10
Saklam Hinnamte Ngaltho
(1Kum 12:1-20)
1 Rehoboam cu kumpi in bawl tukin saklam Israel mite cu mahlai ah a khopdun haw hangin Rehoboam cu Shekhem ah hawh hi.
2 Nebat capa Jeroboam cu kumpi Solomon lau in, Izipt ngamah tai hi; mahnaven Rehoboam i thu a zak ten Izipt ngam pen kikleh hi.
3 Saklam Israel miten Jeroboam cu zawmin, a venghawngin Rehoboam lakah hawh langkhatin, a lakah,
4 “Na pa in khemnekin, ka bawm uh ngitzettik zo hi. Mah a hih ten atu-in, nunnop deuhin, na bawl tuk ahi tale nangma nadek tuk ung,” tin ti haw hi.
5 Rehoboam in, “Ni thum nungten hungleh un,” ti hi. Mah hangin mipi cu pin haw hi.
6 Kumpi Rehoboam cu a pa Solomon ngaihsutnak piatu upa dedeuh tei lakah hawhin, “Hiti bangin a tih haw ten itin kaw ka donleh tuk?” tin thusiampih hi.
7 Amuh ten, “A hum hawah hehpihnak nei in, awn hum le awnmawi tuah a lung haw na damtik ahi tale kumkhua in nangma nadek haw tuk poh hi,” ti haw hi.
8 Mahnaven mah a hilh haw cu sang ngawlin ama khanpih mihing a phialpih khangno tei ngaihsutnak thei nuamin, amuh tei lakah,
9 “Itin kaw ka tih tuk?” “A bawmngit haw zangdeuh tukin a ngentu tei lakah itin kaw ka donleh tuk?” tin thu na siampih hi.
10 Amuh ten, “A lakah: Ka khutme cu ka pa ta sangin ngeng saw hi.
11 ‘Ka pa in, na bawm uh ngittik, kei in ngittik sesem tung. Ka pa in ngolh neuno tuah vat naven kei in, ngolh ling nei tuah vat tung,’ ” tin ti in, ti haw hi.
12 Ni thum nungten a tepsa bangin, Jeroboam le mipite cu Rehoboam lakah hung haw hi.
13 Kumpi in upa tei ngaihsutnak piakmi cu lawl a, khangno tei ngaihsutnak piakmi saw la in,
14 mipi tei lakah, “Ka pa in, na bawm uh ngittik hi, kei in ngit sesemtik tung; ka pa in ngolh neuno tuah vat naven, kei in ngolh ling nei tuah vat tung hi! tin awn lizet tuah” ti hi.
15 Topa in profet Ahijah mangin Nebat capa Jeroboam lakah a hilhmi kimtik tukin a tuptahmi a hih hangin kumpi Rehoboam in mipi tei deihnak cu zui ma hi.
16 Mipi ten, kumpipa in, a deihnak haw zui ma hi tih amuh haw ten, “David le a hinnamte deih ma ung; kohtei humah ikaw a bawl awng haw! Israel mite pin unna, Rehoboam cu amahno in pel tahen,” tin kumpi Rehoboam cu donin, a inn hawah pin khawng haw hi.
Mah hangin Israel mite ngal tho haw a,Ref 10:16 2Sam 20:1;
17 Rehoboam cu zamsanin, Judah peng bek uktu kumpi in suak hi.
18 Mahten Kumpi Rehoboam in sal tei nadeh khawngtu Adoniram cu Israel tei lakah hah naven Adoniram cu suang tuah sep hum haw hi. Rehoboam cu manlang zetin, a cipuhleng khungin, Jerusalem ah tai hi.
19 Mah pepanin saklam Israel ngam cu David i casuan uknak dotu lelengin suak hawta hi.