5
Pathian Tuah Lemdunnak
1 Atu-in upnak hangin thiancotikmi hi zo hung hi; a Topa uh Jesuh Khrih hangin Pathian tuah lemdun zo hung hi.
2 Upnak hangin a co uhmi Pathian i hehpihnak sungah Aman henpihin, atu-in mah a hehpihnak sungah um hung. Mah hangin Pathian i thawm ngengnak co thei bok tuk hung tih muansannak a um hangin lungnopzet hung hi.
3 Haksatnak a thuak uh hei ten lungdam leleng hung hi; itahim titale haksatnakin thuak theihnak hengtik hi.
4 Thuak theihnakin, Pathian lungkimmi hi tih langtik hi, mahten ama lungkimnak pen muansannak nei thei hung hi.
5 Hi muansannakin, a lung uh siatik ma hi, itahim titale Pathian in, a itnak cu Hawvang Thiangtho mangin eimu thin sungah buak zo hi. Mah Hawvang Thiangtho cu Pathian piakmi laksawng hi.
6 Tih theihnak a neih ngawl laihtak uhin Pathian i hun a sehnak bangin Khrih cu misual tei ca in thi hi.
7 Midang tei ca in mi pa kha khat a thih tuk cu thu baih viang ma hi. Mipha tei ca in thi ngamtu pa kha khat hei cu um kha haw thei men.
8 Mahnaven Pathian in itih zahin it him tih khi langtik hi; misual a hih uh laih takin eimu ca in Khrih cu thi hi!
9 A thisan hangin ohte cu Pathian tuah lemdun zo in, itih zahin kaw Pathian i thinuknak pen amah in, a pat suak sesem tuk!
10 Ni dang laihin, Pathian ngal hi nave hung, atu-in, a Capa i thisan hangin a ngualcamin bawl zo hi. Pathian i ngualcam a hih zo uh hangin Khrih i nunnakin itih zahin ohte cu nunpan tuk him?
11 Hi bek hei kha ma laih hi; Pathian ngualcamin, a bawlsaktu a Topa uh Khrih hangin Pathian i thil bawlmi ah lungdamzet hung hi.
Adam le Khrih
12 Sualnak cu mi pa khat i hangin leihumah hengin, mah sualnakin thihnakah henpih hi. Mah hangin thihnak cu mi hempoh lakah heng hi. Mah hangin akua abang sual khawng hi.Ref 5:12 Pian 3:6;
13 Daan a umlaih ngawlin sualnak cu leihumah um zo hi; mahnaven Daan um ngawlnak munah sual cu sualin sial khak hi ma hi.
14 Adam khan pen Moses khan tian mi hempoh cu thihnakin uk khawng hi.
Adam in Pathian thupiakmi zui ngawlin a sual bang bokin sual haw ma naven thihnakin uk leleng hi.
15 Mahnaven mah thu pa nihte cu bangten haw ma hi, itahim titale Pathian laksawng cu Adam i sualnak bang hi kha ma hi. Mi pa khat i sualnak hangin mi tampi ten thihnak tawk haw, tih cu thuman hi. Mahnaven Pathian i hehpihnak cu mah sangin ngeng saw laih hi; Jesuh Khrih amah pa khat i hehpihnak hangin Pathian i laksawng cu mi tampi tei lakah ngeng saw ngangai hi.
16 Pathian i laksawng le mi pa khat i sualnak cu dangdunzet hi. Mahmi vei khat sualnak ceng ten a hengmi thukhennak cu “sual uh ci,” tih hi. Mahnaven sualnak tamzet nungten co phu hei hi ngawl napi in, a hengmi laksawng cu, “Sual ma uh ci,” tihmi thukhennak hi.
17 Adam i sualnak hangin thihnakin mi uk hi tihmi cu thuman hi. Mahnaven Jesuh Khrih hangin mi pa khat i dehnakin itihzah phatnak ngeng sesem him a umtik! Pathian hehpihnak cangkim a ngahtu le Amah tuah lemnak laksawng a cotu hempoh cu Khrih i hangin a nunsung nehtu hi haw tuk hi.
18 Mahti bang a hih hangin sualnak pa khat bawlmi in, mi hempoh sual a puaktik bangin diknak pa khat bawlmi in mi hempoh luattikin nunnak vang pia hi.
19 Mi pa khat i thu ngaih ngawlnak hangin mi hempoh misualin cantik a hih bangin, mi pa khat i thu ngaihnak hangin mi hempoh cu Pathian tuah lemdun haw tuk hi.
20 Sualnak khangtiktu tukin Daan cu heng hi. Mahnaven sual a tamnak munah Pathian i hehpihnak vang cu tam sesem bok hi.
21 Mah hangin sualnakin thihnak tuah mi a uk bangin Pathian i hehpihnakin dikcangnak tuah mihingte uk bok hi; mahten, a Topa uh Jesuh Khrih i hangin kumkhua nunnak sungah pui hi.