7
Pathian Lakah Biakinn Ap Haw
(1Kum 8:62-66)
1 Solomon cu thu a nget ceng ten van pen mei caksukin, a biakpiaknak bawlte cu kang hi; Topa i sunloihnak huham cu Biakinn ah dim khawng hi.Ref 7:1 Thiam 9:23-24;
2 Biakinn cu vaknak tuah a dim hangin, thiampite a sungah tum thei haw ma.
3 Van pen mei a hengmi le Biakinn cu vaknak tuah dim tih Israel miten amuh haw ten a dinnak inntual haw pen a lu haw kunin, Pathian bia in, thangphat haw hi.
“ Topa cu pha hi,
A itnak cu
kumkhua in kho hi,”
tin ti haw hi.Ref 7:3 1Khang 16:34; 2Khang 5:13; Ezr 3:11; Saam 100:5; 106:1; 107:1; 118:1; 136:1; Jer 33:11
4 Kumpi Solomon le mipi ten Topa i lakah biakpiaknak bawl haw hi.
5 Mah biakpiaknak tukin Solomon in, khui thawng sawm nih le thawng nih, tuu thawng za khat le thawng sawm nih pia hi. Kumpi le mipi ten Biakinn cu Topa i lakah ap haw hi.
6 Thiampite cu a nadehnak haw tukin Levi mitei lam hekin ding haw a, David Kumpi i manmi tumnging a phunkim tuah Ama ihnak cu kumkhua in kho hi, tihmi lasa thahin, Topa cu thangphat haw hi. Thiampi ten pengkul a tum haw laihin, mipite cu ding khawng haw hi.
7 Solomon in, a inntual laizang, Biakinn malam cu thiangtikin, mahlai munah halkang biakpiaknak, canghovam biakpiaknak le lemnak biakpiaknak a piakmi sathau cu Pathian nelah pia hi. Hih biakpiaknakte bawlnak tukin daal biaklandawh a bawl haw mi cu neu leita hangin mahlai ah biakpiaknak cu bawl hi.
8 Solomon le Israel miten Puai cu ni salih sung bawl haw hi. Puai bawlnakah a heng thei mihing cu tamzet haw hi; saklam Hamath khua tumnak mualkawn pen le hanglam Izipt ngamngi tiangin hung haw hi.
9 A tawpnak ni ten puai bawl haw a, Biaklandawh apnakin ni salih ngei haw hi, puai bawlnakin, adang ni salih ngei leleu haw hi.
10 Ha salih ha, ni sawm nih le ni thum ni-in, Solomon in mipite cu a inn haw tekah, pintik khawng hi. Topa in, Israel, David le Solomon lakah muicu a piak hangin mipi cu lungdam thatuino in, pin haw hi.
Solomon Lakah Pathian Langleh
(1Kum 9:1-9)
11 Kumpi Solomon in, Biakinn le kumpi inn cu a thuduhsam le pungsan sung a, um mi bangin cangkimno in sa khawng hi.
12 Topa cu zanlamin Solomon lakah langin, “Na thungetnak za ing, hi Biakinn cu ka lakah biakpiaknak na bawlnak tukin ka lungkimmi hi.
13 Van nguah ka zuktik ngawl ten hihen, an ei khawng tukin khaau ka hah ten hihen, ahimata ka mihing tei humah natsia ka hentik ten hihen,
14 ka lakah lungmu sihkiknak tuah thungenin, ka mitmai zei in thilpha ngawl a bawlnak haw pen a kikleh haw ahi tale van pen a thungetnak haw cu za tung a, a sualnak haw cu ngaidam tung, a ngam haw cu ngampha in suaklehtik tung hi.
15 Hi mun cu cingkhawi tung a, hilai pen ka lak a, thu a ngetnak haw cu ngai tung hi.
16 Hi biakinn cu ka tenmi hi, a kumkhua in keimah biaknak mun tukin ka thianthohtik zomi hi. Hi mun cu cingkhawi tung a, kumkhua in hup tung hi.
17 Nangma cungcang thu ah na pa David bangin ka daan le ka thupiakmite zui in, muantak le kom zetin ka na nadek tale,
18 na casuan ten Israel cu uk leleng haw tuk a, na pa David lak a, thutiamnak ka bawlmi cu kimtik tung hi.Ref 7:18 1Kum 2:4;
19 Nangmah le na mihing ten ka daan le ka thupiakte zui ngawlin Pathian dangte na bia uh tale,
20 ka piakmi ngam pen hawlvawk tung a, keimah na biaknak uh mun tukin ka thianthohtik sa mi Biakinn cu zamsan tung hi; Israel cu mi hempoh tei zotsak le nautatmi in suak tuk hi.
21 “Atu-in, hi Biakinn cu mi hempoh i phatsonmi hi; mahnaven mah hun ten siatlal khawng tuk a, mi vaksuk vakto ten amuh haw ten lamdang sa in, ‘Ita Topa in, hi ngam le Biakinn hi, hi bang lawlawmin bawl nen tim? a tih haw ten,
22 mi tihkimin, Topa a Pathian haw, Izipt ngam pen a pu le pate puitultu cu nunghekin, zamsan haw a, pathian dang tei mai ah kunin, a biak haw hangin hi, Topa in, a hum hawah hizah siatsuahnak a hentik,’ ti haw tuk hi,” tin ti hi.