Mahlai in Abraham cu kum za khat awndiak hi; mahnaven a thi pal tukmi a tisa a zoh ten le Sarah i nau neih theih ngawl thu a ngaihsut ten a upnak cu kiam cuang ma hi.Ref 4:19 Pian 17:17;
20 Pathian i thutiammi vang cu sang ngawlin um cuang ma hi; a upnakin huham pia saw in, Pathian khi thangphat hi.
21 Thu a tepsami cu Pathian in bawlsuak tuk tih cu nase zetin muang hi.
22 Mah hangin upnak hangin Abraham cu, “Pathian in midikin sang hi,”
23 “Midikin sang,” tihmi awnkam hi ama ca bekin ngatmi kha ma hi.
24 A Topa uh Jesuh thihnak pen a tholehtiktu Pathian a upnak uh hangin midikin sanmi eimuh tei ca vangin hi bok hi.
25 Eimu sualnak hangin thihnakah hentik a, Pathian tuah a lemdunnak tukin nunnakah thawhlehtik hi.Ref 4:25 Isa 53:4-5;