2
Pathian Thukhennak
1 Midang tei humah thu a khentu, ka ngual aw, na sualnak cu sel thei tukma ci. Midang tei thu na khen uhten a muhte bang lengin ngamta na hih uh hangin nangmah le nangmah misual ing hi tin thu khen cop zo ci.Ref 2:1 Mt 7:1; Lk 6:37;
2 Hitih bang na pha ngawl a bawltu tei humah Pathian in thu a khen ten thildik bawl hi tih thei hung hi.
3 Mah hangin ka ngual aw, midang tei na pha ngawl a bawl haw hangin a thu haw na khen ten nangmah cu amuh bang bok ci. Pathian i thukhennak pen luat tung hi tin ngaisung cim?
4 Mah ahimata Pathian hehpihnak, a mi ngi na zia le a thinsau lungduainakte a nase leita mi hi imah simsial ngawlin um cim? Pathian hehpihnak cu na sualnakte sik tukin a ngaisungtiktu hi tih cu ciang zetin thei ci.
5 Mahnaven nang cu thinlian le lungmu ngeng zetin um ci. Mah hangin Pathian in, a thinuknak le thudik thuman tuah thu a khen ni ten na tawh tukmi dantat cu a ngeng dedeuh tukin nangmah le nangmah bawl cop ci.
6 Itahim titale Pathian in kuakua hei hihen amuh tei dehnak bangin thaman pia tuk hi.Ref 2:6 Saam 62:12; Thup 24:12;
7 Mi khenkhat ten thilpha bawl lelengin sunloihnak, minphatnak le kumkhua nunnak zei haw hi; Mah mite cu Pathian in kumkhua nunnak pia tuk hi.
8 Mi khenkhat ten mai matan bek ngaisungin, a pha saw mi zamin, a pha ngawl saw zui haw hi. Mah tei humah Pathian in, a thinuknak cu meiling bangin leihsuk tuk hi.
9 A pha ngawl a bawltu hempoh ten haksatnak le cimnak thuak haw tuk hi. A masa in Judah ten thuak haw tuk a, a nungten Gentail ten thuak bok haw tuk hi.
10 Mahnaven thilpha a bawltu hempoh tei lakah Pathian in sunloihnak, minphatnak le lemdaihnak thupha pia tukin, a co masatu cu Judah hi tuk a, a co dawltatu cu Gentail mite hi haw tuk hi.
11 Itahim titale Pathian in kua mah deidatnak nei ngawlin bangtenin mi hempoh humah thukhen hi. Ref 2:11 Daan 10:17;
12 Gentail mite cu Moses Daan nei haw ma hi; a sual haw ten Daan nei ngawlin phathong haw hi. Judah mite in Moses Daan nei haw, a sual haw ten Daan bangin thukhennak thuak haw hi.
13 Pathian mai pen midik hihnak cu Daan sung umtu tei ca in beng i zak bek hi ngawlin; Daan zuinakin hi saw hi.
14 Gentail mite cu Daan nei haw ma hi; Mahnaven sia le pha a khen theihnak haw cu amu ca in, a daan haw na hi bok hi.
15 A bawlmi haw ziaza in Daan sung a ngatmi thukham cu a lungmu sung hawah ngatin um hi, tih langtik hi. Mahmi cu man hi tin sia le pha a khenkhuai theihnak haw lungmu in langtik hi. Itahim titale vei kha khat ten mawhsiatin, vei kha khat ten phat cotik hi.
16 Mah hangin Pathian in Jesuh Khrih tawnin, mi hempoh tei lungmu sungah a ngaihsut kuh haw mi cu thu a khen ni ten, ka phuanmi Thuthangpha bangin thukhen hi tuk hi.
Judah Mi le Daan
17 Mahti bang ahi tale noh Judah mite? Judah mi ing tin Moses Daan cu muang zetin, Pathian thu lamah uangcop dunzet uh ci.
18 Pathian i deihnak cu thei uh ci, a dikmi ten tuk vang Daan sung pen cung khawng zo uh ci.
19 Mitcaw lamhuaitu ung, thimnak sung um mitei ca in vaknak ung tin muangdunzet uh ci.
20 A sil mite, zilhtu ung; imah thei ngawl tei lakah zilhtu dek ung tin ti uh ci. Daan sung thu hempoh theihnak le thutak cangkim zetin nei ung tin muangdunzet uh ci.
21 Midangte zilhtu noh ten itakaw nangmuh le nangmuh zilhdun ma si uh si! “Nguca pahsun,” tin hilh uh ci; nangmuh aw ngu uh cim?
22 “Nupa sualnak bawl pahsuh uh,” ti nave uhcin; nangmuh aw sual uh cim? Milim cu ningdelh uh ci; mahnaven milim biakinn a, na ngu uh cim?
23 Pathian i daan nei ung tin uangzet nave uhcin, mahmi daan palcatin Pathian nelah zahcaknak hengtik awng uh cim?
24 Lai Thiangtho sungah, “Noh Judah mite hangin Gentail miten Pathian zawnsak haw,” tin um hi.Ref 2:24 * Isa 52:5;
25 Daan na zui uh tale vuncep na tan uh hi a man nei hi; mahnaven Daan na palcat uh tale vunceptan awng ngawlte tuah bangten uh ci.
26 Gentail mite cu vunceptan awng haw ma naven Daan sung a ummi thukham khi a zui haw tale vunceptan bangin Pathian in ngaihsutsak tukma maw?
27 Mah hangin noh Judah mite, vunceptalhmi hi uh ci, Daan vang lai a ngat loli in nei nave uhcin mahmi Daan na palcat uh hangin Gentail mitei mawhsiat tawk tuk uh ci.
28 Amuhte cu vunceptalhmi hi haw ma naven Daan zui haw hi. Thu ngangai ti ahin akua kaw Judah mi ngangai le vunceptalhmi ngangai ahi tuk? A pualam bek pen Judah mi hi tin, vunceptan cu taksa hum a bawlnak bek a hih hangin Judah mi ngangai hi ma hi.
29 A sunglam saw ah Judah lungmu in vunceptalhnak a ngahtu khi Judah mi ngangai haw hi. Mahmi cu ngatmi Daan i bawlmi kha ma hi. Pathian Hawvang i bawlmi hi. Mahti bang mihing cu mihing lak pen hi ngawlin Pathian lak pen thangphatnak ngahtu hi.Ref 2:29 Daan 30:6;