8
Solomon Nadeh Dangte
(1Kum 9:10-23)
1 Solomon in Biakinn le a kumpi inn cu kum sawm nih sung sa hi.
2 Kumpi Hiram i piakmi khuapi cu tungdinglehin, mah khuapi sungah Israel mite umtik hi.
3 Hamath le Zobah in ngam la in,
4 phillawn a um Jadmor khuapi kulhtian vang tiangleh khawng hi. Hamath ngam a, khuapi tungdingleh khawngin, an koihnak munin bawl hi.
5 Solomon i tundin lehmi khuapi cu Beth Horon Sakta le Beth Horon Hangta, a pa nih haw in, kulhtian tuah tianmi hi in, a kongkate cu khak le kalh theihmi hi,
6 Baalath khuapi, an a koihnak khuapi hempoh le a cipuh le a cipuhlengte a koihnak khuapi hi. Jerusalem khua, Lebanon le a ukmi ngam sungah inn sa tukin a tupmi hempoh cu a deih bangin sa suak khawng hi.
7-8 Israel miten Kanaan ngam a laak haw laihin, a thah haw ngawlmi Kanaan mitei casuante cu a nadektu haw hi. Na a dehtik lo mite Hit mi, Amor mi, Periz mi, Hiv mi le Jebus mite hi haw in, a casuante cu tutian salin cang haw hi.
9 Israel mite sal bangin na a dehtikmi pa khat hei umma. Amuhte cu a ngalkapte, a khutnuai bawite, cipuhleng ngalkap le cipuhleng ngalkap hotu haw hi.
10 Innsak nadektute zotu tukin kumpi Solomon khutnuai ah hotu bawi za nih le sawm nga um haw hi.
11 Solomon in, a zi, Izipt kumpi canu cu David khuapi tihmi Jerusalem khua lun pen ama umnak tukin sakmi innah thawntik hi. Solomon in, “Ka zi cu Israel kumpi David i innah um tuk ngawlmi hi, itahim titale Thutiam Kuang a hennak mun pawpoh cu mun thiangtho hi,” ti hi.
12 Solomon in, Biakinn mai ah a tianmi biaklandawhah Topa i lakah biakpiaknak bawl hi.
13 Moses Daan sungah a um bangin puai nisialin halkang biakpiaknak bawl leleng hi. Mah puaite cu Sabbath ni, Ha Thak Puai kumsial bawlmi Naman hel ngawl Cangho Puai, Anthak Puai le Puanbuk Puai (Kum thak Puai tihvangin sam haw) hi haw hi.Ref 8:13 Suah 23:14-17; 34:22-23; Mipum 28:9-15; 28:16-29:39; Daan 16:16;
14 A pa David in, zui tuk daante a bawl zo bangin thiampite le lasa in thiampite a bawmtu Levi mite cu nisialin, a nadeh haw tukte ngaihsutsak ham khawng hi. Mah bang lelengin Pathian i mihing David i thupiakmi bangin Biakinn cingtute vang kongka a nadehnak mun ten hawah nisial a deh haw tukmi bawlsak ham khawng haw hi.
15 David in, na koihnak inn tei cungcangah thiampi le Levi mite a cahmi bangin ihempoh cu bawl khawng haw hi.
16 Solomon i tuptahmi hempoh cu kim khawng hi. Topa i Biakinn a sak pat ni haw pen a celh haw tian, a nadehnak hempoh cangkim ngawlmi imah umma hi.
17 Solomon cu Edom ngam, Aqaba Tuipi mawk a, khuapi pa nih Eziongeber le Elath ah hawh hi.
18 Kumpi Hiram in hawmkuangte kuatin, timbaw uktu bawite le a hawl thiamtu mihingte tuah kuat hi. Solomon khutnuai a, bawite tuah Ofir ngamah hawh ten haw in, Solomon ca tukin sui pawng thawng thum pua haw hi.