3
1 Mahti bang ahi tale Judah mite hi Gentail tei humah a cuangcungnak haw um maw? Vuncep a tannak haw khi i poh a man neih cuangnak um maw?
2 A phunkimin, a cuangcungnak haw cu um hi. Amasabelin Pathian in, a Thuthangpha cu Judah mite cingkhawitik hi.
3 Mahnaven Judah mi khenkhat muantak ngawlin a um haw ahin i cang kam ni?
4 Pathian vangin amu humah muantak ngawl hi bok ni maw? Mahtin hi ma hi! Mi hempoh zolthu sontu ngeh ahi haw hei in, Pathian cu a manmi le muantakmi hi tuk hi, Lai Thiangtho in:
“Na ot ten na otmi man hi tih
langtiknak tukin le
thukhen ten na neh
theihnak tukin,” ti hi.Ref 3:4 Saam 51:4;
5 Mahnaven thilpha ngawl a bawl uhmi in Pathian i thudik a hihnak cu cangcian zetin, a langtik tale itin tuk kaw? Pathian in nun a hilh ten sual hi tin tituk hung maw? (Mihing daan in hilh ing hi.)
6 Ti hihim pahsun! Pathian cu man hi; a man ma tale itin kaw leihum thu a khen theih tuk?
7 Mahnaven ka thutak ngawlnakin Pathian sunloihnak saw ah na dekin, a thutak khi langciangtik saw ahi tale itin tuk him? Itakaw keimah lehlam misual tin mawhsiatnak ka co?
8 Itin kaw, “A phami lang tukin a pha ngawl bawl tuk hung,” tin, a tih uh ngawl? Mi khenkhat ten mahtih bangkekin hilh ci tin nawnin zawnsak haw hi. Mahti bang mihingte cu mawhsiat tak a hih haw hangin mawhsiat hi haw tuk hi.
Midik Kuamah Um Ma
9 Mah ahi tale Judah mi a hihnak uhah Gentail mite sangin a phat cuangnak uh umma maw? Um hihim ma! Ciang zetin ka langtik zo bangin Judah mi hihen, Gentail mi hihen, a venghawng uhin sualnak i huham nuai ah um khawng hung hi.
10 Lai Thiangtho in,Ref 3:10-12 Saam 14:1-3; 53:1-13;
“A dikcangmi kuamah umma hi,
pa khatno hei umma hi.
11 A cipmi pa khat hei umma hi;
Pathian biatu hei umma hi.
12 A venghawng haw in
Pathian lak pen
lam pial khawngin,
lampi dang zui khawng
zo toh haw hi.
Kuamah thuman a bawltu
um haw ma hi,
pa khatno hei umma hi.
13 A awnkam haw cu thihpih takmi
mizolnak ngeh hi.
A lei haw pen a lauhuaimi
zolthu sonnak tul hi.
A muk haw pen thihsi,
ngul ngu bang tul hi.Ref 3:13 Saam 5:9; 140:3;
14 A ot haw tale tamsiatnak
ngehin dim hi.Ref 3:14 Saam 10:7;
15 Mi siatsuah tuk le
mi thah tuk lamah
zuan ngangzet haw hi.Ref 3:15 Isa 59:7-8;
16 A hawhnak haw hempoh ah
siatlalnakin zui hi.
17 Lemdaihnak lampi
thei awng haw ma hi;
18 Pathian kihcaknak
nei cuang awng haw ma hi,”
tin a tih bang khin hi haw hi.Ref 3:18 Saam 36:1;
19 Atu-in Daan sung a thupiakmi hempoh cu Daan i delhcih mitei ca in hi, tih thei hung hi. Mahmi cu kuamah i phaat theih tuk ngawlin le lei buppi hi Pathian i thukhennak nuai ah henpih tukin hi.
20 Itahim titale kuamah in Daan zuinak hangin Pathian mai ah dikcangnak ngah thei ma hi. Daan i nadehnak cu mihing tei sual theihtiknak bek hi.Ref 3:20 Saam 143:2; Gal 2:16;
Pathian In Lemnak Bawl
21 Mahnaven atu-in Pathian in Amah le mihing tei laklawhah daan zuinak hangin hi ngawlin lemdunnak lampi langtik zo hi. Mah lampi cu Moses Daan le profet tei tettikhanmi hi naven, Daan tuah i mamah sengdun ma hi.
22 Jesuh Khrih a upnak haw i hu le thawm hangin Pathian in mihing tuah lemnak bawl hi. Khrih a umtu hempoh ca in hi bangin Pathian in bawl hi;Ref 3:22 Gal 2:16;
23 Mah hangin deidat dunnak imah umma toh hi; a venghawng uhin misual hung a, Pathian i sunloihnak co baan ma hung hi.
24 Mahnaven eimuhte a luattiktu Jesuh Khrih i hangin Pathian in, a hehpihnak laksawng cu pia in, amah tuah lemdunnak bawlsak zo hi.
25-26 Pathian in Jesuh Khrih i thisan hangin, misual ngaihdamnak a um theihnak tukin a tuptahmi hi, mah ngaihdamnak cu amah upnak hangin ngah haw tuk hi. Pathian in hi bang thil a bawlmi hi Ama diknak a langnak tukin hi. Nidang laihin Pathian cu a thinsau in, mihing tei sualnakte kinmawh ngawlin um san thong hi. Mahnaven atu-in ama diknak khi langciang tukin mihing tei sualnak cu mu thong thei lehma toh hi; mahtih bangin a diknak cu langtikin, mahten a umtu hempoh diknak cotik hi.
27 Mah ahi tale i poh tuangkhawn tuk nei hung maw? Um hihim ma hi! I hangin kaw? Daan a zui uh hangin maw? Mah kha ma! A upnak uh hangin hi.
28 Itahim titale Daan i thupiakmi zui hang hi ngawlin upnak bek hangin mihing cu Pathian tuah lemdunnak um hi; tih hi ka thu khupnak hi.
29 Mah ma tale Pathian hi Judah mite bek i Pathian maw? Gentail mitei Pathian bokma maw? Hi zuh hi, Gentail tei Pathian hei hi bok hi.
30 Pathian cu pa khat hi, Judah mite cu a upnak haw hangin Amah tuah lemdun lehtik tuk a, Gentail mite vang a upnak haw hangin Amah tuah lemduntik tuk hi.Ref 3:30 Daan 6:4; Gal 3:20;
31 Mah ahi tale hi upnak hangin Daan cu vawkta hung tihnak hi tuk maw? Mahtin kha ma hi, Daan khotik saw hi.