9
Sheba Kumpinu Zin
(1Kum 10:1-13)
1 Sheba ngam kumpinu in, kumpi Solomon i minthannak zain, thudotnak hakzet tuah zawldawt tukin Jerusalem ah hung hi. Mi tampi ten zui in, namtui, suang manpha le sui tampi puatu kalaukte tuah hung haw hi. Solomon a tawh ten a lungmu sungah a ngaihsutmi thudotnak hempoh cu dong khawng hi.Ref 9:1-9 Mt 12:42; Lk 11:31;
2 A thudotmi cu Solomon in hilh khawng hi, a hilh theih ngawlmi pa khat hei umma.
3 Sheba kumpinu in, Solomon i cih dan cu mu in kumpi innpi a sakmi,
4 a cabuai hum a, an a eih tuk a luihte, a khutnuai bawi tei innte, kumpi zungah a nadektute a zoh dante le a thuamte, an a eih ten a zotu umlawhte, a vah ten a cingtute le a puansilh daante le Topa i Biakinn a biakpiaknak a bawl mite hempoh amuh ten lamdang sa leita in, a lungmu pai khawng hi.
5 Kumpi bawinu in, Solomon lakah, “Ka ngam pen na thil tihtheidan le na cihdante ka zakmi cu man hi.
6 Keimah tatak hungin ka mit tuah ka muh laihngawl cu a hilh haw mite cu sang thei mang. Ka beng tuah bekin ka zakmi cu na cihnak ngangai i a langkhen hei na hi ma hi. A son haw sangin cip saw ci.
7 Na zite le na khutnuai a nadektute cu iti zahin bawngpha haw him! Nisialin, na cihnak awnkam thei leleng haw hi.
8 Topa na Pathian cu thangphat hi tahen! Topa cu na humah a lungdamin, ama min tuah mi uktu hi tukin kumpi in bawl hi. Ama mihing Israel a ih hangin le kumkhua in, a hup nuam hangin nangmah cu a hum hawah thudik le thuman tuah uktu hi tukin kumpi in bawl,” ti hi.
9 Kumpi bawinu in, kumpi Solomon cu laksawng sui pawng thawng kuah, namtui tampi le suang manphate pia hi. Sheba ngam kumpinu in, Kumpi Solomon lakah a piakmi namtui bang namtui pha cu ilai hei ah um awng ma hi.
10 Kumpi Hiram le Kumpi Solomon tei mihingte, Ofir pen sui puatu ten hual thing le suang manphate pua haw hi.
11 Solomon in mah thing cu Biakinn le kumpi inn kailawnte bawlnak le lasatu tei tingtang le pengkulte bawlnakin mang haw hi. Judah ngamah mahti bang cu mu awng haw ma hi.
12 Solomon in laksawng a ngah bang bokin, Sheba kumpinu i lakah laksawng tampi pia bok hi. Kumpinu i ngetmi hempoh vang pia khawng hi. Mah nungten a zuitute tuah Sheba ngamah kikleh haw hi.
Kumpi Solomon i Hauhnak
(1Kum 10:14-25)
13 Kumsialin Kumpi Solomon in, sui pawng thawng sawm nga awndiak ngah leleng hi.
14 Hihi cu sum bawltu le dawl bawltu tei piakmi siah sial ngawlin a ngahmi hi. Arabia ngam kumpite le Israel ngamsung a mi uk bawi ten sui le ngun tampi pia bok haw hi.
15 Solomon in lumphaw ngengpi za nih bawlin lumphaw pa khat cu sukpekmi sui pawng sawm le pawng nga ten tuah tuammi hi.
16 Mah sialngawl a neudeuh lumphaw za thum bawlin, pa khat cu sukpekmi sui pawng liat ten tuah tuammi hi. Mah lumphawte cu a venghawngin Lebanon Tupi thingin sakmi kumpi inn khaan pa khat sungah koih haw hi.
17 Solomon in kumpi khunnak ngengpi pa khat saiho tuah bawlin, sui ngek tuah luan hi.
18 Mah khunnak kaitohnak tuk ke kal pa luk umin, a mai ah sui tuah lotmi ke koihnak um hi. Taklam le veilamah khut ngaknak umin, a sik lamah kiosa lim pa khat veve dingtik haw hi.
19 Kekal pa luk i pang le pangah kiosa lim sawm le pa nih dingtik haw hi. Hiti bang kumpi khunnak cu koi ngam hei ah um awng ma hi.
20 Kumpi Solomon i khuat hempoh cu sui tuah bawlmi ngeh hi, Lebanon Tupi Inn khaan sung a kuangte vang sui tuah ngeh bawlmi hi. Solomon khanin ngun cu thu pi sa haw ma.
21 Tinbaw tampi nei in, kumpi Hiram i tinbaw tuah Tarshish khua ah hawhtik mek haw hi. A hawh le a kihleh tian kum thum ngei hi. Mah a tinbaw ten sui, ngun, saiho, zawng le utawngte pua haw hi.
22 Kumpi Solomon cu leihum kumpi hempoh lak pen a cipbel le a haubel hi.
23 Pathian i piakmi a cihnak thei nuamin, kumpi hempoh ten thusiampih mek haw hi.
24 Solomon cu laksawng a phunkim sui, ngun, angki cualpi, hiamnam, namtui, cipuh le laakte pia haw hi. Kumsial mahti bangin pia leleng haw hi.
25 Solomon in, a cipuh le a cipuhlengte koihnak tukin cipuh inn thawng li nei in, cipuh ngalkap tei khun tukin cipuh thawng sawm le thawng nih nei hi. A cipuh khenkhatte cu Jerusalem ah koihin, a khenkhat cu khuapi dadangah koih hi.Ref 9:25 1Kum 4:26;
26 Eufrates Ngun pen Filistin ngam le Izipt ngamngi tian kumpi hempoh tei humah thuneitubel hi.Ref 9:26 Pian 15:18; 1Kum 4:21;
27 Solomon khanin ngun cu Jerusalem ah suangzah tamin, sidar thing cu theikung zahin tam hi.Ref 9:27 1Kum 10:27;
28 Solomon in cipuh cu Izipt ngam le ngam dadang pen lei hi.Ref 9:28 Daan 17:16;
Solomon Uknak Tawnpi
(1 Kumpi 11:41-43)
29 Kumpi Solomon i tangthu dangte cu a pat pen a tawp tian, Profet Nathan Tangthu Laibu sungah le Shiloh khua Ahijah i Thuphuan Laibu sungah le Profet Iddo i Muhmi Laibu sungah ngan haw hi. Mah laibu sungah Israel kumpi Jeroboam pa khatnak i thu vang ngan bok haw hi.
30 Solomon in Israel ngam buppi cu Jerusalem khua pen kum sawm li sung uk hi.
31 Solomon cu thi in, David khuapi, Jerusalem ah vui haw hi. Mahten a capa Rehoboam in, a kumpi dek hi.